ၸွမ်သိုၵ်းလူင်ယွတ်ႈသိုၵ်း ႁူဝ်ပဝ်ႈၶွင်ႊသီႊဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) လၢတ်ႈဝႃႈ- "ၵွပ်ႈပိူဝ်ႈဝႃႈ ၽူႈၵိူဝ်းၵုမ်ၸိုင်ႈမိူင်း ၼၢင်းဢွင်ႇသၢၼ်းၸုၵျီႇ ယူႇတီႈ NRPC ၽိတ်ႈမွၵ်ႇမႃး၊ ႁဝ်းတေၵႂႃႇႁူပ်ႉမၼ်းၼၢင်းတီႈၼေႇပျီႇတေႃႇ။ တေႁူပ်ႉထူပ်းပႃးၽူႈဢွၼ်ႁူဝ်တပ်ႉမတေႃႇ။ ဝၼ်းတီႈ 11/09/2017 ႁူပ်ႉဢွင်ႇသၢၼ်းၸုၵျီႇ။ ဝၼ်းတီႈ 12 ႁူပ်ႉၸုမ်းၽွင်းလူင်ၶဝ်ၵူႈၵေႃႉၵေႃႉ"-ဝႃႈၼႆ။
ပွၵ်ႈၼႆႉ ၶွမ်ႊမတီႊၵေႃႇသၢင်ႈလွင်ႈၶိုၼ်းလီၵၼ်ၼႂ်းၸိူဝ်ႉၸၢတ်ႈ (NRPC) ႁွင်ႉမွၵ်ႇထိုင်မႃးၸုမ်း RCSS ၸုမ်းလဵဝ်။ ၵဵဝ်ႇၵပ်းလွင်ႈၼႆႉ ၸဝ်ႈယွတ်ႈသိုၵ်းၵေႃႈဝႃႈ တၢင်ႇၸုမ်း PPST (ၸုမ်းႁူမ်ႈသၢင်ႈၶၵ်ႉၵၢၼ်ငမ်းယဵၼ်) တႄႉၶဝ်ၵႆႉၵႆႉၵႂႃႇႁူပ်ႉထူပ်းၵၼ်ယူႇ။ ၵူၺ်းၵႃႈႁဝ်းၼႆႉ ႁဝ်းဢမ်ႇၵႂႃႇသေပွၵ်ႈ၊ ပွႆႇၽူႈတၢင်တူဝ်ၵႂႃႇၵူၺ်း ယူဝ်မၼ်းၼၢင်းသမ်ႉၶႂ်ႈႁူပ်ႉႁဝ်းသေၶႂ်ႈဢုပ်ႇႁဝ်းႁိုဝ် ႁဝ်းၵေႃႈဢမ်ႇႁူႉ-ဝႃႈၼႆ။
ၽူႈၵိူဝ်းၵုမ်ၸိုင်ႈမိူင်း ၼၢင်းဢွင်ႇသၢၼ်းၸုၵျီႇ တင်းႁူဝ်ပဝ်ႈ RCSS ၸွမ်သိုၵ်းလူင်ယွတ်ႈသိုၵ်း ႁူပ်ႉထူပ်းၵၼ်ပွၵ်ႈၵမ်းၼႆႉ ဝၢႆးသေပႃႇတီႇ NLD ၶိုၼ်ႈပဵၼ်လူင်ပွင်ၸိုင်ႈမႃးၼႆႉ ပဵၼ်ပွၵ်ႈထီႉၼိုင်ႈ။ မိူဝ်ႈပႆႇပဵၼ်လူင်ပွင်ၸိုင်ႈၼၼ်ႉၵေႃႈ သွင်ၾၢႆႇယၢမ်ႈထူပ်းၵၼ်ပွၵ်ႈၼိုင်ႈ။
