ၸုမ်းၵဝ်ႉငဝ်ႈသုၼ်ႇလႆႈၵူၼ်း ၸိုင်ႈတႆး ဢွၵ်ႇလိၵ်ႈၽိုၼ်တၢမ်းငဝ်းလၢႆး ႁႂ်ႈသိုၵ်းလူင်ပွင် ၸိုင်ႈမၢၼ်ႈ ၵိုတ်းၵၢၼ်သူင်ႇႁႅင်း သိုၵ်းၶဝ်ႈၼႂ်းလိၼ်ၸၢဝ်းၶိူဝ်း။ ယွၼ်ႉပိူဝ်ႈသိုၵ်းသေ ၵူၼ်းမိူင်း ထုၵ်ႇတီႉၺွပ်း ပေႃႉထုပ်ႉ ၶႃႈႁႅမ်၊ လူႉသုမ်းၶူဝ်းၶွင်း ၸဵမ်ၸိူဝ်းၼႆႉ ဝႃႈၼႆ ။

ဝၼ်းတီႈ 29/11/2016 ၸုမ်းၵဝ်ႉငဝ်ႈသုၼ်ႇလႆႈၵူၼ်း ၸိုင်ႈတႆး( SHRF ) ဢွၵ်ႇၽိုၼ် တၢမ်းငဝ်းလၢႆး လွင်ႈသိုၵ်းမၢၼ်ႈၶႃႈႁႅမ်၊ တီႉၺွပ်းၵုမ်းၶင်ၵူၼ်းဝၢၼ်ႈလႄႈ သွၵ်ႈတဝ်ယႃႉ ဢဝ်ၶူဝ်းၶွင် ၵူၼ်းဝၢၼ်ႈ ၽွင်းႁွၼ်ႈထဝ်ႇတဝ်ႁႃ သိုၵ်း SSPP/SSA ၼႂ်းၸႄႈဝဵင်းၼွင်ၶဵဝ်၊ ၸႄႈဝဵင်းသီႇ ပေႃႉ လႄႈ ၸႄႈဝဵင်းမိူင်းသူႈ၊ မိူဝ်ႈၼႂ်း လိူၼ် ဢွၵ်ႊထူဝ်ႊၿိူဝ်ႊ ပီ 2016 ။ တုၵ်းယွၼ်းထိုင် ႁႂ်ႈသိုၵ်း မၢၼ်ႈၵိုတ်းယိုတ်း ၵၢၼ်ထူဝ်းသိုၵ်း ၽိုတ်ႉၶဝ်ႈၼႂ်းပိုၼ်ႉတီႈၸုမ်းယိပ်းၵွင်ႈၵၢင်ႇ ယွၼ်ႉမီးလွင်ႈတိုၵ်း ယိုဝ်းၵၼ်မႃး ဢၼ်ၺႃးၸၢၵ်ႇတုမ်ႉ တိူဝ်ႉလိူဝ်ပိူၼ်ႈ ပဵၼ်ၵူၼ်းမိူင်း ဝႃႈၼႆ ။


ၸၢႆးႁေႃသႅင် ၽူႈၶၢၼ်ပၢၵ်ႇ ၸုမ်းၵဝ်ႉငဝ်ႈသုၼ်ႇလႆႈၵူၼ်း ၸိုင်ႈတႆး လၢတ်ႈဝႃႈ “  ယိူင်း ဢၢၼ်းဢၼ်လႆႈဢွၵ်ႇတႄႉ 1) ႁဝ်းၶႃႈသၢၼ်ၶတ်းလွင်ႈသိုၵ်းမၢၼ်ႈယိုဝ်းၵူၼ်းမိူင်း။ 2) ႁဝ်းၶႃႈ တုၵ်းယွၼ်းႁႂ်ႈမီးလွင်ႈၵူတ်ႇထတ်း မီးလွင်ႈၸႅင်ႈလႅင်းသေ ႁႂ်ႈသိုၵ်းမၢၼ်ႈ ႁပ်ႉပုၼ်ႈ ၽွၼ်း လွင်ႈလႆႈပူၼ်ႉပႅၼ်ယိုဝ်းတၢႆတႄႉ ။


