 |
| ၵၢၼ်တူင်ႉၼိုင်ၵၢၼ်သိုၵ်း ၼႂ်းပၢင်ၵႅဝ်ႈဝၼ်းၵိူတ်ႇ SSPP/SSA ၶွပ်ႈၶူပ်ႇ 52 ပီ တီႈငဝ်ႈငုၼ်းဝၢၼ်ႈႁႆး |
ၵဵဝ်ႇၵပ်းလွင်ႈၼႆႉ ၽူႈမီးပုၼ်ႈၽွၼ်းတီႈငဝ်ႈငုၼ်း SSPP/SSA ၸဝ်ႈၼိုင်ႈလၢတ်ႈဝႃႈ- ပိူဝ်ႈတႃႇတေၵူတ်ႇထတ်း ၼႂ်းပိုၼ်ႉတီႈၼႆႉ ႁဝ်းၶႃႈလႆႈၸႂ်ၵၼ်ဝႆႉ တေႁူမ်ႈၵၼ်ၵူတ်ႇထတ်းဝၼ်းတီႈ 12 ၊ မိူဝ်ႈလဵဝ်ၼႆႉ တီႈငဝ်ႈငုၼ်း ႁဝ်းၶႃႈႁဵတ်းပၢင်ၵုမ်ၵၼ်ဝႆႉ လွင်ႈဝႃႈၽႂ်တေဢွၼ်ႁူဝ်သေ ၵႂႃႇႁူမ်ႈၶဝ်ၵူတ်ႇထတ်း။ ၾၢႆႇသိုၵ်းမၢၼ်ႈတႄႉ လႆႈႁူႉဝႃႈပဵၼ်ပိဝ်ႇႁႃႇမူး (ၽူႈၵွၼ်းၽႅၼ်ၵၢၼ်လၢႆးတိုၵ်း) တၢင်ႉယၢၼ်း၊ ၸဝ်ႈသိုၵ်းလူင်ဝူၺ်ႇလိၼ်း- ဝႃႈၼႆ။
ၽူႈၵွၼ်းသိုၵ်း ဢၼ်ယူႇၼႂ်းပိုၼ်ႉတီႈၼႃႈသိုၵ်း ၸဝ်ႈၼိုင်ႈၵေႃႈလၢတ်ႈဝႃႈ- ဢၼ်မႃးၵူတ်ႇထတ်းၼႂ်းပိုၼ်ႉတီႈ ဢၼ်ဝႃႈၼၼ်ႉ မိူဝ်ႈၵမ်းပူၼ်ႉၼၼ်ႉ ပေႃးၶဝ်တေမႃးၵူတ်ႇထတ်းၼႆ ႁႂ်ႈထူမ်ပၼ်လုၵ်းထႅၼ်ႉလုၵ်းပဵမ်ႇ၊ ႁႂ်ႈယႃႉပႅတ်ႈသုမ်ႉသွင်း တီႈယူႇတၼ်းသဝ်းၸိူဝ်းၼႆႉ ဢမ်ႇပဵၼ်လႆႈ။ ပေႃးဝႃႈႁႂ်ႈႁဵတ်းၸိူင်ႉၼၼ်တႄႉ မၼ်းပဵၼ်ၵၢၼ်လူလၢႆၵၼ်ၵူၺ်း၊ ႁဝ်းဢမ်ႇၽွမ်ႉၸွမ်းလႆႈ- ဝႃႈၼႆ။
ၵဵဝ်ႇၵပ်းလွင်ႈၼႆႉ ၽူႈၸမ်ၸႂ်လုမ်းတိူင်းသိုၵ်းမၢၼ်ႈ လႃႈသဵဝ်ႈ ၵေႃႉၼိုင်ႈလၢတ်ႈဝႃႈ- ၾၢႆႇသိုၵ်းမၢၼ်ႈၼႆႉ ဢမ်ႇၶႂ်ႈပဵၼ်ပၢင်တိုၵ်းသိုၵ်းသိူဝ်၊ ဢမ်ႇၶႂ်ႈလူႉၶႂ်ႈသုမ်းသေ ၶႂ်ႈလႆႈတီႈယူႇလၢႆလၢႆ၊ မိူၼ်ၼင်ႇၶႂ်ႈမႃးပၵ်းတပ်ႉ ၼႂ်းၵႄႈ SSPP/SSA ပွတ်းလွႆၸေးလွႆလၢၼ်း၊ လွႆတီႈလႂ်သုင်ၵေႃႈ ၶဝ်ၶႂ်ႈမႃးယွၼ်းယူႇ၊ တေပဵၼ်ၸၼ်ႉၸိူင်ႉၼၼ်- ဝႃႈၼႆ။
