ၸုမ်းၶၢင် KIO ဢွၵ်ႇလိၵ်ႈပိုၼ်ၽၢဝ်ႇ လွင်ႈပၢင်တိုၵ်း ၼႂ်းၸိုင်ႈတႆးပွတ်းႁွင်ႇဝႃႈ ယွၼ်ႉပိူဝ်ႈတပ်ႉသိုၵ်းမၢၼ်ႈ ႁၢင်ႈသိုၵ်းလေႃႇတိုၵ်းၸၢဝ်းၶိူဝ်း ယိုင်ႈၼပ်ႉဝၼ်းယိုင်ႈၼမ်မႃး ၸုမ်းဢူၺ်းလီ ၸင်ႇလႆႈတုမ်ႉတွပ်ႇတိုၵ်းၶိုၼ်း။ ၸုမ်းဝႃႉ UWSA ၵေႃႈဢွၵ်ႇလိၵ်ႈပိုၼ်ၽၢဝ်ႇဝႃႈ ၼင်ႇႁိုဝ်လႅၼ်လိၼ်မိူင်းၶႄႇ- မၢၼ်ႈ တေငမ်းယဵၼ်ၼၼ်ႉ သွင်ၾၢႆႇလီႁူပ်ႉဢုပ်ႇၵုမ်ၵၼ်၊ ဢဝ်လၢႆးၵၢၼ်မိူင်းၵႄႈလိတ်ႈ ။

မိူဝ်ႈဝၼ်းတီႈ 23/11/2016 ယူႇတီႈၶွမ်ႊမတီႊငဝ်ႈငုၼ်းၸုမ်းၶၢင် KIO သေ ဢွၵ်ႇၶေႃႈပိုၼ်ၽၢဝ်ႇ ၵဵဝ်ႇၵပ်းလွင်ႈပၢင်တိုၵ်း။ ပၢင်တိုၵ်းၼႂ်းၸိုင်ႈတႆးပွတ်းႁွင်ႇ ဢၼ်တႄႇပဵၼ်မႃးမိူဝ်ႈဝၼ်းတီႈ 20/11/2016 ၼၼ်ႉ ယူႇတီႈၸုမ်းၶၢင် KIO သေ လႆႈဢွၵ်ႇလိၵ်ႈပိုၼ်ၽၢဝ်ႇ 4 ၶေႃႈၼင်ႇၼႆ ။


1.ပၢင်တိုၵ်း ဢၼ်လုၵ်ႉတီႈမိူဝ်ႈပီ 2011 သေ ၶိုၼ်းမႃးပဵၼ်ထႅင်ႈၵမ်းၼိုင်ႈ ယၢမ်းမိူဝ်ႈလဵဝ်ၼႆႉ ပၢင်တိုၵ်းၼႆႉ ဢမ်ႇလႆႈလူတ်းယွမ်းၵႂႃႇ။ ၾၢႆႇတၢင်းတပ်ႉမတေႃႇသိုၵ်းမၢၼ်ႈၼႆႉ ၸႂ်ႉဢဵၼ်ႁႅင်းသေ တိုၵ်းတေႃးၸုမ်းယိပ်း ၵွင်ႈၵၢင်ႇၸၢဝ်းၶိူဝ်း ၵူႈတီႈတီႈ၊ ဢဝ်ဢဵၼ်ႁႅင်းသိုၵ်းသေၶိုၼ်ႈယိုဝ်းၸၢဝ်းၶိူဝ်း ဝၼ်းၼိုင်ႈယဝ်ႉဝၼ်းၼိုင်ႈ ပၢင်တိုၵ်းၼမ်မႃးတိၵ်းတိၵ်း၊ ပၢင်တိုၵ်းပဵၼ်မႃးၶိူဝ်းယႂ်းဢမ်ႇထၢတ်ႇဢမ်ႇဝၢႆး ။


2.ယွၼ်ႉပိူဝ်ႈၾၢႆႇတပ်ႉမတေႃႇမၢၼ်ႈ ဢဝ်ဢဵၼ်ႁႅင်းသိုၵ်းသေ ၶဝ်ႈပိုတ်းယိုဝ်းၸၢဝ်းၶိူဝ်း မႃးပီယၢဝ်းၶၢဝ်းႁိုင်သေ ယူႇတီႈတပ်ႉၸုမ်းဢူၺ်းလီပွတ်းႁွင်ႇ ဢၼ်ပဵၼ် KIA, MNDAA, TNLA, AA ၶဝ်  ၸင်ႇလႆႈႁူမ်ႈမိုဝ်းၵၼ် ဢဝ်ဢဵၼ်ႁႅင်းသိုၵ်း တုမ်ႉတွပ်ႇၶိုၼ်းၼႂ်းၸိုင်ႈတႆးပွတ်းႁွင်ႇ ။


