ၼႂ်းၶေႃႈပိုၼ်ၽၢဝ်ႇၼၼ်ႉပႃးဝႆႉဝႃႈ သၢၼ်ၶတ်းလွင်ႈၸုမ်းယိပ်းၵွင်ႈၵၢင်ႇ TNLA ၽဝ်ႁိူၼ်းၵူၼ်း ဝၢၼ်ႈႁူဝ်ပၢင်ႇ ဢိူင်ႇမိူင်းဝီး ၊ လွင်ႈပူၼ်ႉပႅၼ်သုၼ်ႇလႆႈၵူၼ်းမိူင်း ၊ ဢဝ်ၵူၼ်းမိူင်း ပဵၼ်ယိူဝ်ႇၵၢၼ် သိုၵ်း ၊ ပိုတ်ႇပၢင်တိုၵ်းၼႂ်းဝၢၼ်ႈ ၊ တုၵ်းယွၼ်းပႃးၽွင်းလူင်ၸိုင်ႈတႆးၽူႈမီးပုၼ်ႈၽွၼ်းတူၺ်း လွမ်ပၼ်ႁႂ်ႈ ဝၢၼ်ႈမိူင်းပေႃးယဵၼ်ဢမ်ႇမီးပၢင်တိုၵ်း၊လိူဝ်ၼၼ်ႉသင်ၸုမ်းယိပ်း ၵွင်ႈၵၢင်ႇၸုမ်း လႂ်သေဢမ်ႇဝႃႈပေႃးပူၼ်ႉပႅၼ်သုၼ်ႇလႆႈၵူၼ်းမိူင်းၸိုင် ၸုမ်းၵူၼ်းၼုမ်ႇ TYO တိုၼ်း တေသၢၼ် ၶတ်း - ဝႃႈၼႆ ။
ၸၢႆးၵွၼ်းၶိူဝ်း ၽူႈၶၢၼ်ပၢၵ်ႇ ၸုမ်းၵူၼ်းၼုမ်ႇ လၢတ်ႈၼႄတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ - “ ပေႃးပဵၼ်ပၢင်တိုၵ်းမႃးၵေႃႈ ၵူၼ်းမိူင်းလႆႈၶၢမ်ႇၸၢၵ်ႇမၼ်းယူႇၸိူင်ႉၼႆတိၵ်ႉတိၵ်ႉ ႁိူၼ်းယေးထုၵ်ႇ ၽဝ် ၵူၼ်းမိူင်းႁၢမ်းႁႅၵ်းတီႈယူႇ ၊ ၺႃးပူၼ်ႉပႅၼ်သုၼ်ႇလႆႈ ၊ ၵူၼ်းမိူင်းဢမ်ႇမီးတၢင်းၽိတ်း သင်သေ ထုၵ်ႇၺႃးတီႉၺွပ်းၵႂႃႇၸိူဝ်းၼႆႉႁဝ်းၶႃႈ ယိၼ်းၸႂ်ဢမ်ႇလီမိူဝ်းၼႃႈမႃးၵေႃႈဢမ်ႇၶႂ်ႈႁႂ်ႈပဵၼ်ထႅင်ႈ ၼႆလႄႈၶႂ်ႈ တုၵ်းယွၼ်းထိုင်ၽွင်းလူင်မိူင်းတႆး ၽူႈယႂ်ႇၵူၼ်းလူင်ၽူႈမီးပုၼ်ႈၽွၼ်းၶဝ်ၸွႆႈတူၺ်း လွမ်ပၼ်ဢိတ်းၼိုင်ႈႁႂ်ႈပၢင်တိုၵ်းပေႃးၵိုတ်း တူဝ်ႈမိူင်း ” ဝႃႈၼႆ ”။
ယွၼ်ႉပၢင်တိုၵ်းတပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း TNLA တင်းၶွင်ႊသီႊဢဝ်ၶိုၼ်းၸိုင်ႈတႆး RCSS/SSA လႆႈပဵၼ်ပၢင်တိုၵ်းၵၼ်ၶိုၼ်းႁၢဝ်ႈႁႅင်းမိူဝ်ႈႁူဝ်လိူၼ်မေႊ ၼၼ်ႉလႄႈသင် ၊ ပၢင်တိုၵ်းယွၼ်ႉသိုၵ်း မၢၼ်ႈႁႅၼ်းသိုၵ်း လေႃႇတိုၵ်း တပ်ႉသိုၵ်းၸိုင်ႈတႆး SSPP/SSA ၊ သိုၵ်းၶၢင် KIA လႄႈသိုၵ်းတဢၢင်း TNLA မိူဝ်ႈၵၢင်လိူၼ် မေႊ ၼႆႉလႄႈသင် ၊ ႁဵတ်းႁႂ်ႈၵူၼ်းမိူင်းၼပ်ႉႁူဝ်ႁဵင် လႆႈပၢႆႈယၢၼ်ႁိူၼ်းယေးတီႈယူႇ ။
ဝၼ်းတီႈ 16/05/2016 ၼၼ်ႉသမ်ႉသိုၵ်းမၢၼ်ႈၽဝ်ႁိူၼ်းၵူၼ်းဝၢၼ်ႈဝူဝ်းလူင် - ဢိူင်ႇၼွင်ၵႂၢင် ထုင်ႉပုင်ႇဝူဝ်း ၸႄႈဝဵင်းၵျွၵ်ႉမႄး ၼၼ်ႉၵေႃႈလႆႈႁၼ်ပႃးတူဝ်တၢႆၵူၼ်းမိူင်း 7 ၵေႃႉ ၵူၼ်းသိုၵ်း SSPP ၼိုင်ႈၵေႃႉ ။
ယွၼ်ႉသိုၵ်းမၢၼ်ႈ ႁႅၼ်းသိုၵ်းလေႃႇတိုၵ်း တပ်ႈသိုၵ်းၸိုင်ႈတႆး SSPP/SSA သေၵူၼ်းမိူင်းၼႂ်း ၸႄႈဝဵင်းၵျွၵ်ႉမႄး ၊ သီႇပေႃႉၼပ်ႉႁဵင်လႆႈပၢႆႈယၢၼ်ႁိူၼ်းယေးတီႈယူႇ ။