သူး/ရၢင်းဝလ်း ၸဝ်ႈသုၸၼ်ႇတီႇ တေဢိုတ်းႁပ်းဝႅပ်ႊၾွမ်ႊ တိုၵ်းသူၼ်းၵူၼ်းၼုမ်ႇ ၽူႈႁဵတ်းၵၢၼ်သုၼ်ႇႁူမ်ႈဢွၼ်ၵၼ်တၢင်ႇယိုၼ်ႈ

ၵူၼ်းၼုမ်ႇၽူႈပိုၼ်ႉပွႆႇပုၼ်ႈလီသုၼ်ႇတူဝ်သေ ႁဵတ်းၵၢၼ်သုၼ်ႇႁူမ်ႈပုၼ်ႈၵူၼ်းၼမ်ၼၼ်ႉ ယူႇတီႈၶွမ်ႊမတီႊ ၾၢႆႇမွပ်ႈယိုၼ်ႈ သူး(ရၢင်းဝလ်း) ၸဝ်ႈသုၸၼ်ႇတီႇသေ ၶတ်းလိူၵ်ႈမွပ်ႈပၼ်သူး/ရၢင်းဝလ်း ၼိုင်ႈပီၼိုင်ႈၵေႃႉ။ ဢမ်ႇႁိုင်ဢမ်ႇၼၢၼ်းၼႆႉ တေႁပ်းဢိုတ်းဝႅပ်ႊၾွမ်ႊသေ တေၶတ်းလိူၵ်ႈယဝ်ႉ၊ တိုၵ်းသူၼ်းထိုင်ၵူၼ်းၼုမ်ႇ ႁႂ်ႈဢွၼ်ၵၼ်ထႅမ်ဝႅပ်ႊၾွမ်ႊတၢင်ႇယိုၼ်ႈ ၶိုတ်းတၼ်းၶၢဝ်းယၢမ်း။


တွၼ်ႈတႃႇမွပ်ႈယိုၼ်ႈသူး (ရၢင်းဝလ်း) ၸဝ်ႈသုၸၼ်ႇတီႇ တႃႇပီ 2017 ၼႆႉ တေဢိုတ်းႁပ်ႉဝႅပ်ႊၾွမ်ႊ ဝၼ်းတီႈ 15/09/2017 ။ ဝၢႆးၼၼ်ႉ တေၶတ်းလိူၵ်ႈသၢင်ဢဝ်ၵူၼ်းၼုမ်ႇ ၽူႈပိုၼ်ႉပွႆႇပႅတ်ႈပုၼ်ႈလီသုၼ်ႇတူဝ် ၸဝ်ႈၵဝ်ႇသေ ႁဵတ်းၵၢၼ်သုၼ်ႇႁူမ်ႈပုၼ်ႈၵူၼ်းတင်းၼမ်ၼႆ- ၶွမ်ႊမတီႊၾၢႆႇမွပ်ႈယိုၼ်ႈသူး ၶဝ်ပိုၼ်ၽၢဝ်ႇဝႆႉၼင်ႇၼႆ။


လွင်ႈဝႅပ်ႊၾွမ်ႊၼႆႉ ပိုၼ်ၽၢဝ်ႇမႃးၸဵမ်မိူဝ်ႈၽွင်းႁူဝ်ပီ 2017 ၼႆႉ။ မိူဝ်ႈလဵဝ် ယွၼ်ႉပိူဝ်ႈဝႃႈၶၢဝ်းယၢမ်းၵိုတ်းထႅင်ႈ 7-8 ဝၼ်းၵူၺ်းယဝ်ႉလႄႈ ၼင်ႇႁိုဝ်ၽူႈဢၼ်သူၼ်ၸႂ်ၶဝ်လႄႈသင်၊ ၽူႈဢၼ်ပိုၼ်ႉပွႆႇလွင်ႈပုၼ်ႈလီသုၼ်ႇတူဝ်ၶဝ် ၸိူဝ်းၼႆႉ ပေႃးတေဢွၼ်ၵၼ်ယိုၼ်ႈယွၼ်း ပိူဝ်ႈတႃႇတေလႆႈႁပ်ႉ မွပ်ႈယိုၼ်ႈသူး /ရၢင်းဝလ်းဢၼ်ၼႆႉၼၼ်ႉ ယူႇတီႈၶွမ်ႊမတီႊမွပ်ႈယိုၼ်ႈသူးၼႆႉ လႆႈတိုၵ်းသူၼ်းထိုင်ၵူၼ်းၼုမ်ႇတင်းလၢႆ-ၼႆယဝ်ႉ။

