ပလိၵ်ႈလႃႈသဵဝ်ႈ ႁူမ်ႈမိုဝ်းၵူၼ်းမိူင်း ၽဵဝ်ႈပၢင်ယႃႈမဝ်းၵမ် ၼႂ်းၸႄႈဝဵင်းလႃႈသဵဝ်ႈ

တပ်ႉပလိၵ်ႈလႃႈသဵဝ်ႈ ႁုမ်ႈမိုဝ်းၵၼ်တင်းၵူၼ်းမိူင်း ၵႂႃႇၽဵဝ်ႈပၢင်ယႃႈမဝ်းၵမ် တီႈႁိမ်းဝၢၼ်ႈႁၢတ်ႇၵႃ ၸႄႈဝဵင်းလႃႈသဵဝ်ႈ ၊ တီႉၺွပ်းလႆႈယႃႈမဝ်းၵမ် တင်းၶိူင်ႈယိပ်းၵေႃႇၵၢၼ်ႁၢႆႉ လႄႈၶိူင်ႈၸႂ်ႉတိုဝ်း ၼႂ်းၵၢၼ်ၵိၼ်ယႃႈတင်းၼမ် ။


ဝၼ်းတီႈ 04/05/2016 (မိူဝ်ႈဝႃး) တပ်ႉပလိၵ်ႈလႃႈသဵဝ်ႈ ႁုမ်ႈမိုဝ်းၵၼ်တင်းၵူၼ်းမိူင်း ၵႂႃႇၽဵဝ်ႈပၢင်ၵိၼ်ယႃႈမဝ်းၵမ် ဢၼ်မီးတီႈႁိမ်း ဝၢၼ်ႈႁၢတ်ႇၵႃ ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ။ တီႈပၢင်ၵိၼ်ယႃႈၼၼ်ႉ လႆႈႁၼ်သုမ်ႉတွပ်းဢွၼ်ႇလၢႆလင်တင်းၼမ် ၊ တီႉၺွပ်းလႆႈၵူၼ်း 46 ၵေႃႉ ၊ ၼႂ်းၼၼ်ႉၵူၼ်းၸၢႆး 45 ၵေႃႉ ၊ ၼၢင်းယိင်း 1 ၵေႃႉ ၊  ၵမ်ႈၼမ်ပဵၼ်ၸၢဝ်းၶိူဝ်းၶႄႇ ။ ၸဝ်ႈၼႃႈတီႈၶဝ် တီႉလႆႈတင်းၶိူင်ႈမိုဝ်းၵေႃႇၵၢၼ်ႁၢႆႉ မိူၼ်ၼင်ႇမိတ်ႈ ၽႃႉလႄႈၶိူင်ႈၸႂ်ႉတိုဝ်း ၼႂ်းၵၢၼ်ၵိၼ်ယႃႈတင်းၼမ် ။ လႆႈၽဝ်ပႅတ်ႈပႃး သုမ်ႉတွပ်းပၢင်ၵိၼ်ယႃႈၸိူဝ်းၼၼ်ႉ ။

-ၶူဝ်းၶွင်ၵၢင် ယႃႈမဝ်းၵမ် ဢိၵ်ႇတင်း မိတ်ႈ / ၽႃႉတင်း
 ၶူဝ်းၸႂ်ႉတိုဝ်းၵိၼ်သူႇယႃႈမဝ်းၵမ် ၸိူဝ်းတီႉၺွပ်းလႆႈ (Photo: Lashio News)

ယႃႈမဝ်းၵမ် တင်းၵူၼ်းၸိူဝ်းၵိၼ်သူႇယႃႈမဝ်းၵမ်
 ၸိူဝ်းထုၵ်ႇတီႉၺွပ်းလႆႈ (Photo: Lashio News)

