ပၢင်ပွႆးႁပ်ႉတွၼ်ႈ ပီမႂ်ႇတႆး 2111 ၼီႈ ၸႄႈဝဵင်းတူၼ်ႈတီး ၸိုင်ႈတႆး ပွတ်းၸၢၼ်း ၸွမ်ၽွင်းလူင် မိူင်းတႆး ၻွၵ်ႊတိူဝ်ႊ လိၼ်းထုတ်ႉ ၶဝ်ႈႁူမ်ႈပိုတ်ႇပၢင်ပွႆး မီးပီႈၼွင်ႉၵူၼ်းမိူင်းတီႈၸမ်/ၵႆၶဝ်ႈႁူမ်ႈ တင်းၼမ်လၢႆ ။

Photo by Noon Mo

ဝၼ်းတီႈ 27/11/2016 ယၢမ်းၵၢင်ၶမ်ႈ 05:00 မူင်း ၵေႃလိၵ်ႈလၢႆးလႄႈၾိင်ႈငႄႈတႆး ဝဵင်းတူၼ်ႈတီး ဢွၼ်ႁူဝ်ၼမ်းၼႃႈၸတ်းႁဵတ်းပၢင်ပိုတ်ႇပၢင်ပွႆး သူင်ႇသင်ႇပီၵဝ်ႇ-ႁပ်ႉတွၼ်ႈ ပီမႂ်ႇတႆး 2111 ၼီႈ တီႈ ၵၢင်ပၢင်ႇ ပွႆးႁူင်းၾႆးမိၼ် (ဢဝေႇယႃႇ) ၸႄႈဝဵင်း တူၼ်ႈတီး ၸိုင်ႈတႆး ပွတ်းၸၢၼ်း။ ၸွမ်ၽွင်းလူင် မိူင်းတႆး Dr.Lin Htut ၊ ႁူဝ်ပဝ်ႈသၽႃး မိူင်းတႆး ၸၢႆးလူင်းသႅင်၊ ၽူႈၵွၼ်းတိူင်း သိုၵ်းပွတ်းဢွၵ်ႇ ၸဝ်ႈႁၢၼ် သေႇယၵျေႃႇထိၼ်ႇ ဝိၼ်းမိၼ်းထုၼ်း၊ ႁူဝ်ပဝ်ႈ ၵေႃပွင်ပဵၼ်ပၢင်ပွႆး ပီမႂ်ႇတႆး 2111 လုင်း ထုၼ်းမျႃႉ ၶဝ် ၶဝ်ႈႁူမ်ႈပိုတ်ႇပၢင်ၵႅတ်းမႆလၢႆႈ။ၼွၵ်ႈလိူဝ်ၼၼ်ႉ ၽွင်းလူင်မိူင်းတႆး 11 ၵေႃႉ ၵေႃႈ ၶဝ်ႈ ႁူမ်ႈပိုတ်ႇ ပၢင်ၸွမ်း ဝႃႈၼႆ ။


ၼၢင်းၼူၼ်းမူဝ် ၽူႈပွင်ၵၢၼ် ပွင်ပဵၼ်ပၢင်ပွႆး ပီမႂ်ႇတႆး 2111 ၼီႈ ၸႄႈဝဵင်းတူၼ်ႈတီး လၢတ်ႈဝႃႈ “ ပၢင်ပွႆးပီမႂ်ႇတႆး ပီၼႆႉ လႆႈမွၵ်ႇထိုင် ၸွမ်ၽွင်းလူင်၊ ႁူဝ်ပဝ်ႈသၽႃးမိူင်းတႆး၊ ၽူႈၵွၼ်းတိူင်းသိုၵ်း ပွတ်း ဢွၵ်ႇ မႃးပိုတ်ႇပၢင်ပွႆး ပီမႂ်ႇတႆး 2111 ၼီႈ၊ လိူဝ်ၼၼ်ႉ ၽွင်းလူင်မိူင်းတႆး 11 ၵေႃႉၵေႃႈ လႆႈမွၵ်ႇထိုင် မႃးၶဝ်ႈႁူမ်ႈပႃး၊ တေလႆႈဝႃႈ ပဵၼ်ဢၼ်ၶႅမ်ႉလႅပ်ႈလီငၢမ်းၵႂႃႇ ထႅင်ႈပိူင်ၼိုင်ႈၵေႃႈ မီးပီႈၼွင်ႉၵူၼ်းမိူင်း ၸႄႈဝဵင်းတူၼ်ႈတီးႁဝ်း တီႈၸမ်/ၵႆ မႃးၶဝ်ႈႁူမ်ႈ ပိုတ်ႇပၢင်ၵႂႃႇ ၸွမ်းထႅင်ႈ တင်းၼမ်လၢႆ ဝႃႈၼႆ ။


