ၸဝ်ႈၼႃႈတီႈပလိၵ်ႈထႆး၊ သိုၵ်းထႆးႁူမ်ႈၵၼ်တီႉၺွပ်းလႆႈယႃႈမဝ်းၵမ်၊ယႃႈဢႆႉသ် ဢဝ်မႃးတၢင်းၾင်ႇ မိူင်းမၢၼ်ႈ ဢၼ်တေႃႇၼႃႈၵၼ်တင်း ၸႄႈတွၼ်ႈမႄႈႁွင်ႈသွၼ် ၸိုင်ႈထႆးပွတ်းႁွင်ႇ - ဝႃႈၼႆ ။

ၸဝ်ႈၼႃႈတီႈ လၢတ်ႈဝႃႈ - “ မိူဝ်ႈဝၼ်းတီႈ 23/11/2016 ၼၼ်ႉ ႁဝ်းၶႃႈလႆႈတင်ႈလၢၼ်ႇ ၵူတ်ႇထတ်း ႁိမ်းႁွမ်းသဵၼ်ႈတၢင်း ဝၢၼ်ႈမိူင်းၼွႆႉ - ပၢႆး ဢိူင်ႇဝဵင်းၼိူဝ် ၸႄႈဝဵင်းပၢႆး ၸႄႈတွၼ်ႈမႄႈႁွင်ႈသွၼ်  ၽွင်းၶၢဝ်းယၢမ်း မွၵ်ႈ 10:00 မူင်း မီးၵူၼ်းႁေႃႈၵႃးဝႅၼ်ႇမႃး ၸိုဝ်ႈ ၸၢႆးၽိၶျိတ်ႉ ၶျူၵ်ႉၽၵ်းၶျိတ်ႉ ၽွၼ်ႊ ပဵၼ်ၵူၼ်းမႄႈႁွင်ႈသွၼ် ၸဝ်ႈၼႃႈတီႈယွၼ်းၵူတ်ႇထတ်းသေထူပ်းႁၼ်ယႃႈမႃႉ 170,000 မဵတ်ႉ ယႃႈဢႆႉသ် 3 ၵီႊလူဝ်ႊ ၸင်ႇတီႉ ၺွပ်းတူဝ်ပၼ်တူတ်ႈတၢမ်ႇလႄႈ ႁဝ်းၶႃႈတေသိုပ်ႇ ၸွမ်းႁႃ ၼႅင်ႈသၢၼ်( ၶိူဝ်ၶၢႆႇ) ၵႂႃႇ ”ဝႃႈၼႆ ။


ၸိူင်ႉၼၼ်ၼင်ႇၵဝ်ႇ မိူဝ်ႈဝၼ်းတီႈ 16/11/2016 ၼၼ်ႉၵေႃႈ သိုဝ်ႇၶၢဝ်ႇထႆးပိုၼ်ၽၢဝ်ႇဝႃႈ -  ၸဝ်ႈၼႃႈတီႈပလိၵ်ႈ တီႈမႄႈႁွင်ႈသွၼ်လႄႈ ၵဵင်းမႆႇ ႁူမ်ႈၵၼ်တီႉၺွပ်း ၸၢႆးသရၼ်ႊ ဝူင်ႊသူႊဝႃႊၻႅၼ်ႊ ဢႃယု 21 ပီ ပဵၼ် ၵူၼ်းမိူင်းၾၢင် ၸႄႈတွၼ်ႈၵဵင်းမႆႇ ၸိုင်ႈထႆး  ႁူမ်ႈပႃးထႅင်ႈဢူၺ်းၵေႃႉမၼ်းၸၢႆး။တီႉလႆႈယႃႈမႃႉမိၵ်ႈ WY တႃႇ100မတ်ႉ၊မီး 200,000  မဵတ်ႉ ။ ယႃႈမဝ်းၵမ် ၸိူဝ်းၼႆႉဢဝ်လုၵ်ႉတီႈ လႅၼ်လိၼ်ထႆး-မၢၼ်ႈ မႄႈႁွင်ႈသွၼ်မႃး- ဝႃႈၼႆ ။


ၶၢဝ်ႇၸဝ်ႈၼႃႈတီႈ ၸွမ်းလႅၼ်လိၼ်ပိုၼ်ၽၢဝ်ႇဝႃႈ ၸွမ်းလႅၼ်လိၼ် ဢၼ်တေႃႇၼႃႈတင်းမႄႈ ႁွင်ႈ သွၼ်ၼႆႉ မီးၸၢဝ်းၶိူဝ်းလၢႆၸုမ်းယူႇသဝ်း မီးႁူင်းၵၢၼ်ႁဵတ်းဢွၵ်ႇယႃႈမဝ်းၵမ်မိူၼ်ၼင်ႇ ယႃမႃႉ၊ယႃႈ ဢႆႉသ်ဢမ်ႇယွမ်း 12 ႁူင်း ယႃႈမဝ်းၵမ်ၸိူဝ်းၼႆႉ လၵ်ႉဢဝ်ၶဝ်ႈမႃးတၢင်းၸႄႈဝဵင်းမိူင်းပၢႆး ၊ၸႄႈဝဵင်း ပၢင်မၢၵ်ႇၽႃႈ ၸႄႈတွၼ်ႈမႄႈႁွင်ႈသွၼ် ၶဝ်ႈဝဵင်းၵဵင်းမႆႇဢမ်ႇထၢတ်ႇ-  ဝႃႈၼႆ ။