ၼၢင်းမူၺ် ၵူၼ်းထုင်ႉပူင်း ၸိုင်ႈတႆး ပွတ်းၸၢၼ်း ၶဝ်ႈႁဵတ်းၵၢၼ် ၼႂ်းၵဵင်းမႆႇ ၸိုင်ႈထႆး မီး 5 လိူၼ်ပၢႆ ၺႃးၸဝ်ႈၼႃႈတီႈပလိၵ်ႈထႆး ၵူတ်ႇထတ်းၵုမ်းၶင်တူဝ်သေ တေသူင်ႇပွၵ်ႈၶိုၼ်းလႅၼ်လိၼ် တႆး-ထႆး ဝႃႈၼႆ ။

ၶႅပ်းႁၢင်ႈ ၸၢႆးလိူၼ်ၶမ်း

ၼၢင်းမူၺ် (ၶ) ၼွင်ႉမူၺ် (ဢႃယု 20 ပီ) ၺႃးတီႉၺွပ်း မိူဝ်ႈဝၼ်းတီႈ 23/11/2016 ထိုင် ဝၼ်းတီႈ 25/11/2016 လႆႈၶိုၼ်ႈသၢၼ် (လုမ်းတႅပ်းတတ်းတြႃး) တီႈလုမ်းဢုပ်ႉပိူင်ႇၽွင်းငမ်း ၸႄႈတွၼ်ႈၵဵင်းမႆႇ ၸိုင်ႈထႆး။ ယွၼ်ႉပဵၼ်ၵူၼ်း လၵ်ႉၶဝ်ႈမိူင်း ဢမ်ႇၸွမ်းပၵ်းပိူင်မၢႆမီႈၼႆသေ  ယူႇတီႈလုမ်းတႅပ်းတတ်းတြႃး ၸီႉသင်ႇႁႂ်ႈသူင်ႇတူဝ်ပွၵ်ႈၶိုၼ်း လႅၼ်လိၼ် တႆး-ထႆး ဝႃႈၼႆ ။


ၼၢင်းသႅင်မိူင်းလီ ၽူႈၼမ်းၼႂ်းသမႃးၶူမ်းပၢႆးပၺ်ၺႃလႄႈ ၾိင်ႈငႄႈတႆး ၵဵင်းမႆႇ လၢတ်ႈဝႃႈ “ ႁဝ်းၶႃႈ လၢႆလၢႆၵေႃႉ လၢႆလၢႆၸုမ်း ၼႂ်းၵဵင်းမႆႇ ဢွၼ်ၵၼ်ၸွႆႈ တဵမ်ထူၼ်ႈယဝ်ႉ၊ ၵူၺ်းၵႃႈ ဢမ်ႇၸၢင်ႈႁဵတ်းႁိုဝ် ယူႇတီႈ လုမ်းတြႃးၸႄႈတွၼ်ႈၵဵင်းမႆႇ တႅပ်းတတ်းတြႃး ၸွမ်းၼင်ႇပၵ်းပိူင်မၢႆမီႈ ဝၢၼ်ႈမိူင်းမီး ၼၼ်ႉၵူၺ်းၶႃႈ၊ သင်ဝႃႈ ၶိုၼ်းသၢၼ်(လုမ်းတြႃး) တႅပ်းတတ်းယဝ်ႉၸိုင် တူဝ်ၼွင်ႉမူၺ်ၼႆႉ တေထုၵ်ႇသူင်ႇ ထိုင် ၸဝ်ႈၼႃႈတီႈပလိၵ်ႈၾၢႆႇၵူတ်ႇထတ်းၵူၼ်းၶဝ်ႈမိူင်း၊ ယဝ်ႉၵေႃႈ ယူႇတီႈ ၸဝ်ႈၼႃႈတီႈၶဝ် သမ်ႉတေ ၵုမ်းၶင်တူဝ်ဝႆႉတီႈၶွၵ်ႈ ၵဵင်းမႆႇ တႃႇၶၢဝ်းတၢင်းလိူၼ်ပၢႆ ယဝ်ႉ ၸင်ႇတေ သူင်ႇပွၵ်ႈၶိုၼ်း တီႈလႅၼ်လိၼ် တႆး-ထႆး ဝႃႈၼႆ ။


