ဝၼ်းတီႈ 23/05/2016 ယၢမ်း 09:30 မူင်း ၵေႃလိၵ်ႈလၢႆးလႄႈ ၾိင်ႈငႄႈတႆး တူၼ်ႈတီး ဢွၼ်ႁူဝ်ၸတ်းႁဵတ်း ပွႆးလူင်းပၢင်သွၼ် လိၵ်ႈတႆးလႄႈ တွၼ်ႈသူးရၢင်းဝလ်း လုၵ်ႈႁဵၼ်းၸိူဝ်ႉၵတ်ႉၶႅၼ်ႇ ဢွင်ႇပူၼ်ႉၸၼ်ႉ တင်းမူတ်းမီး 15 ၵေႃႉ တီႈႁူင်းႁေႃ ၵေႃလိၵ်ႈလၢႆႈလႄးၾိင်ႈငႄႈတႆး တူၼ်ႈတီး ၸိုင်ႈတႆး ပွတ်းၸၢၼ်း ၼႆယဝ်ႉ ။
ၶူးၸၢႆးၺုဝ်ႇ (သႅင်ၶမ်းသႃႇ) ၽူႈၼမ်း ၵေႃလိၵ်ႈလၢႆးလႄႈ ၾိင်ႈငႄႈတႆး တူၼ်ႈတီး မွၵ်ႇလၢတ်ႈၶေႃႈၵႂၢမ်းတိုၵ်းသူၼ်း ဝႃႈ “ ပေႃးမႃးတူၺ်း ၵူၼ်းၶိူဝ်းတႆးႁဝ်းၵေႃႈၼမ်ယူႇ ၊ ၵူၺ်းၵႃႈ တႄႇဢဝ်မုင်ႉႁေႃႁိူၼ်းၸဝ်ႈၵဝ်ႇၵႂႃႇသေ ၸဵမ်ပေႃႈမႄႈဢမ်ႇပေႃးသူၼ်ၸႂ်ႉ ၵႂၢမ်းတႆး လႄႈ လုၵ်ႈလၢင်းၵေႃႈ ဢမ်ႇမေႃၵႂၢမ်းတႆးယဝ်ႉ ၼႂ်းတူၼ်ႈတီးၼႆႉ မၼ်းမီးမႃးၼမ်ၼႃႇ ယွၼ်ႉပိူဝ်ႈၼၼ် တုၵ်းသူၼ်းပၼ် လုၵ်ႈဢွၼ်ႇၸိူဝ်းမႃးပီၼႆႉ ၵႂၢမ်းတႆးၵေႃႈ ႁႂ်ႈမေႃလၢတ်ႈလီလီ လိၵ်ႈတႆးၵေႃႈ ႁႂ်ႈၶဝ်မေႃလီလီ မိူဝ်ႈၼႃႈမႃးၵေႃႈ ႁႂ်ႈၶဝ်ၶတ်းၸႂ် ႁႂ်ႈၶဝ်သိုပ်ႇမႃးႁဵၼ်းႁူႉထႅင်ႈ ” ဝႃႈၼႆ ။
ပွႆးလူင်းပၢင်သွၼ်ၼႆႉ တေမီးၽူႈယႂ်ႇၵူၼ်းလူင် မွၵ်ႇလၢတ်ႈၶေႃႈၵႂၢမ်းတိုၵ်းသူၼ်းထိုင်လုၵ်ႈႁဵၼ်း ၸိူဝ်းမႃးၶိုၼ်ႈႁဵၼ်း ပၢင်သွၼ်လိၵ်ႈတႆး ၶၢဝ်းမႆႈ မိူၼ် ၶူးၸၢႆးဢွင်ႇတၢၼ်း ႁူဝ်ၼႃႈ ၾၢႆႇပၢႆးပၺ်ၺႃ ၊ ပႃႈမျႃႉဝတီႇ ၵႅမ်ႁူဝ်ပဝ်ႈ လႄႈ ဢိၵ်ႇလူၺ်ႈ ၽူႈယႂ်ႇၵူၼ်းလူင် ထႅင်ႈလၢႆလၢႆၵေႃႉ ၼႆယဝ်ႉ ။