3.ယူႇတီႈၵူၼ်းသိုၵ်းၸုမ်းၸၢဝ်းၶိူဝ်း ဢၼ်ၶဝ်ႈပႃးၼႂ်းပၢင်တိုၵ်း ဢၼ်ပဵၼ်ယူႇယၢမ်းလဵဝ်ၼႆႉသေ ၼင်ႇႁိုဝ်တေဢမ်ႇတုမ်ႉတိူဝ်ႉၵူၼ်းမိူင်းၼၼ်ႉၵေႃႈ လႆႈဝႆႉသတိၼၵ်းၼၵ်းၼႃၼႃသေ ၶဝ်ႈပၢင်တိုၵ်းၵႂႃႇ ။


ပၢင်တိုၵ်းၼႆႉ မၼ်းပဵၼ်ပၢင်တိုၵ်းဢၼ်မီးၶွပ်ႇမီးပိူင်၊ ဢမ်ႇၸႂ်ႈပၢင်တိုၵ်း ဢၼ်ႁဵတ်းႁႂ်ႈလွင်ႈၸမ်ၸႂ်ၸိူဝ်ႉၸၢတ်ႈ လူႉၵွႆၼႆ ယူႇတီႈၸုမ်းၶၢင် KIO လႆႈဢွၵ်ႇၶေႃႈပိုၼ်ၽၢဝ်ႇ မႃးၼင်ႇၼႆ ။


ၾၢႆႇၼိုင်ႈတၢင်းၼိုင်ႈ မိူဝ်ႈဝၼ်းတီႈ 24/11/2016 ၼၼ်ႉ ယူႇတီႈငဝ်ႈငုၼ်း တပ်ႉသိုၵ်းမိူင်းဝႃႉၽွမ်ႉႁူမ်ႈ (UWSA) ၊ လူင်ပွင်ၸိုင်ႈၵူၼ်းမိူင်းဝႃႉ၊ ပႃႇတီႇၵၢၼ်းမိူင်းဝႃႉ ၵေႃႈဢွၵ်ႇလိၵ်ႈၶေႃႈပိုၼ်ၽၢဝ်ႇ ၽိုၼ်ၼိုင်ႈ၊ တင်းမူတ်းမီး 4 ၶေႃႈ။ ၼႂ်းၶေႃႈပိုၼ်ၽၢဝ်ႇၼၼ်ႉ မီးၼင်ႇၼႆ ။


1.ယူႇတီႈမိူင်းဝႃႉၽွမ်ႉႁူမ်ႈသေ လႆႈပၵ်းတႃပႂ်ႉတူၺ်း ပၼ်ႁႃဢၼ်ပဵၼ်ယူႇၼႂ်းၸိုင်ႈတႆးပွတ်းႁွင်ႇ မိူၼ်ၼင်ႇ မိူင်းၵူဝ်း မူႇၸေႈၸိူဝ်းၼႆႉ။ ဢၼ်ပဵၼ်မႃးပၢင်တိုၵ်းႁၢဝ်ႈႁႅင်း တႄႇဢဝ်ဝၼ်းတီႈ 20/11/2016 ၸွမ်းလႅၼ်လိၼ်မိူင်းမၢၼ်ႈ-မိူင်းၶႄႇၼၼ်ႉ ၼင်ႇႁိုဝ်တေဢမ်ႇတုမ်ႉတိူဝ်ႉၼႃႈၵၢၼ်တႃငၢၼ်း ၵူၼ်းမိူင်းၼၼ်ႉ ယူႇတီႈမိူင်းဝႃႉၽွမ်ႉႁူမ်ႈၵေႃႈ ပၵ်းတႃပႂ်ႉတူၺ်းဝႆႉယူႇ ။


