ဢွၼ်ႇၸၢႆးတႆး ႁွတ်ႈမိူင်းထႆး လႆႈႁပ်ႉသူး(ရၢင်းဝလ်း)တၢင်းယၢမ်ႈလီ ၊ၵူၼ်းၼုမ်ႇတူဝ်ယၢင်ႇလီ ဢၼ်ႁွင်ႈၵၢၼ်ၾၢႆႇပၢႆးပၺ်ၺႃဝဵင်းၵဵင်းမႆႇ ၸိုင်ႈထႆး မွပ်ႈယိုၼ်ႈပၼ် ။

Photo By - Fa Moung Hope

ဝၼ်းတီႈ 29/11/2016 ႁွင်ႈၵၢၼ်ၾၢႆႇပၢႆးပၺ်ၺႃဝဵင်းၵဵင်းမႆႇ ၸိုင်ႈထႆး ၸတ်းပၢင်ယိုၼ်ႈမွပ်ႈ သူႈၼမ်ႉၸႂ် ပၼ် ၶူးလႄႈလုၵ်ႈႁဵၼ်း ၽူႈဢၼ်မီး တၢင်းတိုဝ်းၵမ် လီလႄႈတူဝ်ႇ ယၢင်ႇလီ။ လႆႈလိူၵ်ႈဢဝ်လုၵ်ႈႁဵၼ်းၼႂ်း10ႁူင်းႁဵၼ်းပၢႆ ၊ လုၵ်ႈႁဵၼ်းၸိူဝ်းလႆႈႁပ်ႉသူးမီး 11ၵေႃႉ၊ ၼႂ်းၼၼ်ႉပႃးဢွၼ်ႇၸၢႆးတႆး ၸၢႆးၾႃႉမိူင်း ဢမ်ႇၼၼ် ၸၢႆးမိၼ်ႉ လုင်းတ ။


ၸၢႆးၾႃႉမိူင်း လၢတ်ႈဝႃႈ - “ႁဝ်းၶႃႈပဵၼ်ၵူၼ်းၼုမ်ႇၵေႃႉၼိုင်ႈၼႆႉ ယူႇတီႈလႂ်သေဢမ်ႇဝႃႈ ႁဝ်းလူဝ်ႇမီး တၢင်းတိုဝ်းၵမ်လီ တၢင်းယၢမ်ႈလီ မေႃၸွႆႈထႅမ်ပိူၼ်ႈ ဢမ်ႇႁဵတ်းလွင်ႈသုၵ်ႉယုင်ႈ ဢူၼ်ဢၢၼ် ၼႂ်း ပိုၼ်ႉတီႈ ဢမ်ႇပၼ်တၢင်းလိူတ်ႇမႆႈပိူၼ်ႈ ပေႃးႁဝ်းႁဵတ်းလီ၊မေႃယူႇ မေႃၵိၼ်ၸိုင် ပိူၼ်ႈ ၵေႃႈတေ ႁၵ်ႉႁူမ်ၸူမ်းပႅင်းႁဝ်း ႁဝ်းၵေႃႈတေယူႇငၢႆႈၵိၼ်ငၢႆႈ ၸၢင်ႈႁဵတ်း ႁႂ်ႈဢိူင်ႇဝၢၼ်ႈ ပိုၼ်ႉတီႈ ႁဝ်းလီယူႇ လႄႈၶိုၼ်ႈယႂ်ႇမႂ်ႇသုင်ဢမ်ႇႁၢင်ႉ”- ဝႃႈၼႆ ။


ၸၢႆးၾႃႉမိူင်း (ၸၢႆးမိၼ်ႉ) ဢႃယု 22ပီ ႁဵၼ်းဝႆႉ ႁူင်းႁဵၼ်းၸၼ်ႉသုင်( မေႃး 6 ) တီႈႁူင်းႁဵၼ်း ၼဝမိၼ်းထရႃႊၶျူႊၽႃႊယပ်ႊ ၵဵင်းမႆႇ ၸိုင်ႈထႆးပွတ်းႁွင်ႇ။ ၸိုဝ်ႈပေႃႈ လုင်းဢေႃး ၸိုဝ်ႈမႄႈ ၼၢင်းလီ ၵူၼ်းၵေးသီး ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း ၶဝ်ႈမႃးႁဵတ်း ၵၢၼ်ၼႂ်း မိူင်းထႆးလႆႈ13 ပီ မီးပီႈၼွင်ႉႁူမ်ႈတွင်ႉ 5 ၵေႃႉ ၸၢႆးၾႃႉမိူင်း ပဵၼ်ၵေႃႉထူၼ်ႈ 4 မၼ်းၸၢႆး ၼႆႉလႆႈႁပ်ႉ သူးတၢင်းယၢမ်ႈလီၼႆႉမီးမႃးမွၵ်ႈ 7 ပွၵ်ႈယဝ်ႉ - ဝႃႈၼႆ ။