ဝၼ်းတီႈ 08/09/2017 ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈမၢႆ 2 ၸႄႈဝဵင်းမၢၼ်ႈၸေႊ ၸၢႆးဢေးမိၼ်း ၊ ၵူၼ်းၼုမ်ႇၼႂ်းပႃႇတီႇႁူဝ်သိူဝ်၊ ၽူႈယႂ်ႇၵူၼ်းလူင်ၼႂ်းဢိူင်ႇဝၢၼ်ႈၸိူဝ်းၼႆႉ ႁူပ်ႉထူပ်း ၵူၼ်းဝၢၼ်ႈတီႈႁူင်းႁေႃၵေႃလိၵ်ႈလၢႆးလႄႈၾိင်ႈငႄႈတႆး ဝၢၼ်ႈၼမ်ႉယီး ထုင်ႉလွႆႁူဝ်သိူဝ် ၸႄႈဝဵင်း မၢၼ်ႈၸေႊ ၸႄႈတွၼ်ႈမၢၼ်ႈမေႃႇ ၸႄႈမိူင်းၶၢင် ၵူၼ်းဝၢၼ်ႈၵူၼ်းမိူင်းမႃးႁပ်ႉထွမ်ႇၸမ်ပၢၵ်ႇ။
ၵူၼ်းဝၢၼ်ႈဢွၼ်ၵၼ် တၢင်ႇလၢတ်ႈ လွင်ႈလႆႈသိုဝ်ႉၾႆးၾႃႉၵႃႈယႂ်ႇ၊ ႁူင်းႁဵၼ်းဢမ်ႇၵုမ်ႇထူၼ်ႈ လႆႈၵႂႃႇ ႁဵၼ်းလိၵ်ႈၵႆဝၢၼ်ႈ ၊ ႁူင်းယႃႈၵေႃႈမီးဢမ်ႇတဵမ်ထူၼ်ႈ၊ သဵၼ်ႈတႃႈသၢႆတၢင်းၵေႃႈ ဢမ်ႇလီၵႂႃႇမႃးယၢပ်ႇ၊ တပ်ႉသိုၵ်းဢၼ်ပၵ်းယူႇတီႈၼႂ်းဝၢၼ်ႈၼၼ်ႉၵေႃႈ ႁႂ်ႈထွၼ်ဢွၵ်ႇပၼ်၊ လွင်ႈတၢင်ႇပၢႆႉၸိုဝ်ႈဝၢၼ်ႈ/ ပွၵ်ႉၸိူဝ်းၼႆႉ ႁႂ်ႈၽူႈမီးပုၼ်ႈၽွၼ်း/ ၽူႈတႅၼ်းၸွႆႈၵႄႈလိတ်ႈပူၵ်းပွင်ပၼ် ဝႃႈၼႆ။
ၸၢႆးဢေးမိၼ်း ၽူႈတႅၼ်းသၽႃးၸႄႈမိူင်းမၢႆ 2 လၢတ်ႈဝႃႈ - “ၶႂ်ႈႁႂ်ႈၵူၼ်းမိူင်းမီးၸႂ်ႁတ်းႁၢၼ် ႁတ်း လၢတ်ႈႁတ်းၸႃ လၢတ်ႈဢွၵ်ႇသဵင်ၵၢင်ၸႂ်ဢၼ်မီးတႄႉ၊ မီးလွင်ႈယၢပ်ႇၽိုတ်ႇၼႂ်းဢိူင်ႇဝၢၼ်ႈ ၸိူင်ႉႁိုဝ်ၵေႃႈ ႁႂ်ႈလၢတ်ႈၼႄမႃးသေၵမ်း ၼင်ႇဢၼ်ႁဝ်းၶႃႈပွင်ပဵၼ်လႆႈၼၼ်ႉ တေၶတ်းၸႂ်ဢဝ် ဢုပ်ႇၵုမ်ၼႂ်းသၽႃးသေ ႁႃလၢႆးတၢင်းၵႄႈလိတ်ႈပၼ်ယူႇ” ဝႃႈၼႆ။
မိူဝ်ႈဝၼ်းတီႈ 07/09/2017 ၼၼ်ႉၵေႃႈ ႁူပ်ႉထူပ်းၵူၼ်းဝၢၼ်ႈၸၢဝ်းၶၢင် ၼႂ်းထုင်ႉလွႆႁူဝ်သိူဝ်ဢုပ်ႇ ဢူဝ်းတွင်ႈထၢမ်တၢင်းယၢပ်ႇၽိုတ်ႇ မီးၸၢဝ်းၶၢင်မႃးထွမ်ႇငိၼ်း 150 ပၢႆ မိူဝ်းၼႃႈမႃးၵေႃႈတေၶတ်းၸႂ် လူင်းပိုၼ်ႉတီႈႁူပ်ႉထူပ်းၵူၼ်းမိူင်းၵႂႃႇထႅင်ႈ ဝႃႈၼႆ။
Photo by Sai Kyaw Thiha