သိုပ်ႇလၢတ်ႈထႅင်ႈဝႃႈ ၼွၵ်ႈသေၼၼ်ႉ ႁဝ်းၶႃႈၶႂ်ႈႁႂ်ႈသိုၵ်ႈမၢၼ်းၵိုတ်းၵၢၼ်ထူဝ်းသိုၵ်း ၽိုတ်ႉ ၶဝ်ႈၼႂ်းပိုၼ်ႉတီႈၸၢဝ်းၶိူဝ်းဢၼ် ႁဵတ်းႁႂ်ႈ လွင်ႈယုမ်ႇယမ်ၶၵ်ႉၵၢၼ် လွင်ႈငမ်းယဵၼ် လူတ်းယွမ်း။ ပေႃးမီးလွင်ႈတိုၵ်းယိုဝ်းၵၼ်မႃး ဢၼ်ၺႃးၸၢၵ်ႇတုမ်ႉ တိူဝ်ႉလိူဝ်ပိူၼ်ႈ သမ်ႉပဵၼ်ၵူၼ်းမိူင်းၵူၺ်း ဝႃႈၼႆ ။


ၵဵဝ်ႇၵပ်းလွင်ႈသိုၵ်းမၢၼ်ႈထူဝ်းသိုၵ်း ၶဝ်ႈမႃးၼႂ်းမိူင်းတႆး ပွတ်းႁွင်ႇတင်းပွတ်းၸၢၼ်း မိူၼ် ၼႂ်းၸႄႈ ဝဵင်းၼွင်ၶဵဝ် ပူၼ်ႉမႃး ဝၼ်းတီႈ 10/10/2016 ယၢမ်းဝၢႆးဝၼ်း 1:30 မူင်းပၢႆၼၼ်ႉ ၸၢႆးသူၺ်ႇ ဢႃယု 27 ၵူၼ်းဝၢၼ်ႈလၢင်းၼူမ်း ၺႃးၵွင်ႈသိုၵ်းမၢၼ်ႈ သေတၢႆၼွၵ်ႈဝၢၼ်ႈ လွႆၶႂၢင်၊ ၵူၼ်းဝၢၼ်ႈ လၢင်းၼူမ်း ထႅင်ႈၵေႃႉၼိုင်ႈ ၸၢႆးၸေႃး ဢႃယု 18 တႄႉလႅပ်ႈၺႃးၺွပ်း သေယင်းပႆႇ မီးၽႂ်ႁူႉၸွမ်းဝႃႈ မၼ်းမီး တီႈလႂ်၊ ထႅင်ႈလွင်ႈၼိုင်ႈသမ်ႉ ပူၼ်ႉမႃး ဝၼ်းတီႈ 19/10/2016 ၼၼ်ႉ လုင်းသူၺ်ႇၶမ်း ၸၢဝ်းၼႃး ၵေႃႉၼိုင်ႈ လူင်းႁူင်းယႃတီႈဝဵင်းလိူဝ်ႇ (မၼ်းတလေး)သေ ပွၵ်ႈၶိုၼ်းတီႈဝၢၼ်ႈသူမ်ႈသၢႆႇ၊ ၶိုၼ်းၼၼ်ႉၵူၺ်းၼင်ႇၵဝ်ႇ ၶၢဝ်းယၢမ်းၵၢင်ၼႂ် 2:30 မူင်းၼၼ်ႉသိုၵ်းမၢၼ်ႈ တပ်ႉၶမယ 114 တင်း 115 ၼွင်ၶဵဝ် ဢဵၼ်ႁႅင်းသိုၵ်းမၢၼ်ႈ မွၵ်ႈ 40 လွမ်ႉႁွပ်ႈႁိူၼ်းသေ ယႃႉၽၵ်းတူ ၶဝ်ႈသွၵ်ႈတဝ်ႈၶူဝ်းႁိူၼ်းယေး တီႉၺွပ်းတူဝ်လုင်းသူၺ်ႇၶမ်း ၵႂႃႇၸဵမ်ၸိူဝ်းၼႆႉ ။