ၸၢႆးသု ၵေႃႉလႆႈႁပ်ႉသူး/ရၢင်းဝလ်း ၸဝ်ႈၼၢင်းသုၸၼ်ႇတီႇ ပီ 2016 

ဢိင်ၼိူဝ်လွင်ႈၼႆႉသေ ၵေႃႉလႆႈႁပ်ႉသူး ၸဝ်ႈသုၸၼ်ႇတီႇ မိူဝ်ႈပီ 2016 ၸၢႆးသု လၢတ်ႈဝႃႈ- "ဢၼ်မီးမႃးသူး/ ရၢင်းဝလ်း ၸဝ်ႈသုၸၼ်ႇတီႇၼႆႉ မၼ်းပဵၼ်ႁႅင်းၸႂ်တွၼ်ႈတႃႇၵူၼ်းၼုမ်ႇၶဝ်တေ ၶတ်းၸႂ်ၵၢၼ်ငၢၼ်းသေဢမ်ႇၵႃး ပဵၼ်တီႈဢၼ်မၵ်းမၼ်ႈ လွင်ႈဝႃႈၵူၼ်းၼုမ်ႇႁဵတ်းၵၢၼ်ယူႇ ၼႆၼၼ်ႉလႄႈ ပဵၼ်လွင်ႈလီတႄႉတႄႉ။ ယူႇတီႈၶႃႈႁဝ်းသေႁၼ်ထိုင်ဝႃႈ ၸိူဝ်းဢၼ်ၶတ်းၸႂ်ႁဵတ်းသၢင်ႈၵၢၼ်ငၢၼ်းယူႇၸိူဝ်းၼၼ်ႉ လီၶဝ်ႈၸႂ်ၼိူဝ်လွင်ႈၼႆႉသေ တၢင်ႇယိုၼ်ႈဝႅပ်ႊၾွမ်ႊ။ ၵူၺ်းၵႃႈ ၾၢႆႇၼိုင်ႈၵေႃႈ ယူႇတီႈၵူၼ်းၼုမ်ႇသေ ၸွမ်းၼင်ႇတႃႈမုင်ႈယိူင်းမၢႆ ဢၼ်ႁဝ်းတမ်းဝၢင်းဝႆႉၼၼ်ႉ ပဵၼ်ၸိူင်ႉႁိုဝ်ၵေႃႈ လီႁဵတ်းလီသၢင်ႈ လီယၢင်ႈၵႂႃႇႁႂ်ႈပေႃးႁွတ်ႈပေႃးထိုင်၊ ထုၵ်ႇလီသိုပ်ႇႁၢမ်သိုပ်ႇႁၢပ်ႇ ပုၼ်ႈပၢင်ႈၵူၼ်းတင်းၼမ်ၵႂႃႇ"- ဝႃႈၼႆ။


သူး (ရၢင်းဝလ်း) ၸဝ်ႈၼၢင်းသုၸၼ်ႇတီႇ၊ ၸဝ်ႈၼၢင်းဢိင်ႊငႄႊ (Inge Sargent ဢၼ်ပဵၼ်မႁႃတေဝီႇ ၼၢင်းၸုမ်ႈၸႂ်မိူင်း ၸဝ်ႈၵျႃႇသႅင်၊ ၼၢင်းၾႃႉလူင်မိူင်းသီႇပေႃႉ) ဢွၼ်ႁူဝ်မွပ်ႈပၼ်ၼႆႉ လႆႈတင်ႈၶွမ်ႊမတီႊ မွပ်ႈယိုၼ်ႈသူးမႃး မိူဝ်ႈၼႂ်းပီ 2008 သေ လႆႈမွပ်ႈယိုၼ်ႈပၼ်ၵူၼ်းၼုမ်ႇ ဢႃယုပႃႈတႂ်ႈ 35 မႃးၵူႈပီ၊ တႄႇပီႁႅၵ်ႈမိူဝ်ႈပီ 2008 ၼၼ်ႉသေ သိုပ်ႇမွပ်ႈယိုၼ်ႈမႃးၵူႈပီတေႃႇထိုင်ယၢမ်းလဵဝ်။ ၼိုင်ႈပီလႂ်ၼိုင်ႈ 1 ၵေႃႉ။ လိူၵ်ႈမွပ်ႈယိုၼ်ႈပၼ်တီႈၵူၼ်းၼုမ်ႇ ၽူႈၵတ်ႉၶႅၼ်ႇ ၵေႃႉဢၼ်ႁဵတ်းၵၢၼ်ႁၢပ်ႇႁၢမ်ပိူဝ်ႈတႃႇၵူၼ်းတင်းၼမ်။