ဢွၼ်ၼႃႈၼႆႉ ၽူႈၵွၼ်းတိူင်းသိုၵ်းၸဵင်ႇႁွင်ႇဝၼ်းဢွၵ်ႇ (လႃႈသဵဝ်ႈ) တတ်းမၵ်းဝႆႉဝႃႈ လိူၼ်ဢေႊပရိူဝ်ႊလ် ဝၼ်းတီႈ 22 ပဵၼ်ဝၼ်းလိုၼ်းသုတ်း၊ ႁႂ်ႈတပ်ႉ SSPP/SSA ထွၼ်ဢွၵ်ႇပွတ်းလွႆၸေး လွႆလၢၼ်း၊ ၼႂ်းၸႄႈဝဵင်းတၢင်ႉယၢၼ်း။
မိူဝ်ႈၽွင်းၼၼ်ႉ SSPP/SSA ဢမ်ႇယွမ်းႁပ်ႉသေ ၼႂ်းဝၼ်းတီႈ 22/04/2016 ၼၼ်ႉ ၽူႈၵွၼ်းတိူင်းသိုၵ်း လႃႈသဵဝ်ႈ ၶိုၼ်းႁွင်ႉထူပ်း ၽူႈမီးပုၼ်ႈၽွၼ်း SSPP/SSA တီႈလႃႈသဵဝ်ႈသေ လၢတ်ႈဝႃႈ- ဝၼ်းတီႈ 27/04/2016 ႁႂ်ႈႁူမ်ႈၵၼ်ၵႂႃႇၵူတ်ႇထတ်းတပ်ႉ ၼႂ်းပိုၼ်ႉတီႈလွႆၸေးလွႆလၢၼ်း၊ ၵူၺ်းၵႃႈဢမ်ႇပဵၼ်။ ထိုင်ဝၼ်းဝၼ်းတီႈ 30/04/2016 သွင်ၾၢႆႇႁူပ်ႉဢုပ်ႇၵၼ် ထႅင်ႈတီႈဝဵင်းလႃႈသဵဝ်ႈသေ ၸင်ႇလႆႈၸႂ်ၵၼ်ဝႃႈ- ဝၼ်းတီႈ 12 ၼႆႉ တေႁူမ်ႈၵၼ်ၵႂႃႇၵူတ်ႇထတ်းၼႂ်းပိုၼ်ႉတီႈ- ၼႆယဝ်ႉ။
ပူၼ်ႉမႃးမိူဝ်ႈပီ 2014 မိူဝ်ႈသိုၵ်းမၢၼ်ႈ ၶႂ်ႈလႆႈတပ်ႉတႃႈၽႃသွင်ႇ။ မိူဝ်ႈပီ 2015 မိူဝ်ႈသိုၵ်းမၢၼ်ႈၶႂ်ႈလႆႈ တပ်ႉတႃႈသၢမ်ပူးၸိူဝ်းၼၼ်ႉၵေႃႈ ၾၢႆႇတပ်ႉသိုၵ်းမၢၼ်ႈ ယၢမ်ႈၸႂ်ႉလၢႆးၼႆႉႁဵတ်းမႃး။ ဝၢႆးမႃးပဵၼ်ပၢင်တိုၵ်း ၵၼ်သေ ၾၢႆႇသိုၵ်းမၢၼ်ႈယိုတ်းဢဝ်ၵႂႃႇ တပ်ႉတႃႈၽႃသွင်ႇ၊ တပ်ႉတႃႈသၢမ်ပူး။
ပႃႊတီႊမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး (SSPP/SSA) ၼႆႉ ပဵၼ်ၸုမ်းဢၼ်ပႆႇတူဝ်ႈတၼ်း လူင်းလၢႆးမိုဝ်း ၵၢၼ်ၵိုတ်းယိုဝ်းတူဝ်ႈမိူင်း (NCA) ၼႆႉသေတႃႉ ၶဝ်ႈပႃးၶဵၼ်ႇတႅမ်ႈလိၵ်ႈၵိၼ်ၵႅၼ်ႇ NCA ဝႆႉ။ ၾၢႆႇၼိုင်ႈၵေႃႈ လူင်းလၢႆးမိုဝ်းၵိုတ်းယိုဝ်း ၸၼ်ႉၸႄႈမိူင်းလႄႈ ၸၼ်ႉၸိုင်ႈမိူင်းႁူမ်ႈတုမ် ၵေႃႇသၢင်ႈလွင်ႈငမ်းယဵၼ် ၸွမ်းလူင်ပွင်ၸိုင်ႈတဵင်းၸဵင်ႇ မိူဝ်ႈႁူဝ်ပီ 2012 ။