ၵူၼ်းၼုမ်ႇ ၸႄႈဝဵင်းပၢင်လူင် တမ်ယၢမ်း တႃႇႁဵတ်းႁူင်းၾႆးမိၼ် ယၢမ်းတႅၵ်ႇသႂ်ႇလႄႈ  လူႉတၢႆ 1 ၵေႃႉ မၢတ်ႇၸဵပ်း 6 ၵေႃႉ ဝႃႈၼႆ ။

Photo by Thura Aung Facebook

ဝၼ်းတီႈ 23/11/2016 ယၢမ်းၵၢင်ၶမ်ႈ 08:00 မူင်း မွင်ႇယႄးလိၼ်းဢူး ႁွင်ႉ ၵျုတ်ႉၸီႇ ဢႃယု 16 ပီ လႄႈ ဢူၺ်းၵေႃႉၸူဝ်းၵၼ်တမ်ယၢမ်းတႃႇႁဵတ်းႁူင်းၾႆးမိၼ် ယၢမ်းတႅၵ်ႇသႂ်ႇလႄႈ ယႄးလိၼ်း ဢူး လုၵ်ႈၸၢႆး ၵူဝ်ႇမွင်ႇဢေး တင်းမဢေးၵျၢႆႇ ပွၵ်ႉ 2 ၸႄႈဝဵင်းပၢင်လူင် ၸႄႈတွၼ်ႈလွႆလႅမ် ၸိုင်ႈတႆး ပွတ်းၸၢၼ်း မၢတ်ႇၸဵပ်းလိူဝ်ႁႅင်းသေ လူႉတၢႆ တီႈႁူင်းယႃဝဵင်းလွႆလႅမ်၊  6 ၵေႃႉမၢတ်ႇၸဵပ်းႁၢဝ်ႈ ႁႅင်း။ 3 ၵေႃႉ လႆႈသူင်ႇၵႂႃႇႁူင်းယႃဝဵင်းတူၼ်ႈတီး ဝႃႈၼႆ ။


ၸၢႆးသူၺ်ႇထုၼ်း ၽူႈၵွၼ်း ပွၵ်ႉမၢႆ 2 လၢတ်ႈဝႃႈ “ ၵေႃႉၼိုင်ႈ တၢႆတီႈႁူင်းယႃ လွႆလႅမ်၊ ထႅင်ႈသၢမ်ၵေႃႉသမ်ႉ မၢတ်ႇၸဵပ်းႁၢဝ်ႈႁႅင်းသေ ယၢမ်းၵၢင်ၶမ်ႈ ဝၼ်းတီႈ 23 ၼၼ်ႉၵမ်းလဵဝ် သူင်ႇ ၵႂႃႇတီႈႁူင်းယႃလူင် ဝဵင်းတူၼ်ႈတီး၊ ထႅင်ႈ 3 ၵေႃႉတႄႉ သူင်ႇယူတ်း ယႃတူဝ်ဝႆႉတီႈ ႁူင်းယႃ လွႆလႅမ်။ယွၼ်ႉဝႃႈ ယၢမ်းၼၼ်ႉ မၼ်းတႅၵ်ႇႁၢဝ်ႈႁႅင်းၼႃႇသေ ယူႇတီႈ ၸဝ်ႈၼႃႈတီႈပလိၵ်ႈၶဝ် တိုၵ်ႉၵူတ်ႇထတ်း လွင်ႈၼႆႉဝႆႉယူႇ ဝႃႈၼႆ ။


လုင်းသေႃး ၵူၼ်းဝဵင်းပၢင်လူင် လၢတ်ႈဝႃႈ “ သဵင်ယၢမ်းတႅၵ်ႇႁၢဝ်ႈႁႅင်း၊ ထၢင်ႇပဵၼ်မၢၵ်ႇတႅၵ်ႇလူးၵွၼ်ႇ၊  ယၢမ်းတႅၵ်ႇလႄႈ မီးၵူၼ်းမၢတ်ႇၸဵပ်း ၶႃပုတ်း၊ မိုဝ်းပုတ်း။ ၶူဝ်းၶွင် ၼႂ်းႁိူၼ်းၵေႃႈ လူႉလႅဝ်မူတ်း၊ တီႈၽၵ်းတူႁူးပွင်ႇ(ႁူးလႅင်း)ၵေႃႈ လႅဝ်ပွင်ႇတင်းမူတ်း၊ ယၢမ်းဢၼ်ၶဝ်တမ်သေတႅၵ်ႇၼႆႉ လႆႈႁူႉဝႃႈ တေႁဵတ်းႁူင်းၾႆးမိၼ် ပွႆႇတီႈပွႆး ဝၼ်းၵိူတ်ႇၸဝ်ႈၵွၼ်းဝတ်ႉ တီႈဝတ်ႉဝၢၼ်ႈဢႅၼ်ႇ ဝႃႈၼႆ ။


မိူဝ်ႈပူၼ်ႉမႃး လိူၼ်သႅမ်ႊထႅမ်ႊပိူဝ်ႊၼၼ်ႉၵေႃႈ တီႈပွၵ်ႉပျီႇတေႃႇတႃႇ ၸႄႈဝဵင်းတူၼ်ႈတီးၼၼ်ႉ ၵူၼ်းၼႂ်းပွၵ်ႉတမ်ယၢမ်း ႁဵတ်းႁူင်းၾႆးမိၼ် ပွႆးလိူၼ်သိပ်းသွင်မူၼ်း ယၢမ်းတႅၵ်ႇ ၾႆးမႆႈႁိူၼ်း လင်ၼိုင်ႈ ၼင်ႇၵဝ်ႇ ။