ၸဝ်ႈၼႃႈတီႈၶဝ် ၽဝ်ပႅတ်ႈသုမ်ႉတွပ်း ဢွင်ႈတီႈသူႇၵိၼ်ယႃႈမဝ်းၵမ်

ပလိၵ်ႈၵေႃႉၼိုင်ႈ ဢၼ်ပႃးၼႂ်းၵၢၼ်တီႉၺွပ်းယႃႈၼၼ်ႉ လၢတ်ႈဝႃႈ - ပၼ်ႁႃယႃႈမဝ်းၵမ် တီႈတၢင်းလႃႈသဵဝ်ႈၼႆႉ ႁၢဝ်ႈႁႅင်းတႄႉတႄႉ ။ ၵူၼ်းၵိၼ်ယႃႈၸိူဝ်းၼႆႉ ၵႂႃႇၵေႃႇၵၢၼ်ႁၢႆႉထိုင်ၼႂ်းဝဵင်း လႃႈသဵဝ်ႈ ၊ ဢၼ်ႁဝ်းၶႃႈမႃးၽဵဝ်ႈယႃႈၼႆႉ သုမ်ႉတွပ်းၵိၼ်ယႃႈၼမ်ဝႃႈၼမ် ၊ လႆႈၽဝ်ပႅတ်ႈသေ တီႉလႆႈပႃးလႅဝ်း / ၵွင်ႈ ၊ ယႃႈၸိူဝ်းၼႆႉၵေႃႈတီႉလႆႈ တင်းၼမ်တင်းလၢႆ - ဝႃႈၼႆ ။


ၵူၺ်းၵႃႈ တေႃႇထိုင်ၵၢင်ၶမ်ႈမိူဝ်ႈဝႃး 8 မူင်း ယင်းပႆႇလႆႈႁူႉဝႃႈ - ယႃႈမဝ်းၵမ်တင်းမူတ်း ဢၼ်တီႉၺွပ်းလႆႈ မီးၵႃႈႁိုဝ် ။


ၸၢႆးမိၼ်းမိၼ်း ၵူၼ်းလႃႈသဵဝ်ႈလၢတ်ႈဝႃႈ - တီႈလႃႈသဵဝ်ႈၼႆႉ ၼႂ်းပီၼႆႉ ၵႂႃႇမႃးဢမ်ႇလွတ်ႈလႅဝ်း မိူၼ်ၵူႈပွၵ်ႈယဝ်ႉ ။ ၵႂႃႇတၢင်းလႂ်ၵေႃႈလႆႈၵူဝ် ၊ မီးလွင်ႈၾၼ်းၵၼ် ၊ ႁိမ်ၵၼ်ၸူၼ်ၵၼ် ။ ၵၢၼ်ၵေႃႇၵၢၼ်ႁၢႆႉ ၸိူင်ႉၼႆၼႆႉ ပဵၼ်ၵူၼ်းၵိၼ်ယႃႈမဝ်းယႃႈၶဝ်ႁဵတ်းလၢႆလၢႆ ။ ၸဝ်ႈၼႃႈတီႈၶဝ်ၵေႃႈ တင်ႈလၢၼ်ႇ (ၵဵတ်ႉ) ၵူတ်ႇထတ်းယူႇၵူႈၶမ်ႈ ။ ဢၼ်မႆႈၸႂ်လိူဝ်ပိူၼ်ႈတႄႉ ပဵၼ်ၵူၼ်းၸိူဝ်းမီးလုၵ်ႈလၢင်း ပဵၼ်လုၵ်ႈၸၢႆးၸိူဝ်းၼၼ်ႉ ။ ပေႃးဝႃႈထိုင်ၵၢင်ၶမ်းမႃး ၶဝ်မႆႈၸႂ် ၊ ၵူဝ်လုၵ်ႈၸၢႆးၶဝ်ဢွၵ်ႇၼွၵ်ႈႁိူၼ်း ၊ ပေႃးၵႂႃႇၵေႃႈ မီးပၼ်ႁႃၽိတ်းၵၼ် ၾၼ်းၵၼ်မႃးတႃႇသေႇ - ဝႃႈၼႆ ။


