ပိူဝ်ႈပဵၼ်ၵၢၼ်လဵၼ်ႈႁႅင်းလႄႈႁၢင်ႇၵႆယႃႈမဝ်းၵမ် ၵူၼ်းၼုမ်ႇတႆးၼႂ်းၵဵင်းမႆႇလၢႆၸုမ်း ၶွၼ်ႈတုမ်ႁူမ်ႈႁွမ်းလႆႈၸႂ်ၵၼ် ၸတ်းႁဵတ်းပၢင်ၶႄႉၶႅင်ႇတၢင်းၵႅၼ်ႇၶႅင်ႁႅင်းၵိုၼ်း ပိတ်ႉမၢၵ်ႇၼင်ၶႄႉၶႅင်ႇၼမ်ႉၵတ်ႉတၢင်းၶၼ် ၼႂ်းတိုဝ်ႉတၢင်း ဝၼ်းပီမႂ်ႇတႆး 2111 ၼီႈ မိူင်းႁဝ်ႉ(ပီၵႆႇ) ။

ဝၼ်းတီႈ 27/11/2016 လိူၼ် 12 လွင်ႈ 13 ၶမ်ႈ(ဝၼ်းဢႃးတိတ်ႉ)ၵူၼ်းၼုမ်ႇတႆးတင်းမူတ်း 24 ၸုမ်းၶဝ်ႈၶႄႉၶႅင်ႇ ပိတ်ႉမၢၵ်ႇၼင်ၵၼ် တီႈၶူင်ႇပိတ်ႉမၢၵ်ႇၼင် (သၼၢမ်) ၶျႆးတဝလ်း ၼႂ်းၵဵင်းမႆႇ။  တႄႇမိူဝ်ႈၶၢဝ်းယၢမ်း 9.45 မူင်း ၸၢႆးပွႆး တူဝ်တႅၼ်းၵေႃၵမ်ၵၢၼ်ၸတ်းပၢင်ၶႄႉၶႅင်ႇပိတ်ႉမၢၵ်ႇၼင်ၵမ်းၼႆႉ ပဵၼ်ၽူႈၵၢဝ်ႇႁၢႆးငၢၼ်း လွင်ႈလႆႈၸတ်းပၢင်ၶႄႉၶႅင်ႇ ပိတ်ႉမၢၵ်ႇၼင် လူၺ်ႈလွင်ႈပဵၼ်မႃးပၢင်ၶႄႉၶႅင်ႇပိတ်ႉမၢၵ်ႇၼင်သေ ၸၢႆးၽဵတ်း ႁူဝ်ၼႃႈၵူၼ်းၼုမ်ႇတႆးၵဵင်းမႆႇ ပဵၼ်တူဝ် တႅၼ်း ၸၢႆးတႃႇဢူး(ႁူဝ်ၼႃႈဝူင်းၸိူင်းလႅဝ်း)ပိုတ်ႇလၢတ်ႈၼႄလွင်ႈၵၢၼ်လဵၼ်ႈႁႅင်းၵူၼ်းၼုမ်ႇတႆးၼႂ်းၵဵင်းမႆႇ ပိူဝ်ႈသၢင်ႈ လွင်ႈဢွမ်ႇလွမ်ႈၽွမ်ႉၵၼ်လႄႈမီးပိုၼ်ႉတီႈတႃႇတူင်ႇဝူင်းၵူၼ်းတႆးတေမႃးၶွၼ်ႈတုမ်ၵၼ်ဢွၵ်ႇဢဵၼ်ဢွၵ်ႇႁႅင်း ။


ဝၢႆးသေၼၼ်ႉ ၸၢႆးသႅင်ယ ႁူဝ်ပဝ်ႈၵေႃလိၵ်ႈလၢႆးလႄႈၾိင်ႈငႄႈတႆးၵဵင်းမႆႇ ၵၢဝ်ႇလၢတ်ႈယူၵ်ႉယွင်ႈပၼ်ႁႅင်း ၵူၼ်းၼုမ်ႇ ၸိူဝ်းဢဝ်ၶၢဝ်းယၢမ်းသူၼ်ႇတူဝ်မႃးၸႂ်ႉတိုဝ်းပဵၼ်ၽွၼ်းလီၵၢၼ်ဢွမ်ႇလွမ်ႈၽွမ်ႉၵၼ် ဢွၵ်ႇဢဵၼ်ဢွၵ်ႇႁႅင်း ၾိုၵ်းၵၢၼ် ၵႅၼ်ႇၶႅင်တူဝ်ၵဝ်ႇ ၾၢႆႇၼိုင်ႈၵေႃႈပဵၼ်လွင်ႈတိုတ်ႉၸၼ်ၵၼ် ဢွၵ်ႇႁၢင်ႇၵႆယႃႈမဝ်းၵမ် ။


