ဝၼ်းတီႈ 27/08/2017 ၵေႃလိၵ်ႈလၢႆးလႄႈ ၾိင်ႈငႄႈတႆး ဝဵင်းၼမ်ႉၶမ်း ၸတ်းႁဵတ်းပၢင်ယုၵ်ႉယွင်ႈ လုၵ်ႈႁဵၼ်းၸိူဝ်းဢွင်ႇပူၼ်ႉၸၼ်ႉ 10 လႄႈ ပွႆးလူင်ပၢင်သွၼ်လိၵ်ႈတႆးၶၢဝ်းၾူၼ် တီႈႁွင်ႈလုမ်းသိူဝ် ၽိူၵ်ႇ (ကျားဖြူခန်းမ) ပွၵ်ႉၵွင်းၼွင်မူဝ် ဝဵင်းၼမ်ႉၶမ်း ၸႄႈတွၼ်ႈမူႇၸေႊ ၸိုင်ႈတႆး ပွတ်ႇႁွင်ႇ။
ၼႂ်းပၢင်ၼႆႉမီးၽူႈယႂ်ႇၵူၼ်းလူင် ၼႂ်းၸုမ်းၶွတ်ႇလိူတ်ႈၽွမ်ႉႁူမ်ႈ (UP) ၸုမ်းပႃႇတီႇၵၢၼ်မိူင်း၊ ၸုမ်းၶႂႆႇ ၶႃပႄလႅင် RCV ၊ ၾၢႆႇၵွၼ်းၼႂ်းဢိူင်ႇဝၢၼ်ႈ၊ ပေႃႈမႄႈလုၵ်ႈႁဵၼ်းလႄႈမေႃသွၼ် ဢိၵ်ႇလုၵ်ႈႁဵၼ်း ၶဝ်ႈႁူမ်ႈမွၵ်ႈ 300 ၵေႃႉ။
ၸၢႆးသၢမ်မူၼ်ႇ ႁူဝ်ပဝ်ႈၵေႃလိၵ်ႈလၢႆး ၼမ်ႉၶမ်း လၢတ်ႈဝႃႈ - “ ယိူင်းဢၢၼ်းဢၼ်ႁဝ်းၶႃႈ ၸတ်းႁဵတ်း ပၢင်ယုၵ်ႉယွင်ႈၼႆႉ ပိူဝ်ႈႁႂ်ႈၵူၼ်းၼုမ်ႇမီးတၢင်းၶတ်းၸႂ် ၼႂ်းၵၢၼ်လိၵ်ႈလၢႆး ၵၢၼ်ႁႃပၢႆးပၺ်ၺႃ ယွၼ်ႉ ၵူၼ်းၼုမ်ႇၼႆႉ ပဵၼ်ဢဵၼ်ႁႅင်းတွၼ်ႈတႃႇမိူဝ်းၼႃႈ ၵွပ်ႈၼၼ်ၶႂ်ႈႁႂ်ႈၵူၼ်းၼုမ်ႇ ဢွၼ်ၵၼ်သႂ်ႇၸႂ်ၼႂ်း ၵၢၼ်လဵပ်ႈႁဵၼ်းၼမ်ၼမ်သေၵမ်း ” ဝႃႈၼႆ။
လုၵ်ႈႁဵၼ်းၼႂ်းပီ 2016 – 2017 ၼႆႉ ၽူႈလႆႈႁပ်ႉလၢဝ်ၸွင်ႈ Distinction (5)လုၵ်ႈ မီး 2 ၵေႃႉ၊ ၽူႈလႆႈႁပ်ႉလၢဝ်ၸွင်ႈ (4) လုၵ်ႈ မီး 7 ၵေႃႉ၊ ၽူႈလႆႈႁပ်ႉလၢဝ်ၸွင်ႈ (3) လုၵ်ႈမီး 7ၵေႃႉ၊ ၽူႈလႆႈႁပ်ႉ လၢဝ်ၸွင်ႈ (2) လုၵ်ႈမီး 6 ၵေႃႉ ၊ ၽူႈလႆႈႁပ်ႉလၢဝ်ၸွင်ႈ (1) လုၵ်ႈမီး 27ၵေႃႉ ၊ ဢၼ်ဢမ်ႇလႆႈမီး 166 ၵေႃႉ ႁူမ်ႈတင်းသဵင်ႈလုၵ်ႈႁဵၼ်းဢၼ်ယဝ်ႉၸၼ်ႉသိပ်းမီး 215 ၵေႃႉ၊ လၢဝ်ၸွင်ႈၼႆႉ ၾၢႆႇမၢၼ်ႈႁွင်ႉၵူင်ႇထူး Distinction – 1 ၽႃသႃမၢႆတွပ်ႇ 100 mark ပေႃႈလႆႈ 75 mark ၶိုၼ်ႈၼိူဝ်ပွင်ႇဝႃႈ ဢွင်ႇၶိုၵ်ႉတွၼ်းလႄႈ ထုၵ်ႇယုၵ်ႉယွင်ႈဝႃႈလႆႈၵူင်ႇထူး/လၢဝ်ၸွင်ႈ ။ ပၢႆးၼပ်ႉတႄႉ တၵ်းလႆႈ 85 mark ၵွၼ်ႇၸင်ႇတေလႆႈလၢဝ်ၸွင်ႈ။