သိုပ်ႇလၢတ်ႈထႅင်ႈဝႃႈ ယူႇတီႈၶႃႈႁဝ်းတႄႉ ၶႂ်ႈပၼ်တၢင်းႁၼ်ထိုင် ၼိူဝ်ပီႈၼွင်ႉၵူၼ်းမိူင်းတႆး ႁဝ်းၶႃႈ ၸိူဝ်းတေၶဝ်ႈမႃးႁဵတ်းၵၢၼ်ၼႂ်းမိူင်းထႆး ႁႂ်ႈဢွၼ်ၵၼ်လဵပ်ႈႁဵၼ်း လွင်ႈၼႂ်းဝၢၼ်ႈမိူင်းပိူၼ်ႈ၊ လွင်ႈပၵ်းပိူင်မၢႆမီႈဝၢၼ်ႈမိူင်းပိူၼ်ႈ၊ လွင်ႈၵႂႃႇမႃး ၶဝ်ႈဢွၵ်ႇၼႂ်းမိူင်းပိူၼ်ႈ တေလႆႈၸႂ်ႉဝတ်းဝႂ်သင် ၸဵမ်ၸိူဝ်းၼႆႉ၊ ယဝ်ႉၵေႃႈ သင်တူၵ်းတၢင်းယၢပ်ႇၽိုတ်ႇၼႂ်းမိူင်းပိူၼ်ႈလူး တေလႆႈၵပ်းသိုပ်ႇႁႃ ၸုမ်းၸွႆႈလိူဝ်ဢၼ်လႂ် ၸဵမ်ၸိူဝ်းၼႆႉ ၶႂ်ႈႁႂ်ႈဢွၼ်ၵၼ်လဵပ်ႈႁဵၼ်း၊ ဢွၼ်ၵၼ်ႁဵၼ်းႁူႉၵွၼ်ႇ ၸင်ႇတေၶဝ်ႈမႃး ၼႂ်းမိူင်းပိူၼ်ႈ ၸင်ႇတေလီ ဝႃႈၼႆ ။


ၸၢႆးလိူၼ်ၶမ်း ၽူႈတူင်ႉၼိုင်ၼႂ်းတူင်ႇဝူင်းတႆး ၼႂ်းၵဵင်းမႆႇ လၢတ်ႈဝႃႈ “ ႁဝ်းၶႃႈ  ဢွၼ်ၵၼ်ၸွႆႈထႅမ် မၼ်းၼၢင်းတဵမ်ထူၼ်ႈယဝ်ႉ၊ ႁဝ်းၶႃႈလႆႈႁၼ်လုၵ်ႈဢွၼ်ႇတႆးႁဝ်းၶႃႈ ထုၵ်ႇၺႃး ၸိူင်ႉၼႆ ၸႂ်ႁဝ်းၶႃႈၵေႃႈဢမ်ႇလီ၊ ထႅင်ႈၾၢႆႇၼိုင်ႈၵေႃႈ မၼ်းၼၢင်းတိုၵ်ႉဢႃယုလဵၵ်ႉယူႇၵေႃႈပိူင်ၼိုင်ႈ၊ ဝတ်းဝႂ်ၵေႃႈဢမ်ႇမီး၊ တိုၵ်ႉၶဝ်ႈမႃးႁဵတ်းၵၢၼ် ပႆႇႁိုင်ၵေႃႈပိူင်ၼိုင်ႈ တေလႆႈဝႃႈ လီဢေႉလူတႄႉတႄႉ။ ၵူၺ်းၵႃႈ ဢမ်ႇလိူဝ် လႆႈ ၸွမ်းၼင်ႇပၵ်းပိူင် မၢႆမီႈဝၢၼ်ႈမိူင်းပိူၼ်ႈ၊ တၵ်းတေ လႆႈထုၵ်ႇသူင်ႇပွၵ်ႈမိူဝ်းၶိုၼ်း။ ပီႈၼွင်ႉတႆးၸိူဝ်း ဢမ်ႇမီးဝတ်းဝႂ်သင်၊ ၽိတ်းတီႈ ႁဵတ်းၵၢၼ် ၸိူဝ်းၼႆႉ ဢၼ်ၺႃးတီႉၺွပ်းသေ ဢၼ်ႁဝ်းဢမ်ႇႁူႉၸွမ်းယင်းတေမီးတင်းၼမ် ဝႃႈၼႆ ။


