ၶွမ်ႊမတီႊ ၵေႃလိၵ်ႈလၢႆးလႄႈၾိင်ႈငႄႈတႆး ဝဵင်းမူႇၸေႈ ဢွၵ်ႇလိၵ်ႈပိုၼ်ၽၢဝ်ႇ ဝၼ်းတီႈ 25/11/2016 ဝႃႈ တေဢမ်ႇၸတ်းႁဵတ်း ပၢင်ပွႆးပီမႂ်ႇတႆး 2111 ၼီႈ လႄႈ ပၢင်ပွႆးလူႇတၢၼ်းၶဝ်ႈမႂ်ႇၼမ်ႉမႂ်ႇ။ ယွၼ်ႉငဝ်းလၢႆး ဢမ်ႇမၼ်ႈၼိမ် မႆႈၸႂ်ၵူဝ်မီးလွင်ႈၽေးၶဵၼ်တုမ်ႉတိူဝ်ႉၶူဝ်းၶွင်လႄႈသၢႆၸႂ်ၵူၼ်းမိူင်း ။

ၵဵဝ်ႇၵပ်းလွင်ႈၼႆႉ ဝၼ်းတီႈ 24/11/2016 (မိူဝ်ႈဝႃး) ယၢမ်းဝၢႆးဝၼ်း၊ ၶွမ်ႊမတီႊပွင်ပဵၼ်ပၢင်ပွႆးပီမႂ်ႇတႆးလႄႈ ၵေႃလိၵ်ႈလၢႆးလႄႈၾိင်ႈငႄႈတႆး ဝဵင်းမူႇၸေႈ ႁွင်ႉပၢင်ၵုမ်တီႈ လုမ်းၵေႃလိၵ်ႈလၢႆးလႄႈၾိင်ႈငႄႈတႆး ဝဵင်းမူႇၸေႈ။ ဢုပ်ႇဢူဝ်းၵိူဝ်းၵုမ်ၵၼ် တွၼ်ႈတႃႇပွႆးပီမႂ်ႇတႆး 2111 ၼီႈဝႃႈ တေပဵၼ်ပၢင်ပွႆး ႁိုဝ် ဢမ်ႇပဵၼ်ပၢင်ပွႆး၊ ပၢင်ၵုမ် ၽွမ်ႉႁူမ်ႈလႆႈၸႂ်တူၵ်းလူင်းၵၼ်သေ တႅပ်းတတ်းဢွၵ်ႇလိၵ်ႈပိုၼ်ၽၢဝ်ႇၵႂႃႇ 3 ၶေႃႈၼင်ႇၼႆ ။


1.တီႈၸႄႈဝဵင်းမူႇၸေႈ ၸႄႈတွၼ်ႈမူႇၸေႈ ၸိုင်ႈတႆးပွတ်းႁွင်ႇၼႆႉ ၵေႃလိၵ်ႈလၢႆးလႄႈၾိင်ႈငႄႈတႆးဢွၼ်ႁူဝ် ၼမ်းၼႃႈသေ ၸတ်းႁဵတ်းပၢင်ပွႆးႁပ်ႉတွၼ်ႈပီမႂ်ႇတႆး မႃးၵူႈပီပီ၊ ပွႆးလူႇတၢၼ်းၶဝ်ႈမႂ်ႇၼမ်ႉမႂ်ႇၸိူဝ်းၼႆႉ ၸတ်းႁဵတ်းၵိုၼ်းၶွၼ်ႈၶိုၵ်ႉယႂ်ႇမႃးယဝ်ႉ ။


2.တင်ႈတႄႇဝၼ်းတီႈ 20/11/2016 ၸႄႈဝဵင်းမူႇၸေႈ မိူင်းယု (105)လၵ်း၊ ၵိင်ႇၸႄႈဝဵင်းမိူင်းၵူဝ်းလႄႈ ၵိင်ႇၸႄႈဝဵင်းပၢင်ႇသၢႆးၸိူဝ်းၼႆႉ မီးပၢင်တိုၵ်းၼႂ်းဝူင်ႈၵၢင် တပ်ႉမတေႃႇသိုၵ်းမၢၼ်ႈ တင်း ၸုမ်းဢူၺ်းလီသိုၵ်း ပွတ်းႁွင်ႇ (KIA,MNDAA,TNLA,AA) ၸိူဝ်းၼႆႉ။ ဢိင်ၼိူဝ်ပၢင်တိုၵ်းသိုၵ်းသိူဝ်ၼႆႉသေ ၵူၼ်းဝၢၼ်ႈၵူၼ်းမိူင်း လႆႈပၢႆႈယၢၼ်ႁိူၼ်းယေးဝၢၼ်ႈသူၼ်ၵူၺ်းပႆႇပေႃး ယင်းမီးလွင်ႈတုမ်ႉတိူဝ်ႉဝၢတ်ႇၸဵပ်းလူႉတၢႆပႃးၸွမ်း၊ လွင်ႈၼႆႉ ပဵၼ်ၸႂ်ဢမ်ႇလီၸွမ်းယႂ်ႇလူင်လၢင် ။


