မိူဝ်ႈဝၼ်းတီႈ 28/04/2016 ၶၢဝ်းယၢမ်းၵၢင်ၶိုၼ်း 11-12 မူင်း ၵႃးတၢင်ႇမႆႉသၵ်း သူင်ႇၶဝ်ႈမိူင်း ၶႄႇပိၼ်ႈတဵင်သႂ်ႇ မေႃႈၾႆး Transformer ၵူၼ်းဝၢၼ်ႈ တီႈဝၢၼ်ႈလွႆလိၼ်ၵၢင် ၸႄႈဝဵင်းၼမ်ႉၶမ်း ယၢၼ်ၼမ်ႉၶမ်းမွၵ်ႈ 2 လၵ်း ၸိုင်ႈတႆးပွတ်းႁွင်ႇ ႁဵတ်းႁႂ်ႈၾႆးၾႃႉၶၢတ်ႇ - ၵူၼ်းပိုၼ်ႉတီႈလႆႈ ယၢပ်ႇၽိုတ်ႇ ။
ၵူၼ်းၼႂ်းပိုၼ်ႉတီႈဢမ်ႇၶႂ်ႈဢွၵ်ႇၸိုဝ်ႈၵေႃႉၼိုင်ႈလၢတ်ႈဝႃႈ - “ ၶႂ်ႈတုၵ်းယွၼ်းထိုင် ပႃႊတီႊၵၢၼ်မိူင်း ? ၽူႈတႅၼ်းသၽႃး ဢၼ်ႁွတ်ႈၼႂ်းသၽႃး ႁႂ်ႈတၢင်ႇပၼ်တီႈၼႂ်းသၽႃး ၸွႆႈၵႄႈၶႆပၼ်ပၼ်ႁႃဢၼ်ၵႃး တၢင်ႇမႆႉသၵ်း ၊ ၵႃးတၢင်ႇထၢၼ်ႇ လတ်းဝဵင်းၼမ်ႉၶမ်း လၵ်ႉလွမ်ဢဝ်ၶဝ်ႈၼႂ်းမိူင်းၶႄႇ ၊ ၵမ်ႈၼမ်လၵ်ႉ လွမ်လတ်းဝဵင်းၵၢင်ၶိုၼ်း ၊ သမ်ႉႁေႃႈလူတ်ႉဝႆး ၊ ၵူၼ်းမိူင်းလႆႈတႃၼွၼ်းလုယွၼ်ႉသဵင်လူတ်ႉ သေ ဢမ်ႇၵႃး ယွၼ်ႉလူတ်ႉၵႃးတၢင်ႇၼၵ်း ၊ ႁဵတ်းႁႂ်ႈသဵၼ်ႈတၢင်းၵွႆ ၊ မၢင်ပွၵ်ႈတုမ်ႉၽႃႇသႂ်ႇႁိူၼ်းၵူၼ်းမိူင်း ပႃး ။ ဢမ်ႇမီးလွင်ႈသၢႆႈတႅၼ်း ၊ ၵူၼ်းမိူင်းလႆႈမႄးၶိုၼ်းႁင်းၵူၺ်း ။ ပိူင်လူင်ႁဵတ်းႁႂ်ႈတုမ်ႉတိူဝ်ႉသိင်ႇ ဝႅတ်ႉလွမ်ႉ ။ လွင်ႈၼႆႉပဵၼ်လွင်ႈၽိတ်းမၢႆမီႈ ဝၢၼ်ႈမိူင်း ၊ ၵူၼ်းမိူင်းၵေႃႈဢမ်ႇလႆႈၸႂ်ႈ ” ဝႃႈၼႆ ။
မိူဝ်ႈပီ2014 ၽွင်းလုင်းၸၢႆးဢၢႆႈပဝ်း ႁူဝ်ပဝ်ႈပႃႇတီႇသိူဝ်ၽိူၵ်ႇ ပဵၼ်ၽွင်းလူင် ၾၢႆႇပႃႇမႆႉလႄႈႁိၼ် ႁႄႈ ၼႂ်းလူင်ပွင်ၸိုင်ႈမိူင်းတႆးၼၼ်ႉ ယၢမ်ႈလၢတ်ႈတီႈ ၸုမ်းတူင်ႇဝူင်းၵူၼ်း တီႈၼႂ်းၵဵင်းမႆႇ (ၸိုင်ႈထႆး) ဝႃႈ - မိူဝ်ႈပီ 2012 ၼၼ်ႉမႆႉသၵ်းၼႂ်းမိူင်းတႆး ဢၼ်လႆႈတၢင်ႇၶၢႆတေႃႇၼွၵ်ႈမိူင်း ၊ မႆႉသၵ်းပိူင်လဵဝ်ၵူၺ်း 2 သႅၼ်တၼ်ႊ ။ ၶွၼ်ႇမႆႉၼႆႉ လူင်ပွင်ၸိုင်ႈသုၼ်ၵၢင်ၸႅၵ်ႇပၼ်လူင်ပွင်ၸိုင်ႈ မိူင်းတႆး 3% ၵူၺ်း ။ သင်ၸိူဝ်ႉဝႃႈ ယူႇတီႈသၽႃးသေ ယွၼ်းလႆႈၶွၼ်ႇၶိုင်ႈၼိုင်ႈ တွၼ်ႈတႃႇ လူင်ပွင် ၸိုင်ႈမိူင်းတႆး ပဵၼ် 50% တႄႉ မိူင်းတႆးတၵ်ႉတေမီး ငိုၼ်းၶဝ်ႈတင်းၼမ် - ဝႃႈၼႆ ။