ဝၼ်းတီႈ 07/05/2016 ၸဝ်ႈၶူးသီရိထမ်မ ဝိႁၢရ်ဝဵင်းဢိၼ်း ဢွၼ်ႁူဝ်ၸဝ်ႈသင်ၶ လႄႈၵူၼ်းမိူင်း ၼႂ်းပိုၼ်ႉတီႈႁူမ်ႈၵၼ် ၸတ်းႁဵတ်းပၢင်တြႃး ပိူဝ်ႈႁႂ်ႈၵူၼ်းၼုမ်ႇ ၊ ၵူၼ်းဝၢၼ်ႈၵူၼ်းမိူင်းယၢၼ်ၵႆ ယႃႈမဝ်းၵမ် သႂ်ႇၸိုဝ်ႈပၢင်တြႃးဝႃႈ “ ပၢင်တြႃးတိုၵ်းၽေးယႃႈမဝ်းၵမ် လႄႈပၢင်တြႃးၵူၼ်းၼုမ်ႇ ” မီးပီႈၼွင်ႉၵူၼ်းမိူင်းမႃးႁပ်ႉထွမ်ႇ ၸမ် 500 ၵေႃႉ ၸတ်းႁဵတ်းၵႂႃႇတီႈ ဝဵင်းၼွင်မွၼ် ၸႄႈဝဵင်းသီႇ သႅင်ႇ ၸိုင်ႈတႆးပွတ်းၸၢၼ်း ။
ၸဝ်ႈၶူးသီရိထမ်မ ဝတ်ႉၾႃႉဝဵင်းဢိၼ်း လၢတ်ႈဝႃႈ - “ လၢႆသိပ်းပီမႃးယဝ်ႉ ဢၼ်ၵူၼ်း မိူင်းတႆးလႆႈ တူၵ်းပဵၼ်းယိူဝ်ႇ ၊ ၶီႈၶႃႈယႃႈမဝ်းၵမ် ႁဵတ်းႁႂ်ႈၵူၼ်းမိူင်းတႆး တၢင်းယၢမ်ႈလူႉ ၸပ်းတိတ်းယႃႈပေႃး ၸပ်းယႃႈယဝ်ႉ ႁဵတ်းၵႃႈပဵၼ် ယဵၼ်းပဵၼ်ၵႂႃႇၶီႈလၵ်ႉၵူၼ်းၸူၼ် ၊ ပဵၼ်ၵူၼ်းယွင်ႇၵူၼ်းမႃႈၵႂႃႇၵေႃႈမီး ။ ၵွပ်ႈၼၼ်လႄႈ ႁဝ်းၸင်ႇႁူမ်ႈၵၼ်သေၸတ်းႁဵတ်းမႃးပွၵ်ႈၼႆႉပဵၼ်ပွၵ်ႈတီႈ 21 ဝၢႆးသေလႆႈၸတ်း ႁဵတ်းယဝ်ႉ ႁၼ်ဝႃႈၵူၼ်းမိူင်း ပွင်ႇၸႂ်ၼိူဝ်ၽွၼ်ႉၸႃႉယႃႈမဝ်းၵမ် ” ဝႃႈၼႆ ။
ၵဵဝ်ႇလူၺ်ႈလွင်ႈပၢင်တြႃးပၼ်တၢင်းႁူႉယႃႈမဝ်းၵမ်ၼႆႉမိူဝ်ႈဝၼ်းတီႈ 12/01/2016 ၸဝ်ႈၶူးသီရိ ထမ်မ ဝိႁၢရ်ဝဵင်းဢိၼ်း ၊ ၸဝ်ႈတူၼ်ၶူး ၵႃႇဝိင်ႇတ ဝိႁၢရ် (ၵျွင်း) တူၵ်း မိူင်းပွၼ် ၊ ၸဝ်ႈတူၼ်ၶူး သေႃးလိင်ႇတ ဝတ်ႉၵုၼ်ၼႃး ထုင်ႉပူင်း ၊ ၸဝ်ႈၶူးၼၼ်ႇတိသေႇၼ ဝတ်ႉထၢတ်ႈတေႃႇလွႆလႅမ် ၊ ၸဝ်ႈၶူးမူးလိင်ႇတ ဝတ်ႉမိူင်းယၢင်း မိူင်းၼွင် - ဢွၼ်ႁူဝ်ထူဝ်းၼႃႈ သင်ၶၸဝ်ႈတႆး သေ ယၢမ်ႈ ၸတ်းႁဵတ်း မႃးတီႈ သုမ်ႉဝူင်းမႅတ်ႈတႃႇ ဝၢၼ်ႈၼွင်ၶဵဝ် ၸႄႈဝဵင်းလွႆလႅမ် ၸိုင်ႈတႆးပွတ်းၸၢၼ်း မီးပီႈၼွင်ႉတႆး ၊ ပဢူဝ်း၊မၢၼ်ႈ ၶဝ်ႈႁူမ်ႈထွမ်ႇ မီးႁိမ်းပၢၵ်ႇ ။ လိူဝ်ၼၼ်ႉၵေႃႈမိူၼ်ၼင်ႇတီႈဝဵင်းသီႇသႅင် ၊ ထုင်ႉပူင်း ၊ ၵူတ်ႉၶၢႆ ၊ သႅၼ်ဝီ ၊ လႃႈသဵဝ်ႈ ၸိူဝ်းၼႆႉၵေႃႈၸတ်းႁဵတ်းမႃး ။ ပွၵ်ႈၼႆႉပဵၼ်ပွၵ်ႈၵမ်း 21 ယဝ်ႉ ဝႃႈၼႆႉ ။