ၵၢၼ်ၶႄႉၶႅင်ႇပိတ်ႉမၢၵ်ႇၼင်ပီမႂ်ႇတႆး 2111 ၼီႈ မိူင်းႁဝ်ႉ(ပီၵႆႇ)ၼႆႉတင်းမူတ်းမီးၸုမ်းၵူၼ်းၼုမ်ႇ 24 ၸုမ်းၶဝ်ႈႁူမ်ႈ ၸိူင်ႉၼင်ႇ 1. ၸုမ်းထုင်ႉပူင်း၊ 2 ၼွင်ၿူဝ်းၶမ်း၊ 3 ႁူဝ်မိူင်း ၊ 4 သိူဝ်ၼုမ်ႇၾႃႉ၊ 5 သိူဝ်ၼုမ်ႇတႆး၊ 6 ၶုၼ်ႁၢၼ်၊ 7 သၢႆၽၼ်းမႂ်ႇ၊ 8 ၸုမ်းပီႈၼွင်ႉလႃးႁူႇ၊ 9 ၵေႃလိၵ်ႈလၢႆးလႄႈၾိင်ႈငႄႈတႆးၵဵင်းမႆႇ ၊ 10 ၼိမိတ်ႉမႂ်ႇ၊ 11 သၵေႃးရ်ၿဵၼ်ႉ၊ 12 ၵူၼ်းၼုမ်ႇတႆးၵဵင်းမႆႇ A ၊ 13 ၶႃးသေး၊ 14 ဝဵင်းႁႅင်၊ 15 ၵူၼ်းၼုမ်ႇတႆးၵဵင်းမႆႇ B ၊ 16 သရီမိူင်းမွၵ်ႇ၊ 17 ယွတ်ႈၶုၼ်ၽူလ်း၊ 18 ၽိူၼ်ႉမႂ်ႇ၊ 19 တႆးသၼ်ၵမ်ပႅင်း၊ 20 ၵၢတ်ႇလူင်၊ 21 ၿတ်းတိူဝ်ႊၽလၢႆး၊ 22 မွၵ်ႇၵွၼ်ႇတႆး၊ 23 လၢင်းၶိူဝ်း၊ 24 ဢဵၼ်ႁႅင်းမႂ်ႇ ၸိူဝ်းၼႆႉ။ ၼႂ်းၸိူဝ်းၶဝ်ႈၶႄႉၶႅင်ႇပီၼႆႉ မီးၶႅင်ႇထူၺ်ႈရၢင်းဝလ်း 2 ၶျုတ်ႉ၊ ရင်းဝလ်းၶျုတ်ႉ 1 ပဵၼ်ရၢင်းဝလ်းၶွင်ၵူၼ်းၼုမ်ႇတႆး၊ ၶျုတ်ႉ 2 ပဵၼ်ရၢင်းဝလ်း ၶွင်ၵေႃလိၵ်ႈလၢႆးလႄႈၾိင်ႈငႄႈတႆးၵဵင်းမႆႇ ။


ၸုမ်းဢၼ်လႆႈရၢင်းဝလ်းၵူၼ်းၼုမ်ႇတႆး တီႈ 1 ၸုမ်းၵၢတ်ႇလူင်၊ တီႈ 2 ၸုမ်းသၢႆၽၼ်းမႂ်ႇ၊ တီႈ 3 ၵေႃလိၵ်ႈလၢႆးလႄႈ ၾိင်ႈငႄႈတႆးၵဵင်းမႆႇ ၊ တီႈ 4 ၸုမ်းၶုၼ်ႁၢၼ်။ ၸုမ်းဢၼ်လႆႈရၢင်းဝလ်းၵေႃလိၵ်ႈလၢႆးလႄႈၾိင်ႈငႄႈတႆးၵဵင်းမႆႇသမ်ႉ ရၢင်းဝလ်းတီႈ 1 ၸုမ်းဝဵင်းႁႅင်၊ တီႈ 2 ၸုမ်းၼိမိတ်ႉမႂ်ႇ၊ တီႈ 3 ၸုမ်းမွၵ်ႇၵွၼ်တႆးလႄႈတီႈ 4 ၸုမ်းၽိူၼ်ႉမႂ်ႇ ၸိူဝ်းၼႆႉ ။


ၵၢၼ်ၶႄႉၶႅင်ႇပိတ်ႉမၢၵ်ႇၼင်ပီမႂ်ႇတႆးၼႂ်းၵဵင်းမႆႇၼႆႉ လႆႈၸတ်းမႃးလၢႆပီယဝ်ႉ တႄႇမႃးတီႈၵူၼ်းၼုမ်ႇၸိူဝ်းသူင်ႇပိတ်ႉ မၢၵ်ႇၼင်ၶဝ် လႆႈၽတ်းၼတ်ႉၶႅင်ႇၵၼ်လဵၼ်ႈလဵၼ်ႈသေလိုၼ်းလင်မႃး မီးလၢႆၸုမ်းၶဝ်ႈမႃးၶႄႉၶႅင်ႉၶႅင်ႇ။ ဝၢႆးသေၼႆႉ ၵူၼ်းၼုမ်ႇတႆးၼႂ်းၵဵင်းမႆႇလၢႆၸုမ်း လႆႈၵေႃႇၵုမ်ႇႁွမ်းတူဝ်ၵၼ် တင်ႈၸုမ်းပိတ်ႉမၢၵ်ႇၼင်ႁင်းၽႂ်မၼ်းသေ ၶႄႉၶႅင်ႇၵၼ် မႃးၵူႈပီတေႃႇႁွတ်ႈမႃးပီၵၢႆ 2110 ၼီႈပီတႆး(2015) ပူၼ်ႉမႃးၼႆႉ မီးၸုမ်းၶဝ်ႈမႃးၶႄႉၶႅင်ႇ 16 ၸုမ်း၊ ထိုင်မႃးပီၼႆႉ မီးၸုမ်းၶဝ်ႈႁူမ်ႈၶႄႉၶႅင်ႇထိုင် 24 ၸုမ်း ။