ပီႈၼွင်ႉတႆးၼႂ်းမိူင်းၶၢင် ၸတ်းႁဵတ်းပွႆးလူင်းပၢင်သွၼ် လိၵ်ႈလၢႆးတႆး ၶၢဝ်းမႆႈ

သင်ၶၸဝ်ႈလႄႈ ပီႈၼွင်ႉတႆး ၸႄႈဝဵင်းဝၢၼ်ႈၸႄႈ ႁူမ်ႈၵၼ်ၸတ်းႁဵတ်း ပွႆးလူင်းပၢင်သွၼ် လိၵ်ႈတႆး ၶၢဝ်းမႆႈ မီးသင်ၶၸဝ်ႈလႄႈ ၽူႈယႂ်ႇၵူၼ်းလူင် ၶဝ်ႈႁူမ်ႈတင်းၼမ် ။

ဝၼ်းတီႈ 22/05/2016 ယၢမ်း 09:00 မူင်း သင်ၶၸဝ်ႈလႄႈ ပီႈၼွင်ႉၵူၼ်းမိူင်း ႁူမ်ႈၵၼ်ၸတ်းႁဵတ်း ပၢင်ယုၵ်ႉယွင်ႈ ၶူးသွၼ်လႄႈ တွၼ်ႈသူးရၢင်းဝလ်း လုၵ်ႈႁဵၼ်း တီႈဝတ်ႉဝၢၼ်ႈၵွင်း မိူင်းဝၼ်း ၊ ဢိူင်ႇလွႆၸႄႈ 8 ဝၢၼ်ႈ ၸႄႈဝဵင်းဝၢၼ်ႈၸႄႈ ၸႄႈမိူင်းၶၢင် ၼႆယဝ်ႉ ။


ၸဝ်ႈတူၼ်ႈၶူး ဝတ်ႉဝၢၼ်ႈၵွင်း လၢတ်ႈဝႃႈ “ ပီၼႆႉ လုၵ်ႈႁဵၼ်းၸိူဝ်းၶႃးၶိုၼ်ႈႁဵၼ်း တင်းမူတ်းမီး 28 ၵေႃႉ ၊ ၼႂ်း 28 ၵေႃႉၼၼ်ႉ ႁဝ်းလႆႈ ယႅၵ်ႈပဵၼ် 3 ၸၼ်ႉ ၊ ၸၼ်ႉငဝ်ႈ (ၵ) 7 ၵေႃႉ ၊ ၸၼ်ႉငဝ်ႈ (ၶ) 16 ၵေႃႉ ၊ ၸၼ်ႉငဝ်ႈ (င) 5 ၵေႃႉ ၊ ၶူးပူင်သွၼ်ပၼ်သမ်ႉ တင်းမူတ်းမီး 4 ၵေႃႉ ” ဝႃႈၼႆ ။


ၵဵဝ်ႇၵပ်းလူၺ်ႈ ပွႆးလူင်းပၢင်သွၼ်ၼႆႉသေ သင်ၶၸဝ်ႈ ၸိူဝ်းမႃးၶဝ်ႈႁူမ်ႈ 10 တူၼ် ၊ ပီႈၼွင်ႉၸိူဝ်းမႃးၶဝ်ႈႁူမ်ႈသမ်ႉ ဝၢၼ်ႈဝဵင်းႁႆး ၊ ဝၢၼ်ႈဢုင်လူင် ၊ ဝၢၼ်ႈၼိမ်ၼိူဝ် ၊ ဝၢၼ်ႈၵုင်းသႃႇ ၊ ဝၢၼ်ႈလွႆၸႄႈ၊ ဝၢၼ်ႈတူၼ်ႈႁုင်းလႄႈဝၢၼ်ႈၼွင်ပုင်ႇ ၸဵမ်ၸိူဝ်းၼႆႉ တင်းမူတ်း 150 ပၢႆ ၼႆယဝ်ႉ ။


ပၢင်သွၼ်လိၵ်ႈလၢႆးတႆးလႄႈ ၾိင်ႈငႄႈပုတ်ႉထ ၶၢဝ်းမႆႈ ၼႂ်းၸႄႈဝဵင်းဝၢၼ်ႈၸႄႈၼႆႉ လႆႈပိုတ်ႇသွၼ်ပၼ် ၼႂ်းၶၢဝ်းတၢင်း 2 လိူၼ်ပၢႆ တႄႇဝၼ်းတီႈ 12/03/2016-05/05/2016 ၼႆယဝ်ႉ ။