ပၢင်ပိုတ်ႇပၢင်ပွႆးပီမႂ်ႇတႆး 2111 ၼီႈ တီႈတူၼ်ႈတီး ၼႂ်းဝၼ်းတီႈ 27 ၼႆႉ မီးတၢင်းၵႃႈၼူၵ်း/တူဝ်း ၸုမ်းၵူၼ်းၼုမ်ႇတႆး (SYO) ၵႃႈၼႄပိုတ်ႇပၢင်ပွႆး၊ ၸုမ်းၵေႃလိၵ်ႈလၢႆး လႄႈၾိင်ႈ ငႄႈတႆး ၸၼ်ႉၸွမ် ဝဵင်းတူၼ်ႈတီး ၵေႃႈၶဝ်ႈႁူမ်ႈ ပိုတ်ႇပၢင် ၼႄတၢင်းၵႃႈၵႂႃႇ ႁူမ်ႈပႃးလူၺ်ႈ ၸုမ်းတၢင်းၵႃႈ ထႅင်ႈလၢႆ လၢႆၸုမ်း ဝႃႈၼႆ ။


ပွႆးပီမႂ်ႇတႆး 2111 ၼီႈ ဝဵင်းတူၼ်ႈတီးၼႆႉ ၸတ်းႁဵတ်း ဝၼ်းတီႈ 27/11/2016 တေႃႇထိုင် ဝၼ်းတီႈ 01/12/2016 ၶၢဝ်းတၢင်း 5 ဝၼ်း၊ ၶပ်ႉမၢႆပၢင်ပွႆးသမ်ႉ ဝၼ်းတီႈ 27 ပိုတ်ႇပၢင်ပွႆး၊ ၼႄ တၢင်းၵႃႈ၊ ႁွင်ႉၽဵင်းၵႂၢမ်း ပၢၼ်မႂ်ႇလႄႈ ၶႄႉၶႅင်ႇပွႆႇႁူင်းၾႆးမိၼ် တီႈပၢင်ႇဢဝေႇယႃႇ၊ ဝၼ်းတီႈ 28  မီးပၢင်ၶႄႉၶႅင်ႇ တၢင်းၵိၼ်ၾိင်ႈငႄႈတႆး၊ ၶႄႉၶႅင်ႇၶႅၵ်းမွၵ်ႇ၊ ပၢင်ၵိၼ်ၶဝ်ႈႁူမ်ႈမူႇၵၼ် တီႈၵေႃ လိၵ်ႈလၢႆးလႄႈ ၾိင်ႈငႄႈ တႆး တူၼ်ႈတီး၊ လိူဝ်ၼၼ်ႉ ယၢမ်းၵၢင်ၶမ်ႈ သိုပ်ႇၼႄတၢင်း ၵႃႈလႄႈ ႁွင်ႉၽဵင်းၵႂၢမ်းပၢၼ်မႂ်ႇ တီႈပၢင်ႇဢဝေႇယႃႇ၊ ဝၼ်းတီႈ 29  လဵပ်ႈတူၼ်ႈၶူဝ်းလူႇ၊ ယၢမ်းဝၢႆးဝၼ်း 03 မူင်း မီးပၢင်ၵႅဝ်ႈႁပ်ႉပီမႂ်ႇ တီႈႁူင်းႁေႃၵေႃလိၵ်ႈလၢႆး တူၼ်ႈတီး၊ ယၢမ်းၵၢင် ၶမ်ႈသမ်ႉ သိုပ်ႇၼႄတၢင်းၵႃႈ၊ ႁွင်ႉၽဵင်းၵႂၢမ်းလႄႈ ႁပ်ႉပီမႂ်ႇ(ႁပ်ႉၸဵင်) တီႈပၢင်ဢဝေႇယႃႇ၊ ဝၼ်းတီႈ 30  ယၢမ်းၵၢင်ဝၼ်း ၵပ်းသွမ်းသင်ၶၸဝ်ႈလႄႈ ထွမ်ႇတြႃးပီမႂ်ႇ၊ လဵၼ်ႈၸဵင် တီႈႁူင်းႁေႃ ၵေႃလိၵ်ႈလၢႆးတူၼ်ႈတီး၊ ယၢမ်းၵၢင်ၶမ်ႈၵေႃႈသိုပ်ႇၼႄတၢင်းၵႃႈလႄႈ ႁွင်ႉၽဵင်းၵႂၢမ်း တီႈပၢင်ႇ ဢဝေႇယႃႉ၊ ဝၼ်းတီႈ 01/12/2016  ပၢင်လူပ်းပၢင်ပွႆး တွၼ်ႈသူး/ရၢင်းဝလ်း ၵၢၼ်ၶႄႉ ၶႅင်ႇႁူင်းၾႆးမိၼ်၊ တၢင်းၵႃႈလႄႈ ႁွင်ႉၽဵင်းၵႂၢမ်း ဢၼ်လႆႈၸတ်းမႃးၼႂ်းၶၢဝ်းတၢင်း 5 ဝၼ်း- ဝႃႈၼႆ ။