ၼၢင်းသႅင် ၵူၼ်းလႃႈသဵဝ်ႈ ၵေႃႈလၢတ်ႈထႅင်ႈဝႃႈ - ယႃႈၵေႃႈလိူင်ႇတႄႉယဝ်ႉ၊ သိုဝ်ႉလႆႈၵူႈတီႈ ။ ၵူၼ်းလဵင်ႉဝူဝ်း ဢႃႇယု 12-13 ၵူၺ်းၵေႃႈ ပေႃးၵိၼ်ယႃႈမႃႉယဝ်ႉ ၊ ဢၼ်ႁိမ်ၵၼ်ၸူၼ်ၵၼ်ၵေႃႈမီးၼမ် ။ ပေႃးဝႃႈၵၢင်ၶမ်ႈမႃး ပိတ်းဢိုတ်းၽၵ်းတူသေ ယူႇၼႂ်းႁိူၼ်းတိၵ်းတိၵ်းၵူၺ်း ၊ ဢမ်ႇႁတ်းဢွၵ်ႇၼွၵ်ႈႁိူၼ်းယဝ်ႉ ။ ယႃႈမႃႉၼႆႉသိုဝ်ႉငၢႆႈ ၊ ဢၼ်ၶဝ်ႁုမ်သူင်ၵၼ်ၵိၼ်တီႈလႃႈသဵဝ်ႈၼႆႉ ပဵၼ်ယႃႈမႃႉ ဢၼ်ၵႃႈၶၼ် ၼိုင်ႈမဵတ်ႉၼိုင်ႈႁဵင် ။ ယႃႈဢႆႊသမ်ႉ မဵတ်ႉသၢမ်ႁဵင် - ဝႃႈၼႆ ။


တီႈလႃႈသဵဝ်ႈၼႆႉ ၵူၼ်းၵိၼ်ယႃႈလိူင်ႇၼမ်မႃးသေ တင်ႈတႄႇႁၢင်လိူၼ်ဢေႊပရိူဝ်ႊလ် (2016)မႃးၼႆႉ ပေႃးထိုင်ၵၢင်ၶမ်ႈမႃး ၵူၼ်းမဝ်းယႃႈၶဝ် ဢႅဝ်ႇလမ်းၾၼ်းၵူၼ်းၵႂႃႇၵူၼ်းမႃး ၼိူဝ်သဵၼ်ႈတႃႈသၢႆတၢင်း ။ လိုပ်ႈလမ်းၾၼ်းလႄႈ ထိုင်ပေႃးလႆႈၵႂႃႇၶဝ်ႈႁူင်းယႃ ဢမ်ႇယွမ်း 5 ၵေႃႉယဝ်ႉ ။


မိူဝ်ႈဝၼ်းတီႈ 03/05/2016 ၼၼ်ႉ ပလိၵ်ႈလႃႈသဵဝ်ႈၵေႃႈ ပိုၼ်ၽၢဝ်ႇဢွၵ်ႇမႃးဝႃႈ - တီႉၺွပ်းလႆႈ ၵူၼ်းဢၼ်ဢဝ်လႅဝ်းသေၵေႃႇၵၢၼ်ႁၢႆႉ လမ်းၾၼ်းၵူၼ်းမိူင်း ၼႂ်းဝဵင်းလႃႈသဵဝ်ႈယဝ်ႉ ၊ ၵမ်ႈၼမ်ပဵၼ်ၵူၼ်းပွၵ်ႉ 12 ၊ ပဵၼ်လုၵ်ႈဢွၼ်ႇၸၢဝ်းၶႄႇ ၊ ၵိၼ်ယႃႈမႃႉသေ မဝ်းယႃႈဝႆႉ ၊ တီႉၺွပ်းဝႆႉယဝ်ႉ - ဝႃႈၼႆ။