ငဝ်းလၢႆးမိူင်းႁူမ်ႈတုမ်မိူင်းမၢၼ်ႈၼႆႉ ႁဝ်းၵိုတ်းသိုၵ်းၵၼ်မႃးၶၢဝ်းတၢင်း 5 ပီယဝ်ႉ၊ ၵူၺ်းၵႃႈ လွင်ႈၶိုပ်ႈၼႃႈၼႆႉဢမ်ႇပေႃးမီး။ ၵွပ်ႈပိူဝ်ႈၼႆ ပေႃးၵႂႃႇႁူပ်ႉမၼ်းၼၢင်းၼႆႉ တေၸၢင်ႈလႆႈဢုပ်ႇတူၺ်းပႃး ၵဵဝ်ႇၵပ်းၵၢၼ်မိူင်း၊ ၵၢၼ်ပူၵ်းပွင်၊ ၵၢၼ်ပၢႆးမၢၵ်ႈမီးၸိူဝ်းၼႆႉ။ ၶၢဝ်းတၢင်း RCSS ပွၵ်ႈၼႆႉ ဢိင်ၼိူဝ် NRPC တႅမ်ႈလိၵ်ႈႁွင်ႉမွၵ်ႇမႃး ႁႂ်ႈလႆႈႁူပ်ႉထူပ်းၵၼ် သၢင်ႈလွင်ႈယုမ်ႇယၼ်ၵၼ်။ ၼႂ်းတိုဝ်ႉတၢင်းၼႆႉ RCSS မုင်ႈမွင်းဝႃႈ တေလႆႈလွင်ႈယုမ်ႇယမ်ၵၼ်ၶိုၼ်ႈမႃး။ ပၼ်ႁႃဢၼ်မီးလွင်ႈထၢင်ႇၽိတ်းထၢင်ႇပိူင်ႈၼိူဝ်ၵၼ်ၸိူဝ်းၼႆႉၵေႃႈ မၼ်းတေလီၶိုၼ်ႈမႃး၊ မၼ်းတေႁၢႆၵႂႃႇ။ လွင်ႈပၢင်ၵုမ်ၵၢၼ်မိူင်းၸၼ်ႉၸိူဝ်ႉၸၢတ်ႈၸၢဝ်းၶိူဝ်းတႆးလႄႈသင်၊ လွင်ႈၾၢႆႇသိုၵ်းမၢၼ်ႈတီႉၺွပ်းၵုမ်းၶင်ၵူၼ်းမိူင်း ၸႄႈဝဵင်းႁူဝ်ပူင်းၸိူဝ်းၼႆႉၵေႃႈ တေၸၢင်ႈဢဝ်ဢုပ်ႇဢူဝ်းပႃးယူႇ- ၸဝ်ႈယွတ်ႈသိုၵ်း လၢတ်ႈ။
ၸဝ်ႈယွတ်ႈသိုၵ်း သိုပ်ႇလၢတ်ႈဝႃႈ-"ၶၢဝ်းတၢင်းၼႆႉ ႁဝ်းယုမ်ႇယမ်ဝႃႈ သၢင်ႈလွင်ႈယုမ်ႇယမ်လူင်ပွင်ၸိုင်ႈ တင်းတပ်ႉသိုၵ်း၊ ႁဝ်းႁၼ်ဝႃႈ မၼ်းတေပဵၼ်ၽွၼ်းလီတႃႇၵူၼ်းမိူင်းႁဝ်း။ ၵိုတ်းသိုၵ်းယဝ်ႉၶၢဝ်းတၢင်း 5 ပီ ႁဵတ်းသင်လႄႈတိုၵ်ႉပဵၼ်ပၢင်တိုၵ်းၵၼ်ယူႇ၊ ယင်းဢမ်ႇႁဵတ်းသင်လႆႈ ယင်းဢမ်ႇပူၵ်းပွင်သင်လႆႈ ၸဵမ်ၸိူဝ်းၼႆႉ မၼ်းတေၸၢင်ႈႁၼ်တၢင်းမၼ်း"- ႁဝ်းမုင်ႈမွင်းဝႆႉၸိူင်ႉၼႆ။