သူး /ရၢင်းဝလ်း ၸဝ်ႈသုၸၼ်ႇတီႇၼႆႉ ပဵၼ်ၶႅပ်းဝႂ် ယွင်ႈယေႃးၼမ်ႉၵတ်ႉၵူၼ်းၼုမ်ႇ။ ၼွၵ်ႈသေမွပ်ႈယိုၼ်ႈ ဝႂ်ယွင်ႈယေႃးယဝ်ႉ ယင်းမွပ်ႈယိုၼ်ႈပၼ်ပႃး ငိုၼ်းၻေႃႊလိူဝ်ႊ ဢမေႊရိၵၼ်ႊသၢမ်ႁဵင် (3,000) ၵူႈပီ။ ၼႂ်းပီၼႆႉ ပိုၼ်ၽၢဝ်ႇဝႆႉတေမွပ်ႈပၼ်သီႇႁဵင် (4,000) -ၼႆယဝ်ႉ။


ၵူၼ်းၼုမ်ႇ ၽူႈၸိူဝ်းလႆႈႁပ်ႉမွပ်ႈရၢင်းဝလ်း ၸဝ်ႈသုၸၼ်ႇတီႇၼႆႉ တင်းမူတ်းမီးယဝ်ႉ 9 ၵေႃႉ။ 1.ပွၵ်ႈႁႅၵ်ႈသုတ်း မိူဝ်ႈပီ 2008 ပဵၼ်ၸၢႆးၽူးမိူင်း ၽူႈၸွႆႈႁႅင်းၵၢၼ်။ 2.ပီ 2009 ၸၢႆးသႅင်ၽၼ်း ၽူႈႁၢပ်ႇၵၢၼ်ပူၵ်းပွင်မူႇဝၢၼ်ႈၼႂ်းမိူင်း။ 3.ပီ 2010 ၼၢင်းမွၼ်းၵဵင် ၽူႈႁၢပ်ႇၵၢၼ်ပၢႆးပၺ်ႇၺႃႇ လႄႈ ၼႂ်းၸုမ်းၵပ်းသၢၼ်လွင်ႈၼၢင်းယိင်းတႆး။ 4.ပီ 2011 မေႃယႃၸၢႆးပေႇတ လွႆၵေႃႇဝၼ်း။ 5.ပီ 2012 ၸဝ်ႈၶူးသီရိထမ်မ ဝတ်ႉၾႃႉဝဵင်းဢိၼ်း (လၵ်းတႅင်ႇ) ဢိူင်ႇပဵင်းလူင် ၸႄႈဝဵင်းဝဵင်းႁႅင် ၽူႈၵေႃႇတင်ႈ ႁူင်းၼႄပိုၼ်း။ 6.ပီ 2013 ၸၢႆးသၢမ်ၾူၼ်သႅင် ၽူႈႁပ်ႉပုၼ်ႈၽွၼ်း ၾၢႆႇတိတ်းတေႃႇၵပ်းသိုပ်ႇၼွၵ်ႈမိူင်း ပႃႊတီႊႁူဝ်သိူဝ် (SNLD) ။ 7.ပီ 2014 ၶူးၼၢင်းလႃႈ ၵေႃႉၶတ်းၸႂ်တူင်ႉၼိုင် တႃႇၸဝ်ႈႁႆႈၸဝ်ႈၼႃး။ 8.ပီ 2015 ၼႆႉ ပဵၼ်ၼၢင်းၼူၼ်းႁွမ် ၵူၼ်းသႅၼ်ဝီ ၽူႈၶတ်းၸႂ် တွၼ်ႈတႃႇသုၼ်ႇလႆႈၽဵင်ႇပဵင်း။ 9.ပီ 2016 ၸၢႆးသု ၽူႈဢွၼ်ႁူဝ်ၵူၼ်းၼုမ်ႇ ဝဵင်းပၢင်လူင်လႄႈ ၽူႈတူင်ႉၼိုင်ၼႃႈၵၢၼ် ပိူဝ်ႈတႃႇၵူၼ်းတင်းၼမ်။