ၼႂ်းသၢမ်လိူၼ်ၼႆႉ ၵူၼ်းမိူင်းတႆးႁဝ်း၊ မူႇၸုမ်းတႆးႁဝ်း၊ ၸုမ်းယိပ်းၵွင်ႈတႆးႁဝ်း ၵူႈမူႇၵူႈၸုမ်း ႁဝ်းတေလႆႈ ဢွၼ်ၵၼ်ၶတ်းၸႂ် ႁူပ်ႉထူပ်းၵၼ်၊ ႁဝ်းတေႁဵတ်းသင် တႃႇပၢင်ၵုမ်ႁူဝ်ပၢၵ်ႇပီ 21 ပၢင်လူင် ႁူဝ်ပီၼႃႈ။ လွင်ႈၼႆႉ ၸုမ်းၶၢဝ်ႇၽူႈတွႆႇႁွၵ်ႈ လႆႈတွင်ႈထၢမ်ဝႆႉ ၽူႈၵွၼ်းလုမ်း PI ၸဝ်ႈၶိုၼ်းသႂ်၊ ဢၼ်ႁဵတ်းၵၢၼ်ၵမ်ႉထႅမ် လွင်ႈငမ်းယဵၼ် ၼင်ႇၼႆ ။


(တွၼ်ႈ 7 သိုပ်ႇမႃးတွၼ်ႈ 6)


ထၢမ်-တႃႇႁဵတ်းၵၢၼ်လွင်ႈငမ်းယဵၼ်ၵႂႃႇတၢင်းၼႃႈၼႆႉ မိူဝ်ႈလဵဝ် ၽႅၼ်ၵၢၼ်သမ်ႉမီးဝႆႉၸိူင်ႉႁိုဝ်ၽွင်ႈၶႃႈ? ။


တွပ်ႇ-ႁဝ်းတေဢမ်ႇဝႃႈတၢင်းၼႃႈတိၵ်းတိၵ်း၊ ႁဝ်းတေဝႃႈၼႂ်း 6 လိူၼ်ၼႆႉၵူၺ်း။ မိူဝ်ႈလဵဝ်ၼႆႉ တၢင်းလူင်ပွင်ၸိုင်ႈလႄႈ ၸုမ်းယိပ်းၵွင်ႈၵၢင်ႇၸၢဝ်းၶိူဝ်းၶဝ် ပႃးတင်းပႃႇတီႇၵၢၼ်မိူင်းၶဝ်ၵေႃႈ ဢုပ်ႇဢူဝ်းၵၼ်ယူႇ။ ပေႃးထိုင်မႃးလိူၼ်ၾႅပ်ႊၿိဝ်ႊရီႊ (2017) တေမီးၵၢၼ်ၸတ်းပၢင်ၵုမ်လူင် ႁူဝ်ပၢၵ်ႇပီ 21 ပၢင်လူင် ထႅင်ႈယဝ်ႉ။ မိူဝ်ႈပႆႇထိုင်ၼၼ်ႉ ၼႂ်းၵႄႈၵၢင်မၼ်း တေမီးပၢင်ဢုပ်ႇဢူဝ်းၵၢၼ်မိူင်းၵူႈၸၼ်ႉၸၼ်ႉ၊ ၸၼ်ႉဝၢၼ်ႈ ၸၼ်ႉဢိူင်ႇ ၸၼ်ႉၸႄႈဝဵင်း ၸၼ်ႉၸႄႈမိူင်းၸိူဝ်းၼႆႉ ။


