လူတ်ႉၵႃးတၢင်ႇထၢၼ်ႇႁိၼ် ၶွမ်ႊပၼီႊ ငူၺ်ႇယီႇပလႄး ၸႄႈဝဵင်းသီႇပေႃႉ ႁေႃႈလူတ်ႉၵႃးဝႆး  ၽႃႇၺႃးၵႂၢႆး ၵူၼ်းဝၢၼ်ႈ တၢႆထင်တီႈယဝ်ႉဢမ်ႇဢဝ်ပုၼ်ႈၽွၼ်း ႁေႃႈလူတ်ႉၵႃးပၢႆႈ ။

ၵႂၢႆးၵူၼ်းဝၢၼ်ႈတၢႆ ယွၼ်ႉလူတ်ႉတၢင်ႇထၢၼ်ႇႁိၼ်ၶွမ်ႊပၼီႊ ငူၺ်ႇယီႇပလႄးၽႃႇၺႃး

လူတ်ႉၵႃးၶွမ်ႊပၼီႊ ဢၼ်တိုၵ်ႉၶုတ်းတၢင်ႇထၢၼ်ႇႁိၼ်ယူႇ

ဝၼ်းထီႉ 25/11/2016  ၶၢဝ်းယၢမ်း ၵၢင်ဝၼ်း 1 မူင်းၶိုင်ႈၼၼ်ႉ လူတ်ႉၵႃးလူင် ဢၼ်တၢင်ႇထၢၼ်ႇႁိၼ် ၶွမ်ႊပၼီႊ ငူၺ်ႇယီႇပလႄး လုၵ်ႉတၢင်းၶူဝ်ၼၢင်းၾႃႉ ႁေႃႈၵႂႃႇတၢင်း ဝၢၼ်ႈပဵင်းသၢႆး ဝဵင်းသီႇပေႃႉ။  ႁေႃႈဝႆးလိူဝ်ႁႅင်းလႄႈၽႃႇၺႃးၵႂၢႆး ၸၢႆးဢူးလႃႉ  ၵူၼ်းဝၢၼ်ႈပဵင်းသၢႆးယဝ်ႉ ႁေႃႈလူတ်ႉပၢႆႈ ။


ၵဵဝ်ႇၵပ်းလူၺ်ႈလွင်ႈၼႆႉ ၸၢႆးၶမ်း ၵူၼ်းဝၢၼ်ႈ ပဵင်းသၢႆး လၢတ်ႈဝႃႈ “လွင်ႈဢၼ်ႁေႃႈလူတ်ႉ ၽႃႇၺႃးၵႂၢႆးပိူၼ်ႈယဝ်ႉ ဢမ်ႇလူင်းတူၺ်း၊ ဢမ်ႇယွမ်းႁပ်ႉသေလႅၼ်ႈပၢႆႈၼႆႉ ဢမ်ႇထုၵ်ႇလီပဵၼ် ။ ပွင်ႇဝႃႈ  ဢမ်ႇယွမ်းႁပ်ႉတၢင်းၽိတ်း ။ ဢမ်ႇၼပ်ႉယမ်ၵူၼ်းဝၢၼ်ႈ ”- ဝႃႈၼႆ ။


ၶွမ်ႊပၼီႊငူၺ်ႇယီႇပလႄးၼႆႉ မီးၼႂ်းဢိူင်ႇၼႃးၼိဝ်ႉ  ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ။ ထၢၼ်ႇႁိၼ် ဢၼ်ၶဝ်ၶုတ်းဝႆႉယူႇယၢမ်းလဵဝ် မီးလၢႆလၢႆတီႈ မိူၼ်ၼင်ႇ ႁိမ်းႁူဝ်လွႆပဵင်းသၢႆး၊ ႁိမ်းဝၢၼ်ႈၼႃးၵုၼ်၊  ႁိမ်းဝၢၼ်ႈပၢင်ငႃး ၶူဝ်ၼၢင်းၾႃႉ ၸဵမ်ၸိူဝ်းၼႆႉ ။


