ဝၼ်းတီႈ 14/05/2016 ဢိင်ၼိူဝ်တပ်ႉသိုၵ်းလူင်ပွင်ၸိုင်ႈမၢၼ်ႈ ႁႅၼ်းသိုၵ်းလေႃႇတိုၵ်းတပ်ႉ သိုၵ်းၸိုင်ႈတႆး SSPP/SSA ပွတ်းပုင်ႇဝူဝ်း ၊ႁၢႆးၵုၺ်သေႁဵတ်းႁႂ်ႈၵူၼ်းမိူင်း 1. ဝၢၼ်ႈဢႅၵ်ႉၵျီး ၊ 2. ဝၢၼ်ႈၼမ်ႉသၢတ်ႇ ၊ 3. ဝၢၼ်ႈဝူဝ်းလူင် ၊ 4. ဝၢၼ်ႈပၢင်ၵႅၼ် ၊ 5. ဝၢၼ်ႈယေႇသၼ်ႇ ၊ 6. ဝၢၼ်ႈၼႃးပုင်ႇ ၊ 7. ဝၢၼ်ႈၼႃးပဵင်း ၊ 8. ဝၢၼ်ႈၵွင်းႁုင်းၸိူဝ်းၼႆႉႁူဝ်ၵူၼ်းၸမ်ႁဵင်ပၢႆလႆႈပၢႆႈယၢၼ်ႁိူၼ်းယေး ။
ၵူၼ်းၼႂ်းပိုၼ်ႉတီႈလၢတ်ႈဝႃႈ - “ ဢမ်ႇတွၼ်ႉၺႃးၽေးၸိူင်ႉၼႆသေပွၵ်ႈ လႄႈ ပဵၼ်ဢၼ်ၵူဝ်ၵူဝ်ႁႄ တႄႉတႄႉ ။ ယၢမ်းလဵဝ်မိူၼ်ဝၢၼ်ႈႁၢမ်းမိူင်းႁၢမ်းယဝ်ႉၵူၼ်းဝၢၼ်ႈၵေႃႈဢမ်ႇႁတ်းယူႇၼႂ်းဝၢၼ်ႈယဝ်ႉ ယွၼ်ႉဢမ်ႇတမ်းၸႂ်လွင်ႈလွတ်ႈၽေး လိူဝ်ၼၼ်ႉသိုၵ်းမၢၼ်ႈ ႁွင်ႉဢဝ်ၵူၼ်းလဵင်ႉဝူဝ်း 7 ၵေႃႉ ၼႄတၢင်းတေႃႇထိုင်ဝၼ်းတီႈ 15 တိုၵ်ႉပွႆႇမႃး 3 ၵေႃႉၵူၺ်း 4 ၵေႃႉၼၼ်ႉတႄႉ ပဵၼ်တၢႆႁၢႆႉလီၸိူင်ႉ ႁိုဝ်ဢမ်ႇႁူႉပေႃးပဵၼ်လႆႈၶႂ်ႈတုၵ်းယွၼ်းႁႂ်ႈၽူႈယႂ်ႇၵူၼ်းလူင်မႃးၸွႆႈတူၺ်းပၼ် သေၵမ်းၶႃႈ ” ဝႃႈၼႆ ။
သိုၵ်းလူင်ပွင်ၸိုင်ႈမၢၼ်ႈႁၢင်ႈသိုၵ်းလေႃႇတိုၵ်းတပ်ႉသိုၵ်းၸိုင်ႈတႆး SSPP/SSA တင်ႈတႄႇႁူဝ်လိူၼ် မေႊ သိုၵ်းမၢၼ်ႈဢဝ်ႁိူဝ်းမိၼ်တိုၵ်း သႅၼ်း MI 35 ပွႆႇမၢၵ်ႇသႂ်ႇၼႂ်းဝၢၼ်ႈ မိူၼ်ၼင်ႇ 1. ဝၢၼ်ႈ ၵိဝ်ႇပႃႇထုၼ် ၊ 2. ဝၢၼ်ႈၼမ်ႉသၢတ်ႇ ၊ 3. ဝၢၼ်ႈဝူဝ်းလူင် ၊ 4. ဝၢၼ်ႈပၢင်ၵႅၼ် ၊ 5. ဝၢၼ်ယေႇသၼ်ႇ ၊ 6. ဝၢၼ်ႈဢႅၵ်ႉၵျီး ၊ 7. ၼႃးတၢတ်ႇလႅင်ၸိူဝ်းၼႆႉ ၵူၼ်းဝၢၼ်ႈၵူၼ်မိူင်းၵူဝ်ႁႄဢမ်ႇႁတ်းယူႇလႄႈ လႆႈ ဢွၼ်ၵၼ်ပၢႆႈဢွၵ်ႇ ယၢၼ်ႁိူၼ်းၵႂႃႇသေႃႉယူႇတၢင်းဝၢၼ်ႈပၢင်ႇလေႃႉ ၊ ၼွင်ပိင်လူင် ၊ ႁူဝ်ၵိုတ်ႈ မၢင်ၸိူဝ်းၵေႃႈပၢႆႈၶဝ်ႈၼႂ်း ဝဵင်းၵျွၵ်ႉမႄးၸဵမ်ၸိူဝ်းၼႆႉ တင်းမူတ်းမီးၸမ်ႁဵင်ဝႃႈၼႆ ။