ပွႆးလူင်းပၢင်ၼႆႉ တွၼ်ႈသူးရၢင်းဝလ်းပၼ် ၸိူဝ်းလုၵ်ႈႁဵၼ်း ၵတ်ႉၶႅၼ်ႇ လႆႈရၢင်းဝၼ်းသူးၵတ်ႉၶႅၼ်ႇမၢႆ 1-2-3 လႄႈ လုၵ်ႈႁဵၼ်းၸိူဝ်းဢွင်ႇပူၼ်ႉၸၼ်ႉ တင်းမူတ်း မီး 15 ၵေႃႉ ၼႆယဝ်ႉ ။
ၼၢင်းၼူၼ်းမူဝ် ၽူႈပွင်ၵၢၼ်ၵေႃလိၵ်ႈလၢႆလႄးၾိင်ႈငႄႈတႆး လၢတ်ႈဝႃႈ “ ယူႇတီႈၵေႃလိၵ်ႈလၢႆးႁဝ်းၶႃႈသေ လႆႈတွၼ်ႈသူးပၼ် လုၵ်ႈႁဵၼ်းၵတ်ႉၶႅၼ်ႇမၢႆၼိုင်ႈ တွၼ်ႈသူးငိုၼ်း 15000 ပျႃးလႄႈပပ်ႉတႅမ်ႈ ၊ မၢႆသွင် တွၼ်ႈသူးငိုၼ်း 13000 ပျႃးလႄႈ ပပ်ႉတႅမ်ႈ ၊ မၢႆသၢမ်သမ်ႉ 10000 ပျႃး လႄႈ ပပ်ႉတႅမ်ႈလႄႈ လုၵ်ႈႁဵၼ်းၸိူဝ်းဢွင်ႇပူၼ်ႉၸၼ်ႉသမ်ႉ လႆႈတွၼ်ႈသူးငိုၼ်း ၼိုင်ႈၵေႃႉလႂ် 5000 ပျႃး လႄႈ ပပ်ႉတႅမ်ႈ ” ဝႃႈၼႆ ။
ပၢင်သွၼ်လိၵ်ႈတႆးၶၢဝ်းမႆႈ ပီၼႆႉ တင်းမူတ်း လုၵ်ႈႁဵၼ်း မီး 15 ၵေႃႉ ၊ ၶူးပူင်သွၼ် 2 ၵေႃႉ ၊ ပပ်ႉႁဵၼ်းသွၼ်သမ်ႉ ပဵၼ်ပပ်ႉႁူဝ်သိူဝ် ( ပပ်ႉလူင်ပွင်ၸိုင်ႈ ဢိတ်ႇဢွၵ်ႇ ) ၊ ၶၢဝ်းတၢင်း တႄႇသွၼ် 05/03/2016-23/05/2016 ၼႆယဝ်ႉ ။
ပၢင်သွၼ်လိၵ်ႈတႆးၼႆႉ တေမီးလုၵ်ႈဢွၼ်ႇတၢင်ႇၸၢဝ်းၶိူဝ်း မႃးၶိုၼ်ႈလဵပ်ႈႁဵၼ်းၵေႃႈမီး ၊ သင်ဝႃႈ တင်ႇၸၢဝ်းၶိူဝ်း ဢမ်ႇမေႃလိၵ်ႈတႆး ဢမ်ႇႁူႉၵႂၢမ်းတႆး သင်ဝႃႈၶႂ်ႈႁူႉ ၶႂ်ႈမေႃ မႃးယွၼ်းတၢင်းၸွႆႈထႅမ်တီႈၵေႃလိၵ်ႈလၢႆးလႄႈၾိင်ႈငႄႈတႆး ၸိုင် တေႁဵတ်းပၼ်သွၼ်ပၼ် ႁႂ်ႈပေႃးမေႃၵႂႃႇဝႃႈၼႆ ။