2.ယူႇတီႈတပ်ႉမတေႃႇသိုၵ်းမၢၼ်ႈသေ တင်းၸုမ်းဢူၺ်းလီ မိူင်းမၢၼ်ႈပွတ်းႁွင်ႇ မိူၼ်ၼင်ႇဢၼ်ၶွတ်ႇၽွတ်ႈ ၶိုၼ်ႈမႃးသေ ၶဝ်ႈပႃးၸုမ်းၵူဝ်းၵၢင်ႉ (MNDAA) ၊ ၸုမ်းတဢၢင်း (TNLA) ၊ ၸုမ်းရၶႅင်ႇ (AA) တင်းၸုမ်းၶၢင် (KIA) ၸိူဝ်းၼႆႉ ထုၵ်ႇလီလႆႈဢုပ်ႇၵုမ်ၵၼ်၊ ႁႂ်ႈမီးလွင်ႈပွင်ႇၸႂ်ၵၼ်။ ဢဵၼ်းဢၢၼ်းႁႂ်ႈဝၢၼ်ႈမိူင်းလႆႈလီ၊ ႁႂ်ႈပၢင်တိုၵ်းၵိုတ်းယိုတ်း၊ ႁႂ်ႈလွင်ႈၵပ်းသိုပ်ႇတိတ်းတေႃႇ မိူင်းၶႄႇတင်းမိူင်းမၢၼ်ႈ ယႃႇႁႂ်ႈလူႉလႅဝ်၊ ႁႂ်ႈၸွမ်းလႅၼ်လိၼ်မိူင်းၶႄႇလႄႈမိူင်းမၢၼ်ႈ မီးလွင်ႈၵတ်းယဵၼ် ၼိမ်သဝ်းၸိူဝ်းၼႆႉသေ ယူႇတီႈၸႄႈမိူင်းဝႃႉ လႆႈတုၵ်းယွၼ်းယႂ်ႇယႂ်ႇၼမ်ၼမ် ။


3.ပၢင်တိုၵ်း ဢၼ်ပဵၼ်ၼႂ်းၵႄႈၸၢဝ်းၶိူဝ်းၼင်ႇၵၼ်ၼႆႉ ဢမ်ႇၵႄႈလိတ်ႈပၼ်ႁႃၵၢၼ်မိူင်းလႆႈၼႆၼၼ်ႉ ပေႃးတူၺ်းၶိုၼ်းပိူင်ပဵၼ်လႄႈ ပိုၼ်းဢၼ်ပဵၼ်မိူဝ်ႈၵႃႈပူၼ်ႉမႃး၊ ဢၼ်ပဵၼ်ပၢင်တိုၵ်းသိုၵ်းသိူဝ်ၵၼ်မႃး ၶၢဝ်းယၢဝ်း ၼႂ်းမိူင်းမၢၼ်ႈၼၼ်ႉၵေႃႈ တေလႆႈႁူႉလႆႈတွၼ်ႈသွၼ်ယူႇ၊ လွင်ႈပဵၼ်ပၢင်တိုၵ်းမႃးပီယၢဝ်းၶၢဝ်းႁိုင်ၼႆႉ ပဵၼ်လၵ်းထၢၼ်/သၢၵ်ႈသေႇမၼ်းယဝ်ႉ။ ၵွပ်ႈၼၼ် ယူႇတီႈတပ်ႉသိုၵ်းမိူင်းဝႃႉၽွမ်ႉႁူမ်ႈသေ ၶႂ်ႈတုၵ်းယွၼ်းဝႃႈ ပၼ်ႁႃၵၢၼ်မိူင်းၼႆႉ ႁႂ်ႈဢဝ်လၢႆးၵၢၼ်မိူင်းသေၵႄႈလိတ်ႈ ။


4.ယူႇတီႈမိူင်းဝႃႉၽွမ်ႉႁူမ်ႈသေ ၼင်ႇႁိုဝ်တေၵႄႈလိတ်ႈလႆႈ ပၼ်ႁႃၼႂ်းဝူင်ႈၵၢင်သွင်ၾၢႆႇၼၼ်ႉ ႁၼ်ထိုင်ဝႃႈ ထုၵ်ႇလီလႆႈႁူပ်ႉထူပ်းဢုပ်ႇဢူဝ်းၵၼ်။ ၼင်ႇႁိုဝ်သွင်ၾၢႆႇတေႁူပ်ႉထူပ်း ဢုပ်ႇဢူဝ်းၵၼ်လႆႈၼၼ်ႉၵေႃႈ ယူႇတီႈမိူင်းဝႃႉၽွမ်ႉႁူမ်ႈသေ ပိူဝ်ႈတႃႇၸွႆႈထႅမ်ပၼ် ၸွမ်းၼင်ႇၵႃႈပွင်ပဵၼ်လႆႈၼၼ်ႉ တူဝ်ႈတၼ်းဝႆႉတႃႇသေႇ ။