 |
| ၵူၼ်းပၢႆႈၽေးသိုၵ်း ၸိူဝ်းႁွတ်ႈၽႅဝ်တီႈ ဝတ်ႉမၢၼ်ႈသူႈ ဝဵင်းလႃႈသဵဝ်ႈ |
ၵူၼ်းၼႂ်းပိုၼ်ႉတီႈ တွၼ်ႈၾၢႆႇၸၢၼ်းဝဵင်းသီႇပေႃႉ ဢၼ်လႆႈပၢႆႈၽေးသိုၵ်းၸိူဝ်းၼႆႉ ပဵၼ်ဝၢၼ်ႈလူင် ၊ ဝၢၼ်ႈပဵင်းသၢႆး ၊ ဝၢၼ်ႈပႃတႅပ်း ၊ ဝၢၼ်ႈႁူဝ်လွႆ ၊ ဝၢၼ်ႈၼႃးသၢႆး ၊ ဝၢၼ်ႈၼွင်ၼူၺ်း ၊ ဝၢၼ်ႈၼႃးၼၢင်း ၸိူဝ်းၼႆႉ - ၼႆယဝ်ႉ ။
မႄႈလုၵ်ႈဢွၼ်ႇၵေႃႉၼိုင်ႈ ဢၼ်ပၢႆႈၽေးသိုၵ်း ႁွတ်ႈၽႅဝ်ဝဵင်းလႃႈသဵဝ်ႈ လၢတ်ႈဝႃႈ - ယၢမ်းလဵဝ် တီႈဝတ်ႉ / ၵျွင်းမၢၼ်ႈသူႈ တီႈဝဵင်းလႃႈသဵဝ်ႈၼႆႉ မိူဝ်ႈဝႃးတေႃႇထိုင်ၵၢင်ၶမ်ႈ မီးႁဝ်းၶႃႈယူႇ 97 ၵေႃႉ ၊ ပဵၼ်တႆးလွၼ်ႉလွၼ်ႉ ၊ ၼႂ်းၼႆႉ ၵမ်ႈၼမ်ပဵၼ်ၵူၼ်းဝၢၼ်ႈလူင် လႄႈဝၢၼ်ႈၼွင်ၼူၺ်း ၊ ၵမ်ႈၼမ်ပဵၼ် လုၵ်ႈဢွၼ်ႇလႄႈၵူၼ်းထဝ်ႈဢႃယုၵႄႇလွၼ်ႉလွၼ်ႉ ။ မိူဝ်ႈပၢႆႈမႃးၵေႃႈ ဢွၼ်ၵၼ်ၶီႇထူဝ်ႈလႃႇၵျီႇလႄႈ လူတ်ႉၵႃးလူင် ၶွင်ၵူၼ်းႁိမ်းႁွမ်းလႄႈ ၵူၼ်းႁူႉၸၵ်းၼႂ်းဝၢၼ်ႈသေ ပၢႆႈမႃး - ဝႃႈၼႆ ။
ဝၢၼ်ႈလူင်ဝၢၼ်ႈလဵဝ်ၵူၺ်း လင်ႁိူၼ်းၵူၼ်းမီး 82 ပၢႆ ၊ ႁူဝ်ၵူၼ်းမီး 300 ပၢႆ ။ ၵမ်ႈၽွင်ႈၶၢႆႉပၢႆႈၵႂႃႇယူႇ တၢင်းဝၢၼ်ႈတၢၼ်ႇလုၼ်ႇ ၊ ၵမ်ႈၽွင်ႈၶၢႆႉပၢႆႈၵႂႃႇတၢင်းၼမ်ႉပွင်ႈ ၊ ၵမ်ႈၽွင်ႈပၢႆႈၵႂႃႇယူႇတီႈ ဢၼ်မီးပီႈမီးၼွင်ႉၶဝ်ၸိူဝ်းၼႆႉ ။
တပ်ႉသိုၵ်းမၢၼ်ႈ (တပ်ႉမတေႃႇ) ဢၼ်ႁၢင်ႈႁႅၼ်းသိုၵ်း မႃးလေႃႇတိုၵ်း တပ်ႉသိုၵ်းၸိုင်ႈတႆး SSPP/SSA တီႈထုင်ႉဝၢၼ်ႈလူင် ၼမ်ႉမႃႉၼႆႉ ပဵၼ်တပ်ႉၶလယ 41, ၶလယ 68, ၶလယ 69, ၶလယ 291 ဢိၵ်ႇ ၶမယ 523 ။ တပ်ႉၸိူဝ်းၼႆႉ ပဵၼ်တႂ်ႈတိူင်းသိုၵ်းၸဵင်ႇႁွင်ႇဝၼ်းဢွၵ်ႇ (ယမၶ) လႃႈသဵဝ်ႈ ၊ ၸိူဝ်းတူင်ႉၼိုင်ယူႇၼႂ်းဢိူင်ႇၼမ်ႉမႃႉ ဢိူင်ႇၼႃးၼိဝ်ႉၸိူဝ်းၼႆႉ ။ ၼွၵ်ႈသေၼၼ်ႉ ၾၢႆႇသိုၵ်းမၢၼ်ႈၸႂ်ႉႁိူဝ်းဝိၼ်သိုၵ်း မႃးတိုၵ်းယိုဝ်းၸွႆႈ၊ ႁိူဝ်းဝိၼ်သိုၵ်းၼႆႉ လုၵ်ႉတီႈတိူင်းသိုၵ်းလႃႈသဵဝ်ႈမႃး - ၼႆယဝ်ႉ ။
ၽူႈၵွၼ်းသိုၵ်းတီႈငဝ်ႈငုၼ်းဝၢၼ်ႈႁႆး ၸဝ်ႈၼိုင်ႈလၢတ်ႈဝႃႈ - မိူဝ်ႈဝႃးၼႆႉ (18/05/2016) ဢဝ်ႁိူဝ်းဝိၼ် ယိုဝ်းသိုၵ်း မႃးယိုဝ်းႁဝ်းၶႃႈ 2 ၵမ်း ၊ ၶၢဝ်းၵၢင်ဝၼ်းတဵင်ႈၵမ်းၼိုင်ႈ ၊ ၶၢဝ်းယၢမ်းဝၢႆးဝၼ်းၵမ်းၼိုင်ႈ - ဝႃႈၼႆ ။
တပ်ႉသိုၵ်းမၢၼ်ႈ (တပ်ႉမတေႃႇ) ၼႆႉ တင်ႈဢဝ်ၽွင်းႁၢင်လိူၼ် ဢေႊပရိူဝ်ႊလ် (2016) မႃးတေႃႇထိုင် ယၢမ်းလဵဝ် ႁၢင်ႈႁႅၼ်းသိုၵ်းလေႃႇတိုၵ်း တပ်ႉသိုၵ်းၸိုင်ႈတႆး SSPP/SSA လႄႈ ၸုမ်းဢူၺ်းလီ SSPP/SSA ဢၼ်ပဵၼ် တပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း (TNLA) ။ ယွၼ်ႉပၢင်တိုၵ်းသေ မိူဝ်ႈလဵဝ် မီးၵူၼ်းဝၢၼ်ႈၵူၼ်းမိူင်းပၢႆႈၽေးသိုၵ်း ဢမ်ႇယွမ်းသွင်ႁဵင် (2,000) ယဝ်ႉ - လႆႈႁူႉၼင်ႇၼႆ ။