မိူဝ်ႈပူၼ်ႉမႃးလၢႆလိူၼ်ၼၼ်ႉၵေႃႈ ယွၼ်ႉပိူဝ်ႈမီးလွင်ႈတုမ်ႉတိူဝ်ႉ တိူၵ်ႇႁႆႈလွၵ်းၼႃး ၸိူဝ်းမီးႁိမ်းႁွမ်း လုၵ်းထၢၼ်ႇႁိၼ်ၼၼ်ႉလႄႈ ၵူၼ်းဝၢၼ်ႈမိူင်းၼမ်ႉမႃႉ ႁူမ်ႈၵၼ်လၢႆလၢႆဝၢၼ်ႈ  ၼႄၵၢင်ၸ်ႂသၢၼ်ၶတ်း။ တုၵ်းယွၼ်း ႁႂ်ႈၵိုတ်းၵၢၼ်ၶုတ်းထၢၼ်ႇႁိၼ် ။ ၵူၺ်းၵႃႈ ၶွမ်ႊပၼီႊ ဢမ်ႇၵိုတ်းဢမ်ႇၵႃး ဝၢႆးပဵၼ်ပၢင်တိုၵ်းၼႂ်းၵႄႈ သိုၵ်းမၢၼ်ႈလႄႈ တပ်ႉသိုၵ်းၸိုင်ႈတႆး SSPP/SSA မႃး  ယင်းယိင်ႈၶႅၼ်းႁိပ်ႈတေႃႉထၢၼ်ႇႁိၼ်ဢွၵ်ႇ။ ၼိုင်ႈဝၼ်းၵႃးသိပ်းသွင်လေႃႉ ၼပ်ႉႁူဝ်သိပ်းလမ်းၼႆ ၵူၼ်းပိုၼ်ႉတီႈလၢတ်ႈ ။


ၸၢႆးတိုၼ်းတိုဝ် ၵူၼ်းပိုၼ်ႉတီႈလၢတ်ႈဝႃႈ-    "ၶွမ်ႊပၼီႊ ငူၺ်ႇယီႇပလႄး ပၼ်ၵႂၢမ်းမၼ်ႈၵူၼ်းမိူင်းဝႆႉဝႃႈ ပေႃးလႆႈၶုတ်းထၢၼ်ႇႁိၼ် တေႁဵတ်းပဵၼ်လွင်ႈႁုၼ်ႈမုၼ်းမႂ်ႇသုင်လႄႈ ၵူႈလွင်ႈလွင်ႈတႃႇၵူၼ်းဝၢၼ်ႈ - ဝႃႈၼႆသေတႃႉ ၶုတ်းထၢၼ်ႇႁိၼ်မႃးလႆႈ သိပ်းပီပၢႆယဝ်ႉ ယင်းပႆႇႁဵတ်းပၼ်သင်။  လွင်ႈၼႆႉ ၵူၼ်းဝၢၼ်ႈ ၵေႃႈဢွၼ်ၵၼ်တုၵ်းယွၼ်းမႃးလၢႆလၢႆပွၵ်ႈ။ ၾၢႆႇၶွမ်ႊပၼီႊဢမ်ႇတုမ်ႉတွပ်ႇ တၵ်းသဵင်သင် သေဢမ်ႇၵႃး ယင်းပၢႆႁိပ်ႈၼႅတ်ႈတေႃႉထၢၼ်ႇႁိၼ်ဢွၵ်ႇပိုၼ်ႉတီႈ ဝၼ်းဝၼ်းၶိုၼ်းၶိုၼ်း၊ ႁေႃႈလူတ်ႉႁေႃႈၵႃးဝႆးလႄႈ ၵမ်းၵမ်းၽႃႇၺႃးၵူၼ်းဝၢၼ်ႈ။ လၢႆးၶဝ်ႁဵတ်းၼႆႉ တုမ်ႉတိူဝ်ႉသိင်ႇဝႅတ်ႉလွမ်ႉလႄႈ တိူၵ်ႇႁႆႈလွၵ်းၼႃးၵူၺ်းဢမ်ႇၵႃး ပဵၼ်ၶဵၼ်တေႃႇဢႃယုသၢႆၸႂ်ၵူၼ်းဝၢၼ်ႈထႅင်ႈလူးၵွၼ်ႇ" - ဝႃႈၼႆ ။