သိုပ်ႇလၢတ်ႈထႅင်ႈဝႃႈ ယူႇတီႈၸုမ်းၸွႆႈထႅမ်ႁႅင်းၵၢၼ်သေ ဢမ်ႇၸၢင်ႈၸွႆႈမၼ်းၼၢင်းလႆႈၼၼ်ႉ ယွၼ်ႉပိူဝ်ႈ ႁၢင်ႈမၼ်းၼၢင်းၽႄႈမိူဝ်ဝႆႉ ၼိူဝ် Facebook သေ ပဵၼ်ၶၢဝ်ႇလူင်လၢင်ဝႆႉယဝ်ႉ။  တီႈတႄႉ လွင်ႈပၼ်ႁႃၸိူင်ႉၼႆ ႁဝ်းထုၵ်ႇလီဢွၼ်ၵၼ် ၸွႆႈၵၼ်ၶိုင် ဝႃႈ ၶေႃႈမုလ်းဢၼ်ႁဝ်းလႆႈမႃးၼၼ်ႉ တေသူင်ႇပၼ်ၸုမ်းလႂ် ဢၼ်ၵဵဝ်ႇၶွင်ႈ ႁႅင်းၵၢၼ် ႁဝ်းလူဝ်ႇလႆႈ သူင်ႇပၼ်ၸုမ်းၵဵဝ်ႇၶွင်ႈမၼ်းၵမ်းသိုဝ်ႈ ပေႃးပဵၼ်ၸိူင်ႉၼႆ တေလီႁိုဝ်- ဝႃႈၼႆ ။


ၼၢင်းမူၺ်ၼႆႉ ဢမ်ႇမီးဝတ်းဝႂ်သင် ၶဝ်ႈမႃး ႁဵတ်းၵၢၼ်ၼႂ်းၵဵင်းမႆႇ တိုၵ်ႉမီး ၶၢဝ်းတၢင်း 5 လိူၼ်ပၢႆ၊ မိူဝ်ႈပူၼ်ႉမႃး သွင်လိူၼ်ၼၼ်ႉ ႁဵတ်းၵၢၼ်မႄႈဝၢၼ်ႈတီႈ ၸႄႈဝဵင်းမႄႈရိမ်း ၸႄႈတွၼ်ႈ ၵဵင်းမႆႇ တၼ်းႁဵတ်းသွင်လိူၼ်ပၢႆ ဢမ်ႇလႆႈငိုၼ်းၵႃႈၸၢင်ႈသေဝၢတ်ႇသေ ဢွၵ်ႇမႃးႁဵတ်း ၵၢၼ် တီႈၵၢတ်ႇ ထႃးၼိၼ်း ပႆႇပေႃးႁိုင် တၼ်းလႆႈ 3-4 ဝၼ်း၊ ထိုင်မႃး ဝၼ်းတီႈ 23/11/2016 သမ်ႉ ထုၵ်ႇၸဝ်ႈၼႃႈ တီႈပလိၵ်ႈထႆး ၶဝ်ႈၵူတ်ႇထတ်းၼႂ်းၵၢတ်ႇသေ တီႉၺွပ်းလႆႈ တူဝ်မၼ်းၼၢင်း လူၺ်ႈဢမ်ႇမီး ဝတ်းဝႂ် လႄႈ ၽိတ်းတီႈႁဵတ်းၵၢၼ် ၼႆသေ တီႉၺွပ်းၵႂႃႇ ။