ဝၼ်းတီႈ 01/05/2016 ၸုမ်းၵူၼ်းၼုမ်ႇလၢႆးၶႃႈ လႄႈပီႈၼွင်ႉၵူၼ်းမိူင်း ၼႂ်းပိုၼ်ႉတီႈမီးၵူၼ်း 50 ပၢႆ ၊ ႁူမ်ႈၵၼ်ၵဵပ်းယုၵ်းယၢၵ်းႁူဝ်ဝဵင်းတေႃႇထိုင်ႁၢင်ဝဵင်း ၸွမ်းၵၢတ်ႇ လႄႈ ၵေးၼမ်ႉၸိူဝ်းၼႆႉ ။
မီးယိူင်းဢၢၼ်းလူင် တႃႇၵႅတ်ႇၶႄႁႄႉၵင်ႈလိၼ်မႄႈမိူင်း ၊ တႃႇလူတ်းယွမ်းၶူဝ်းၶွင်ဢၼ်ပဵၼ်ၽေးၶဵၼ် တေႃႇသိင်ႇဝႅတ်ႉလွမ်ႉ ၊ တႃႇၸွႆႈထႅမ်လုမ်ႈၾႃႉႁႂ်ႈလီယူႇသဝ်း ၊ တႃႇၸွႆႈထႅမ်ပၼ်ဢူၺ်းၵေႃႉသတ်းတဝႃႇ ၸိူဝ်းယူႇၼႂ်းလူၵ်ႈလုမ်ႈၾႃႉတင်းသဵင်ႈ ၊ တႃႇတေၶဝ်ႈၸႂ်လွင်ႈၽွၼ်းၸႃႉပရတ်ႉသတိၵ်ႉ ၸဵမ်ၸိူဝ်းၼႆႉ ။
ၸၢႆးလၢဝ်ၶိူဝ်း ၵူၼ်းၼုမ်ႇဝဵင်းလၢႆးၶႃႈလၢတ်ႈဝႃႈ - “ ၶႂ်ႈႁႂ်ႈမေႃဢဝ်ပုၼ်ႈၽွၼ်းၸဝ်ႈၵဝ်ႇႁႂ်ႈမေႃပႅတ်ႈ ယုၵ်းယၢၵ်းမႅၼ်ႈတီႈမၼ်းၼၼ်ႉ ” ဝႃႈၼႆ ။
“ ဢၼ်ႁဵတ်းလွင်ႈမူတ်းသႂ် ၵဵပ်းယုၵ်းယၢၵ်းၼႆႉ ဢမ်ႇၸႅၵ်ႇၽႄၸၢဝ်းၶိူဝ်း ၊ ဢမ်ႇဝႃႈၵူၼ်းၼုမ်ႇၼႂ်း ဝဵင်းလၢႆးၶႃႈၵူၺ်း ၊ ႁဝ်းၵူႈၵေႃႉထုၵ်ႇလႆႈႁူမ်ႈၵၼ်ႁဵတ်းသၢင်ႈၵႂႃႇ ၊ ယွၼ်ႉပိူဝ်ႈတေႃႈလဵဝ်ၼႆႉယုၵ်း ယၢၵ်းၼမ်လိူဝ်ပူၼ်ႉတီႈလႄႈ ၶႂ်ႈတိုၵ်းသူၼ်းထိုင်ပႃးၵူၼ်းၼုမ်ႇၵူႈတီႈ ႁႂ်ႈဢွၼ်ႇၵၼ်ႁဵတ်းလွင်ႈ လိူမ်ႈလႆႇ ဝၢၼ်ႈၽႂ်ဝဵင်းမၼ်းၼင်ႇႁိုဝ်ၼႂ်းတူင်ႇဝူင်း ဢၼ်ႁဝ်းယူႇသဝ်းၼၼ်ႉ တေမူတ်းသႂ် လႄႈ တေလႆႈၼမ်ႉဢၼ်ၸိုၼ်ႈသႂ် ၼႆ ”-ၸၢႆးလႅင်းႁိူင်း ႁူဝ်ၼႃႈၵူၼ်း ၼုမ်ႇဝဵင်းလၢႆၶႃႈယၢမ်ႈလၢတ်ႈ တီႈၸုမ်းၶၢဝ်ႇၽူႈတွႆႇႁွၵ်ႇၼင်ႇၼႆ ။
ၶူင်းၵၢၼ်ႁၵ်ႉသႃလိၼ်မႄႈမိူင်း Save The Mother Earth ၼႆႉ ၸဝ်ႈၶူးလူင် Dr ၶမ်းမၢႆထမ်မသႃမိ တႄႇဢွၼ်ႁူဝ်ႁဵတ်းသၢင်ႈမႃးသေလႄႈ ၶႂ်ႈႁႂ်ႈပေႃႈမႄႈၵူၼ်းမိူင်းၶဝ်ႈၸႂ်လွင်ႈၽွၼ်းႁၢႆႉၸႃႉ ထူင်ယၢင် ပလၢတ်ႉသတိၵ်ႉ ၊ ၸွႆႈၵၼ်ၵဵပ်းယုၵ်းယၢၵ်းပဵၼ်တီႈပဵၼ်တၢင်း ၊ၼင်ႇႁိုဝ်ၼႃႈဝၢၼ်ႈတႃသူၼ် ဝၢၼ်ႈဝဵင်း ၊ သၽႃႇဝ သိင်ႇဝႅတ်ႉလွမ်ႉပေႃးတေႁၢင်ႈလီ ၵႂႃမိူဝ်းၼႃႈၶၢဝ်းယၢဝ်းၼႆယဝ်ႉ ။