3.ၵွပ်ႈပိူဝ်ႈပဵၼ်မႃးၼင်ႇၼႆလႄႈ ၶွမ်ႊမတီႊပွင်ပဵၼ်ပၢင်ပွႆးပီမႂ်ႇတႆး တင်း ၵေႃလိၵ်ႈလၢႆးလႄႈၾိင်ႈငႄႈတႆး လႆႈႁွင်ႉဢုပ်ႇဢူဝ်းၵိူဝ်းၵုမ်ၵၼ်။ ဢိင်ၼိူဝ် မီးလွင်ႈမႆႈၸႂ်ၵူဝ်မီးၽေးမႃးတုမ်ႉတိူဝ်ႉၼိူဝ်ၶူဝ်းၶွင်လႄႈ သၢႆၸႂ်ၵူၼ်းမိူင်းသေ ၽွမ်ႉလႆႈၸႂ်တႅပ်းတတ်းဝႃႈ ပၢင်ပွႆးပီမႂ်ႇတႆးလႄႈ ပၢင်ပွႆးလူႇတၢၼ်းၶဝ်ႈမႂ်ႇၼမ်ႉမႂ်ႇပီၼႆႉ တေဢမ်ႇၸတ်းႁဵတ်းယဝ်ႉ ။


တီႈဝဵင်းမူႇၸေႈ ၸိုင်ႈတႆးပွတ်းႁွင်ႇၼႆႉ ဢွၼ်ၼႃႈၼႆႉလႆႈပိုၼ်ၽၢဝ်ႇၵႂႃႇဝႃႈ ပၢင်ပွႆးႁပ်ႉတွၼ်ႈပီမႂ်ႇတႆး 2111 ၼီႈၼႆႉ တေမီးပႃးပၢင်ၶႄႉၶႅင်ႇၼၢင်းလဝ်း/ၼၢင်းငၢမ်း (Miss Tai Muse 2111) ၊ ၵူၺ်းၵႃႈ ဢိင်ၼိူဝ်ငဝ်းလၢႆး လႅၵ်ႈလၢႆႈ ဢမ်ႇမီးလွင်ႈၼိမ်သဝ်းငမ်းယဵၼ်သေ ဢမ်ႇပဵၼ်ၸတ်းႁဵတ်း ။


ပၢင်ပွႆးႁပ်ႉတွၼ်ႈပီမႂ်ႇတႆးၼႆႉ မူႇၸုမ်းၸိူဝ်ႉၸၢတ်ႈၸၢဝ်းၶိူဝ်းတႆး လႆႈၸတ်းမႃးလၢႆသိုပ်ႇလၢႆပၢၼ် ၵူႈပီပီ၊ ပဵၼ်ပၢင်ပွႆးၵိုၵ်းပိုၼ်းၾိင်ႈငႄႈၾိင်ႈထုင်းတႆးဢၼ်ၼိုင်ႈ။ ၼင်ႇႁိုဝ်တေလႆႈလွင်ႈၸမ်ၸႂ်ၵၼ်တင်း ပီႈၼွင်ႉတႆးတီႈၸမ်တီႈၵႆ ၵူႈတီႈတီႈၼႆသေ ၵူႈပီဢၼ်လႆႈၸတ်းႁဵတ်းမႃးၸိူဝ်းၼႆႉၵေႃႈ လႆႈၸတ်းႁဵတ်းပႃး ပၢင်လႅၵ်ႈလၢႆႈပိုၼ်ႉႁူႉ၊ ပၢင်တၢၼ်ႈၶႆႈၵဵဝ်ႇၵပ်း လွင်ႈၾိင်ႈငႄႈၾိင်ႈထုင်းလႄႈ လွင်ႈလိၵ်ႈလၢႆးတႆးၸိူဝ်းၼႆႉၵေႃႈ လႆႈၸတ်းႁဵတ်းမႃး ။