ဝၼ်းတီႈ 21/05/2016 ဝၼ်းလိူၼ်ႁူၵ်းမူၼ်းၼႆႉ ၸုမ်းၵူၼ်းၼုမ်ႇလၢႆးၶႃႈ ႁူမ်ႈလူၺ်ႈပီႈၼွင်ႉၽူႈမီး ၼမ်ႉၸႂ်ၸေတၼႃႇသေတေဢွၼ်ၵၼ်ၵႂႃႇၽုၵ်ႇတူၼ်ႈမွၵ်ႇၵွၼ်တီႈဝတ်ႉ (ၵျွင်း) မူၺ်ႇတေႃႇမိူင်းၵိုင် ၸိုင်ႈတႆးပွတ်းၸၢၼ်း ။
မီးယိူင်းဢၢၼ်းလူင်ၼင်ႇႁိုဝ်တူၼ်ႈမွၵ်ႇၵွၼ်သမ်ႉပေႃးတေၵီႈၶွင်ႇတူဝ်ႈမိူင်းတႆး လႄႈ ႁႂ်ႈသိင်ႇဝႅတ်ႉ လွမ်ႉၸိုၼ်ႈၸၢင်ႇမူတ်းသႂ် ၊ မီးလူမ်းၵတ်းလူမ်းယဵၼ် ၊ ပႃႇမႆႉပေႃးတေၶဵဝ်ၸမ်ႉၼႂ်းမိူင်းတႆး ၊ ၼင်ႇႁိုဝ် သိင်ႇဝႅတ်ႉလွမ်ႉတေဢမ်ႇလူႉၵွႆ ၊ ပေႃးသိင်ႇဝႅတ်ႉလွမ်ႉလူႉၵွႆၵေႃႈၽေးသၽႃႇဝတေၸွမ်းမႃးၼမ် ဝႃႈၼႆ ။
ၸၢႆးလႅင်းႁိူင်း ႁူဝ်ၼႃႈၵူၼ်းၼုမ်ႇလၢႆးၶႃႈလၢတ်ႈဝႃႈ - “ ဝၼ်းတီႈ 21 ၼႆႉပဵၼ်ဝၼ်းလိူၼ်ႁူၵ်းမူၼ်း ပဵၼ်ဝၼ်းယႂ်ႇဝၼ်းလူင် လိူဝ်ၼၼ်ႉၵေႃႈပဵၼ်ဝၼ်းလုၵ်ႉၽိုၼ်ႉဢဝ်ၶိုၼ်းၸိုင်ႈတႆးၼႆသေ ႁဝ်းၶႃႈ ၸင်ႇဝူၼ်ႉဝႃႈႁဝ်းလီဢွၼ်ၵွၼ်ၽုၵ်ႇတူၼ်ႈမွၵ်ႇၵွၼ်ႁႂ်ႈပဵၼ်တီႈမၢႆတွင်းၼႆလႄႈ မိူဝ်ႈဝၼ်းတီႈ 03/04/2016 ၼၼ်ႉလႆႈ ၵႂႃႇယွၼ်းၶႂၢင်ႉတီႈ ၸဝ်ႈသြႃႇရေဝတ မိူင်းၵိုင် ၾၢႆႇၼိုင်ႈၵေႃႈၸွမ်း ထုင်ႉသၼ်လွႆမိူင်းတႆးဢမ်ႇပေႃးလႆႈႁၼ်တူၼ်ႈမွၵ်ႇၵွၼ်ယဝ်ႉလႄႈၵူဝ်မိၵ်ႈမၢႆၵိုၵ်းၶိူဝ်းတႆးႁၢႆဝၢႆးဝႃႈၼႆ ။ ပေႃးမီးဢဵၼ်ႁႅင်း တဵမ်ထူၼ်ႈၸိုင် တေဢၢၼ်းၽုၵ်ႇ 600 တူၼ်ႈ ၼင်ႇႁိုဝ်တူၼ်ႈမွၵ်ႇၵွၼ်သမ်ႉပေႃး တေၵီႈၶွင်ႇတူဝ်ႈမိူင်းတႆး လိူဝ်ၼၼ်ႉၵေႃႈမိူၼ်ၼင်ႇ မႆႉသၵ်း၊မႆႉပဝ်း၊မႆႉမွၵ်ႇသွမ်ႇ၊ မွၵ်ႇၶိတ်းလႃးၸိူဝ်း ၼႆႉ ။ ၵွပ်ႈၼၼ်ႉသင်ဝႃႈ ၽႂ်ၽူႈလႂ်သူၼ်ၸႂ် - ၾၢႆႇၸုမ်းၵူၼ်းၼုမ်ႇၼႆႉတႅပ်းတတ်းဝႆႉဝႃႈ - လူႇတၢၼ်း 1 ၵေႃႉ 1မိုၼ်ပျႃး ။ ၵူၺ်းၵႃႈၽႂ်မီးၼမ်ႉၸႂ်ၶႂ်ႈလူႇတၢၼ်းၵမ်ႉၸွႆႈၼမ်လိူဝ်ၼၼ်ႉၵေႃႈလႆႈယူ ၵမ်ႈၸေတၼႃႇ ။ တူၼ်ႈမွၵ်ႇၵွၼ်တႄႉတေၽုၵ်ႇၵႂႃႇၵူႈပီၶိုတ်းၶိုတ်းတၢမ်းတၢမ်းၵၼ်ဝႃႈၼႆ ”။
ၸုမ်းၵူၼ်းၼုမ်ႇလၢႆးၶႃႈႁူမ်ႈပႃးၸုမ်းၵူၼ်းၼုမ်ႇလၢႆတီႈၼႆႉ ႁူမ်ႈၵၼ်ၽုၵ်ႇတူၼ်ႈမွၵ်ႇၵွၼ်ပွၵ်ႈၼႆႉ ပဵၼ်ပွၵ်ႈၵမ်း 3 ယဝ်ႉ ၊ မိူဝ်ႈပွၵ်ႈၵမ်း 1 ပီ 2013 ၽုၵ်ႇတီႈဝဵင်းလၢႆးၶႃႈ (470) တူၼ်ႈ ၊ ပွၵ်ႈၵမ်း 2 ပီ 2014 ၽုၵ်ႇတီႈပၢင်ႇလႅင်းသႂ် ဝဵင်းၼမ်ႉၸၢင် (300) တူၼ်ႈ ပီၼႆႉ ပီ 2016 တေဢၢၼ်းၽုၵ်ႇတီႈ မူၺ်ႇတေႃႇ မိူင်းၵိုင်တႃႇ (600) တူၼ်ႈ ။