ဢၼ်လမ်ႇလွင်ႈသုတ်း ၸိုင်ႈမိူင်းႁူမ်ႈတုမ်မၢၼ်ႈၼၼ်ႉ ၸဝ်ႈယွတ်ႈသိုၵ်းႁၼ်ဝႃႈမီး 3 ပိူင်။ 1.ၵိုတ်းသိုၵ်း ပတ်းပိုၼ်ႉတူဝ်ႈၸိုင်ႈမိူင်း။ 2.ပိူဝ်ႈတႃႇဢုပ်ႇဢူဝ်းၵၢၼ်မိူင်းၵၼ်။ ႁႂ်ႈမၼ်းၵႂႃႇလႆႈလီၼၼ်ႉ လူဝ်ႇသၢင်ႈလွင်ႈ ယုမ်ႇယမ်တေႃႇၵၼ်၊ ႁႂ်ႈမီးလွင်ႈယုမ်ႇယမ်တေႃႇၵၼ်။ 3.ပၼ်ႁႃဢၼ်ထၢင်ႇၽိတ်းထၢင်ႇပိူင်ႈၵၼ်ယူႇ မၼ်းၸၢင်ႈႁဵတ်းႁႂ်ႈလွင်ႈတႅၵ်ႇယႅၵ်ႈၵၼ်ၵိူတ်ႇၶိုၼ်ႈမႃးထႅင်ႈ။
"တီႈတႄႉမၼ်း လူဝ်ႇသၢင်ႈလွင်ႈယုမ်ႇယမ်ၵၼ်၊ ဢၼ်လႆႈၾၢင်ႉသတိတေႃႇၵၼ်ယူႇလႄႈသင်၊ ဢၼ်ၽိတ်းမႃး တၢင်းလင်ၵေႃႈၸိူဝ်းၼၼ်ႉၵေႃႈ လူဝ်ႇဝၢင်းၶႂၢင်ႉပၼ်ၵၼ် ပေႃးၸိူင်ႉၼႆမၼ်းၸင်ႇၸၢင်ႈလီၵၼ်။ ဢၼ်ႁဝ်းမုင်ႈမွင်းၼႆႉပဵၼ်သၢမ်ဢၼ်ၼႆႉ"- ၸဝ်ႈယွတ်ႈသိုၵ်း လၢတ်ႈတီႈပၢင်သပ်းၸႅင်ႈၶၢဝ်ႇ ၼင်ႇၼႆ။
ၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး (RCSS/SSA) ၼႆႉ ပဵၼ်ၸုမ်းဢၼ် လူင်းလၢႆးမိုဝ်း ၵိုတ်းတိုၵ်းတူဝ်ႈမိူင်း (NCA) သေ ပဵၼ်ၸုမ်းဢၼ် လူင်ပွင်ၸိုင်ႈသိုၵ်းမၢၼ်ႈ ပိုၼ်ၽၢဝ်ႇပူတ်းဢွၵ်ႇပႅတ်ႈသဵၼ်ႈၸိုဝ်ႈ ၸုမ်းၼွၵ်ႈမၢႆမီႈ မိူဝ်ႈၵၢင်လိူၼ်ၼူဝ်ႊဝႅမ်ႊၿိူဝ်ႊ ပီ 2015 ပူၼ်ႉမႃး။ ၽွင်းၵေႃႇသၢင်ႈလွင်ႈငမ်းယဵၼ်ယူႇၼႆႉ ပၢင်ၵုမ်လူင်လွင်ႈငမ်းယဵၼ်ၸၼ်ႉ ၸိုင်ႈမိူင်းႁူမ်ႈတုမ် ႁိုဝ် ပၢင်ၵုမ်လူင်ပၢင်လူင်ႁူဝ်ပၢၵ်ႇပီ 21 ပၢင်လူင်ၵေႃႈ ၶိုၼ်ႈႁွတ်ႈၶဝ်ႈႁူမ်ႈ ဢုပ်ႇဢူဝ်းၵၢၼ်မိူင်းမႃး။