ၶွမ်ႊပၼီႊငူၺ်ႇယီႇပလႄးၼႆႉ ၶုတ်းထၢၼ်ႇႁိၼ် တၢင်းပွတ်းဝၢၼ်ႈလူင် ၊ ဝၢၼ်ႈၼမ်ႉမႃႉၸိူဝ်းၼႆႉမႃး တင်ႈတႄႇပီ 2000 ။ တၢင်းၵႂၢင်ႈတီႈဢၼ် ၶုတ်းထၢၼ်ႇႁိၼ်ၼႆႉ 30 ဢေႊၵႃႊပၢႆပၢႆ ။ ဢိင်ၼိူဝ်ၵၢၼ်ၶုတ်း ထၢၼ်ႇႁိၼ်ၸိူဝ်းၼႆႉသေ သူၼ် ႁႆႈ ၼႃး ပႃႇထိူၼ်ႇတူၼ်ႈမႆႉ ၸိူဝ်းၼႆႉၵေႃႈ လႆႈလူႉသုမ်းၸွမ်းတင်းၼမ် ၊ လူမ်းၵေႃႈဢမ်ႇၸိုၼ်ႈသႂ် ၊ ၼမ်ႉၵေႃႈဢမ်ႇၸိုၼ်ႈသႂ် ၊ ႁဵတ်းႁႂ်ႈၵူၼ်းဝၢၼ်ႈၵူၼ်းသူၼ် ၼႂ်းပိုၼ်ႉတီႈ ၸပ်းတၢင်းပဵၼ် ။


ၵူၼ်းဝၢၼ်ႈၼႃးၵုၼ် လၢတ်ႈဝႃႈ တီႈဝၢၼ်ႈၼႃးၵုၼ်ၼၼ်ႉ ၼိုင်ႈဝၼ်းလူတ်ႉၵႃး 6 လေႃႉ တၢင်ႇထၢၼ်ႇႁိၼ် 50 လမ်း ၊ ၼိုင်ႈလမ်းတၢင်ႇလႆႈ 4 တၼ်ႊ ၊ တၢင်ႇဢွၵ်ႇၵူႈဝၼ်း။ ၵႃႈၶၼ်ထၢၼ်ႇႁိၼ် ၼိုင်ႈတၼ်ႊ တႅမ်ႇသုတ်း 40000 ပျႃး ၊ ပၢၼ်ၵၢင် 50000 ပျႃး၊ ၶႅမ်ႉသုတ်း 80000 ပျႃး ။ ၼိုင်ႈဝၼ်းလႆႈ 200 တၼ်ႊ ။ ၽတ်ႉၽဵင်ႇၶၢႆလႆႈ ပႅတ်ႇသိပ်းသႅၼ် (8,000,000) ၊ ၼိုင်ႈလိူၼ်သမ်ႉ ၶွမ်ႊပၼီႊလႆႈငိုၼ်း 240,000,000 သွင်ႁဵင်သီႇပၢၵ်ႇသႅၼ် ။ ၵူၺ်းၵႃႈၵူၼ်းဝၢၼ်ႈတႄႉဢမ်ႇလႆႈၼမ်ႉတွၼ်းသင်ၸွမ်း။ ၵူၺ်းလႆႈႁူပ်ႉတၢင်းယၢပ်ႇၽိုတ်ႇတႃႇယူႇတႃႇၵိၼ်ၵူၺ်း – ဝႃႈၼႆ ။