ၸုမ်းတူင်ႇဝူင်းတႆး 3 ၸုမ်း ႁူမ်ႈၵၼ်သေ တႅမ်ႈလိၵ်ႈသၢၼ်ၶတ်း တင်ႇထိုင်လူင်ပွင်ၸိုင်ႈမႂ်ႇ NLD ၵဵဝ်ႇၵပ်းၽႅၼ်ၵၢၼ် SN Power မိူင်းၼေႃႊဝူၺ်ႊ တေသၢင်ႈၾၢႆတႃႈလူင် ယႄးယႂႃႇတွၼ်ႈၵၢင် ၼိူဝ်မႄႈၼမ်ႉတူႈ။
ဝၼ်းတီႈ 26/05/2016 ၸုမ်းၵေႃႁူမ်ႈသၢင်ႈၸဝ်ႈႁႆႈၸဝ်ႈၼႃးၸိုင်ႈတႆး၊ ၸုမ်းသၽႃဝ သိင်ႇဝႅတ်ႉလွမ်ႉၸိုင်ႈတႆး လႄႈ ၸုမ်းၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆး ႁူမ်ႈၵၼ်သေ တႅမ်ႈလိၵ်ႈတင်ႇထိုင် လူင်ပွင်ၸိုင်ႈမႂ်ႇ တီႈၼၢင်းဢွင်ႇသၢၼ်းသုၵျီႇ ၽူႈၵိူဝ်းၵုမ်ၸိုင်ႈမိူင်းလႄႈ ၽွင်းလူင်ၾၢႆႇၼွၵ်ႈမိူင်း ၼေႇပျီႇတေႃႇ လွင်ႈၸုမ်း SN Power မိူင်းၼေႃႊဝူၺ်ႊ တေသၢင်ႈ ၾၢႆႇတႃႈလူင်(ၾၢႆယႄးယႂႃႇတွၼ်ႈၵၢင်) ၼိူဝ်မႄႈၼမ်ႉတူႈ ၸိုင်ႈတႆး ပွတ်းႁွင်ႇ ၼႆယဝ်ႉ။
ၸၢႆးၶိုၼ်းမႂ်ႇ ၸုမ်းၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆး လၢတ်ႈဝႃႈ “ ယိူင်းဢၢၼ်းႁဝ်းၶႃႈ လႆႈတင်ႇလိၵ်ႈထိုင်လူင်ပွင်ၸိုင်ႈၼႆႉ ၵွပ်ႈပိူဝ်ႈဝႃႈ ၵူၼ်းဝၢၼ်ႈတႃႈလူင် ၵူၼ်းၸိူဝ်းဢၼ်ယူႇသဝ်းၸွမ်းသၢပ်ႇၼမ်ႉတူႈၼၼ်ႉ ၶဝ်ႈဢမ်ႇၶႂ်ႈပၼ်ႁဵတ်းၾၢႆ ပေႃးႁဵတ်းၾၢႆၼႆၸိုင် ၼမ်ႉတေထူမ်ႈ ႁိူၼ်းယေး/သူၼ်/ၼႃး ၵူၼ်းဝၢၼ်ႈ ၵွပ်ႈၼႆလႄႈ ၸုမ်းႁဝ်းၶႃႈ လၢႆလၢႆၸုမ်း ႁူမ်ႈၵၼ်သေ ၸင်ႇလႆႈတႅမ်ႈလိၵ်ႈတင်ႇထိုင်ၵႂႃႇ” ဝႃႈၼႆ။
