ပီႈၼွင်ႉႁႅင်းၵၢၼ်တႆး ၼႂ်းၵဵင်းမႆႇ တင်းၼမ်လၢႆ ဢွၼ်ၵၼ်ၵႂႃႇၶဝ်ႈႁူမ်ႈ တႆႈၾႆးတဵၼ်းလႄႈ ၼႄလွင်ႈ သဝ်ႈမွင်ၸွမ်း ၸဝ်ႈမုၼ်ယႂ်ႇၶုၼ်ႁေႃၶမ်းထႆး လပ်းတႃ ၼွၼ်းၽႄး ၶဝ်ႈပူၺ်ႈသူၼ်မၢၵ်ႇ ႁၢၵ်ႈၶမ်း ။

ဝၼ်းတီႈ 02/11/2016 ယၢမ်းၵၢင်ၶမ်ႈ 06:39 မူင်း ၸၢႆးသႅင်မိူင်း မင်းၵွၼ်း ၽူႈၵွၼ်းႁူင်းပွႆႇသဵင် ပၼ်ပိုၼ်ႉႁူႉၸၢဝ်းၶိူဝ်း FM 99.00 Mhz ဢွၼ်ႁူဝ်ၼမ်းၼႃႈ ပီႈၼွင်ႉႁႅင်းၵၢၼ်တႆး ၵဵင်းမႆႇ ၶဝ်ႈႁူမ်ႈ ၼႄလွင်ႈသဝ်ႈမွင်ၸႂ်၊ တႆႈၾႆးတဵၼ်း သူင်ႇပွၼ်းထိုင် ၸဝ်ႈမုၼ်ယႂ်ႇ ၶုၼ်ႁေႃၶမ်းထႆး ႁႂ်ႈႁွတ်ႈသူႇ သုၵတိတီႈၵတ်းယဵၼ်။ ပၢင်ၼႄလွင်ႈသဝ်ႈမွင်ၼႆႉ ၸတ်းႁဵတ်း တီႈသူၼ်မွၵ်ႇႁေႃၶမ်းလူင် ရၢတ်ႉၶျ ၽရိုၵ်း ဝဵင်းၵဵင်းမႆႇ ၸိုင်ႈထႆး ။


ၸၢႆးသႅင်မိူင်း မင်းၵွၼ်း ၽူႈၵွၼ်းႁူင်းပွႆႇသဵင်လၢတ်ႈဝႃႈ “ ပၢင်ၼႄလွင်ႈသဝ်ႈမွင်ၼႆႉ ယူႇတီႈၽူႈၵွၼ်းၸႄႈတွၼ်ႈၵဵင်းမႆႇ လႄႈ ၽူႈယႂ်ႇၵူၼ်းလူင်လၢႆလၢႆၾၢႆႇ လႆႈဢွၼ်ၸတ်းႁဵတ်း။ မွင်ၸႂ်ၸွမ်း ၸဝ်ႈမုၼ်ယႂ်ႇၶုၼ်ႁေႃၶမ်းလႆႈၼွၼ်းၽႄးၵႂႃႇ။ ၵွပ်ႈၼႆလႄႈ တႆးႁဝ်းၵေႃႈလႆႈ မႃးပိုင်ႈဢိင် ပႃႇရမီႇၸဝ်ႈႁဝ်း ဢၼ်ၸဝ်ႈမုၼ်ယႂ်ႇ ၶုၼ်ႁေႃၶမ်း လႆႈတူၺ်းထိုင် ၼိူဝ်တႆးႁဝ်းမႃး ။


ၸၢႆးၶိူဝ်း ပီႈၼွင်ႉႁႅင်းၵၢၼ်တႆး ၽူႈၶဝ်ႈႁူမ်ႈၵေႃႉၼိုင်ႈလၢတ်ႈဝႃႈ “ ၼႂ်းဝၼ်းမိူဝ်ႈၼႆႉၵေႃႈ ဢိင်ၼိူဝ် တၢင်းၸႄႈတွၼ်ႈၵဵင်းမႆႇ လႆႈၸတ်းႁဵတ်းပၢင်သဝ်ႈမွင်ၸႂ်ၸွမ်း ၸဝ်ႈမုၼ်ယႂ်ႇၶုၼ်ႁေႃၶမ်း လႆႈၼွၼ်းၽႄးၵႂႃႇ။ ယွၼ်းတိူင်ႇၵၢဝ်ႇႁႂ်ႈဝိၺၢၼ်ႇၶႂၼ်ငဝ်း ၸဝ်ႈႁဝ်းၵႂႃႇႁွတ်ႈတီႈလီ တီႈၵတ်းယဵၼ် သေၵမ်း ဝႃႈၼႆ ။


ပၢင်ၼႄလွင်ႈသဝ်ႈမွင်ၸွမ်း ၸဝ်ႈမုၼ်ယႂ်ႇၶုၼ်ႁေႃၶမ်း ၼွၼ်းၽႄးၼႆႉ ယူႇတီႈၽူႈၵွၼ်းၸႄႈ တွၼ်ႈၵဵင်းမႆႇလႄႈ ၽူႈယႂ်ႇၵူၼ်းလူင်လၢႆလၢႆၾၢႆႇၼႂ်းၵဵင်းမႆႇ ဢွၼ်ႁူဝ်ၸတ်းႁဵတ်း “ၵူၼ်းမိူင်း ၼႂ်းပိုၼ်ႉတီႈ ၵူႈၸၢဝ်းၶိူဝ်း ၸိူဝ်းယူႇၼႂ်းၸႄႈတွၼ်ႈၵဵင်းမႆႇတင်းသဵင်ႈ  ႁႂ်ႈမီးသုၼ်ႇၶဝ်ႈႁူမ်ႈႁဵတ်း ၵၢၼ်တၢင်းလီပၼ်ၸဝ်ႈမုၼ်ယႂ်ႇၶုၼ်ႁေႃၶမ်း ဝႃႈၼႆ ။


ၸဝ်ႈမုၼ်ယႂ်ႇၶုၼ်ႁေႃၶမ်းထႆး ၽူးမိၽူလ်း ဢၻုလ်းယၻဵတ်ႇ၊ ဢႃယု ၸဝ်ႈ 89၊ ၽွင်းငမ်းႁၢင်ႈ ႁေႃ 70 ပီပၢႆ ၼွၼ်းၽႄး သဵင်ႈမုၼ်ၵႂႃႇ မိူဝ်ႈဝၼ်းတီႈ 13/10/2016 ၶၢဝ်းယၢမ်း 15:52 မူင်း၊ တီႈႁူင်းယႃ လူင်သီရိရၢတ်ႉ မိူင်းၵွၵ်ႇ ၸိုင်ႈထႆး ။