မိူဝ်ႈဝၼ်းတီႈ 23/11/2016 သိုၵ်းမၢၼ်ႈ တပ်ႉၶမယ 147 တင်း 291 ၼမ်ႉပွင်ႈဢဵၼ်ႁႅင်း 120 ပၢႆ တိုၵ်းယိုဝ်းပႃႇတီႇမႂ်ႇသုင်ၸိုင်ႈတႆး/တပ်ႉသိုၵ်းၸိုင်ႈတႆး SSPP/SSA ႁိမ်းဝၢၼ်ႈၼႃးလေႃႉ ႁဵတ်းႁႂ်ႈၵူၼ်းမိူင်းၸဵတ်းဝၢၼ်ႈ ၼႂ်းပိုၼ်ႉတီႈ 2000 ပၢႆ လႆႈပၢႆႈၽေးသိုၵ်း ၵႂႃႇပိုင်ႈႁူမ်ႈၼႂ်းဝဵင်းသီႇပေႃႉလႄႈ ၸွမ်းဝၢၼ်ႈႁိမ်းႁွမ်း၊ ဝၢႆးၼၼ်ႉ သိုၵ်းမၢၼ်ႈသွၵ်ႈတဝ်ယႃႉဢဝ်ၶူဝ်းၶွင်ၵူၼ်းဝၢၼ်ႈၼႃးလေႃႉ ၸဵမ်ၸိူဝ်းၼႆႉ။ ပၢင်တိုၵ်းၵိူတ်ႇၶိုၼ်ႈၶၢဝ်းယၢမ်း 7:00 ၵၢင်ၼႂ် တၼ်းႁိုင်မွၵ်ႈၼိုင်ႈမူင်းပၢႆၼၼ်ႉ ၵူၼ်းဝၢၼ်ႈလွမ်ၵူဝ်သိုၵ်းမၢၼ်ႈသေ ၵူၼ်းဝၢၼ်ႈ ၼႃးလေႃႉ၊ ၸႄႈၶၢၼ်၊ ၼမ်ႉၽၢတ်ႇ၊ ၼမ်ႉၶႅဝ်း၊ ၼမ်ႉႁူၵ်း၊ ဝၢၼ်ႈၶၢႆး၊ ဝၢၼ်ႈၶူး ၸဵမ်ၸိူဝ်းၼႆႉ ဢွၼ်ၵၼ်ပၢႆႈ ၵႂႃႇပိုင်ႈႁူမ်ႈဝတ်ႉဝႃး(ၵျွင်း) ႁိမ်းႁွမ်းၼႂ်းပိုၼ်ႉတီႈမွၵ်ႈၼိုင်ႈဝူင်ႈ ဝႃႈၼႆ ။


ဝၼ်းတီႈ 26/11/2016 ၵူၼ်းဝၢၼ်ႈၸၢဝ်းၼႃး ဢႃယု 40 ၸိုဝ်ႈႁွင်ႉလုင်းသု ယူႇဝၢၼ်ႈၶူဝ်ၸူမ် ဢိူင်ႇပၢင်ႇၸွႆး ၸႄႈဝဵင်းမိူင်းသူႈ ၶီႇလူတ်ႈၶိူင်ႈမႃးသေ ထုၵ်ႇသိုၵ်းမၢၼ်ႈယိုဝ်းတၢႆ ၽွင်းတိုၵ်ႉၶပ်ႉႁေႃႈလူတ်ႉလတ်းၽၢၼ်ႇၵႂႃႇတီႈလၢၼ်ႇ(ၵဵတ်ႊ) ၵူတ်ႇထတ်း မိူင်းသူႈ ဝႃႈၼႆ ။


ၵဵဝ်ႇၵပ်းလွင်ႈၼႆႉသေ ယူႇတီႈၸုမ်းၵဝ်ႉငဝ်ႈသုၼ်ႇလႆႈၵူၼ်း ၸိုင်ႈတႆး တုၵ်းယွၼ်းႁႂ်ႈမီးလွင်ႈၵူတ်ႇထတ်းဢၼ်မီးလွင်ႈၸႅင်ႈလႅင်း ၵဵဝ်ႇၵပ်းလိူင်ႈၸိူဝ်းၼႆႉလႄႈ တုၵ်းယွၼ်းႁႂ်ႈသိုၵ်းမၢၼ်ႈႁပ်ႉဢဝ်ပုၼ်ႈၽွၼ်းလွင်ႈလႆႈယိုဝ်းၵူၼ်းတၢႆ၊ ၵုမ်းၶင်ၵူၼ်းမိူင်းလႄႈ သွၵ်ႈတဝ်ဢဝ်ၶူဝ်းၶွင်ၵူၼ်းမိူင်း ၸဵမ်ၸိူဝ်းၼႆႉ ဝႃႈၼႆ ။