သင်ဝႃႈ ၵေႃႇသၢင်ႈၾၢႆယႄးယႂႃႇယဝ်ႉၵႂႃႇၸိုင် လိၼ်တီႈၶူင်ႈတီႈယၢၼ်း ဝၢၼ်ႈႁိမ်းႁွမ်း သၢပ်ႇၼမ်ႉတူႈလႄႈ တေၺႃးၼမ်ႉထူမ်ႈ တေတူၵ်းၵႂႃႇတႂ်ႈၼမ်ႉမူတ်း၊ ႁႅင်းၾႆးဢၼ်တေဢွၵ်ႇသမ်ႉ တေမီး 700 မီႊၵႃႊဝတ်ႊ ၵူၼ်းမိူင်းတေလႆႈၸႂ်ႉဢမ်ႇလႆႈၸႂ်ႉ ယင်းဢမ်ႇႁူႉ ဝႃႈၼႆ။
ၸၢႆးၶိူဝ်းသႅင် ၸုမ်းသၽႃဝ သိင်ႇဝႅတ်ႉလွမ်ႉၸိုင်ႈတႆး လၢတ်ႈဝႃႈ “ ယူႇတီႈႁဝ်းသေ လႆႈၵႂႃႇလဵပ်ႈႁဵၼ်းတူၺ်းမႃးၼႂ်းပိုၼ်ႉတီႈတႄႉ ဝၢၼ်ႈၸိူဝ်းယူႇသဝ်းႁိမ်းၾၢႆၼၼ်ႉ တေထုၵ်ႇၼမ်ႉထူမ်ႈမူတ်း။ ထႅင်ႈဢၼ်ၼိုင်ႈၵေႃႈ ၵူၼ်းတေသၢင်ႈၾၢႆၶဝ်ၼၼ်ႉ တေမီးလွၵ်းလၢႆးဝၢင်းၽႅၼ်(ထိၵ်ႉၼိၵ်ႇ)ၶဝ် မၼ်းတေထူမ်ႈၵႃႈႁိုဝ် ၵူၼ်းတေလႆႈလုသုမ်းၵႃႈႁိုဝ် သူၼ်တေလႆႈလုသုမ်းၵႃႈႁိုဝ် ၶဝ်တေဢမ်ႇလႆႈၼပ်ႉ(တွၵ်ႈ)ဝႆႉ၊ သင်ဝႃႈၶဝ် ၼပ်ႉ(တွၵ်ႈ)ဝႆႉယူႇၸိုင် ၼႂ်းမိုဝ်းၶဝ်တေမီးဝႆႉယူႇ ၶဝ်ဢမ်ႇလၢတ်ႈဢွၵ်ႇလွင်ႈတႄႉဝႃႈ တေတုမ်ႉတိူဝ်ႉၵႃႈႁိုဝ် ဢၼ်ဝႃႈၼၼ်ႉ” ဝႃႈၼႆ။
ၵဵဝ်ႇၵပ်းလူၺ်ႈ လွင်ႈတေသၢင်ႈၾၢႆၼိူဝ်မႄႈၼမ်ႉတူႈၼႆႉ တင်းမူတ်း တေမီး 5 တီႈ - 1. ၾၢႆၻွီးတူၵ်ႉ ၵျွၵ်ႉသႄႇ၊ 2. ၾၢႆယႄးယႂႃႇ ၵျွၵ်ႉသႄႉ၊ 3. ၾၢႆယႄးယႂႃႇ(ၵၢင်) ၼွင်ႉၶဵဝ်၊ 4. ၾၢႆယႄးယႂႃႇ(ၼိူဝ်) ၵျွၵ်ႉမႄး၊ 5. ၾၢႆၼမ်ႉတူႈ(ၾၢႆလီလု) သီႇပေႃႉ ၸဵမ်ၸိူဝ်းၼႆႉ။
ၾၢႆယႄးယႂႃႇ(ၼိူဝ်) တေမီးႁိမ်းဝၢၼ်ႈတႃႈလူင် လင်ႁိူၼ်း မီး 118 လင်၊ ႁူဝ်ၵူၼ်း မီး 472 ၵေႃႉ၊ သူၼ်မၢၵ်ႇသူမ်ႈ တင်းမူတ်း မီး 68 ဢေႊၵိူဝ်ႊ၊ တိူၵ်ႈလိၼ်သူၼ်ႁႆႈၼႃး မီး 96 ဢေႊၵိူဝ်ႊ ၸဵမ်ၸိူဝ်းၼႆႉ ၸူမ်တႂ်ႈၼမ်ႉမူတ်း ဝႃႈၼႆ။