တင်ႈတႄႇဢဝ်လိူၼ်ၼူဝ်ႊဝႅမ်ႊၿိူဝ်ႊ (2016)ၵႂႃႇၼႆႉ တေတႄႇၵႂႃႇတိၵ်းတိၵ်းယဝ်ႉ။ ၵွပ်ႈပိူဝ်ႈၼႆ ၶၢဝ်းယၢမ်းႁဝ်းၼႆႉ မီးလိူၼ်ၼူဝ်ႊဝႅမ်ႊၿိူဝ်ႊ၊ ၻီႊသႅမ်ႊၿိူဝ်ႊ၊ ၵျႅၼ်ႊၼိဝ်ႊရီႊ မီးယူႇ 3 လိူၼ်ၵူၺ်း၊ ၼႂ်းသၢမ်လိူၼ်ၼႆႉ ၵူၼ်းမိူင်းတႆးႁဝ်း၊ မူႇၸုမ်းတႆးႁဝ်း၊ ၸုမ်းယိပ်းၵွင်ႈတႆးႁဝ်း ၵူႈမူႇၵူႈၸုမ်း ႁဝ်းတေလႆႈ ဢွၼ်ၵၼ်ၶတ်းၸႂ်ယဝ်ႉ၊ ႁဝ်းတေလႆႈႁူပ်ႉထူပ်းၵၼ်၊ ႁဝ်းတေႁဵတ်းဢီႈသင် ။


မိူၼ်ၼင်ႇမိူင်းတႆးၼႆႉ မိူဝ်ႈလဵဝ်လႆႈငိၼ်းဝႃႈ- ပေႃးဝၼ်းတီႈ 29 မႃး (29/10/2016) ၵေႃပွင်ၵၢၼ်ၽွမ်ႉႁူမ်ႈ ၸိုင်ႈတႆး (CSSU) ဢၼ်ႁူဝ်ပဝ်ႈလူင်ၶုၼ်ထုၼ်းဢူး ဢွၼ်ႁူဝ်ဝႆႉၼႆႉ တေႁဵတ်းပၢင်ၵုမ်သေ ဢုပ်ႇဢူဝ်းၵၼ် တီႈတႃႈၵုင်ႈ ဝႃႈၼႂ်းၶၢဝ်းတၢင်း 3 လိူၼ် ႁဝ်းတေသိုပ်ႇႁဵတ်းၵႂႃႇၸိူင်ႉႁိုဝ်၊ တေႁၢင်ႈႁႅၼ်းၵႂႃႇၸိူင်ႉႁိုဝ် ၸိူဝ်းၼႆႉ။ တီႈၼၼ်ႈၼႆႉ မူႇၸုမ်းတႆး၊ မူႇၸုမ်းၸိူဝ်းဢမ်ႇၸႂ်ႈတႆးၵေႃႈ ပေႃးပဵၼ်မူႇၸုမ်းၼႂ်းမိူင်းတႆးၸိူဝ်းၼႆႉ တေၶဝ်ႈပႃးလႆႈယူႇ၊ လႆႈငိၼ်းဝႃႈၸိူင်ႉၼႆ ။


ထၢမ်-ငဝ်းလၢႆးမိူဝ်ႈလဵဝ်ၼႆႉ ဢၼ်ႁဝ်းၶႃႈဢမ်ႇထၢမ်မႅၼ်ႈသေ၊ ဢၼ်ၸဝ်ႈႁဝ်းၶႂ်ႈၾၢၵ်ႇသင်ႇလၢတ်ႈထိုင် ပီႈၼွင်ႉၵူၼ်းမိူင်းတႆးႁဝ်း ပေႃးလႆႈႁူႉႁၼ်ၸွမ်းၼၼ်ႉ မီးသင်ၽွင်ႈၶႃႈ? ။


တွပ်ႇ-ၵၢၼ်ႁဝ်းၼႆႉ ႁဝ်းတူၺ်းမႃး ၵူၼ်းမိူင်းတႆးႁဝ်းတေဢမ်ႇႁူႉၸွမ်း၊ ဢၼ်ႁူႉၸွမ်းၼႆႉ ပဵၼ်ၵူၼ်းႁဵတ်း ၵၢၼ်မိူင်းၵူၺ်း။ ပေႃးဝႃႈႁဝ်းတူၺ်းတီႈ ၸုမ်းၸိူဝ်းဢၼ်ႁဵတ်းၵၢၼ် လွင်ႈငမ်းယဵၼ်ယူႇပေႃးၼႆၸိုင် တေလႆႈႁၼ်ဝႃႈ ၶဝ်ၵေႃႈဢွၼ်ၵၼ်ၶၢင်းတုၵ်ႉၶၢင်းယၢၵ်ႈၶၢင်းၽၢၼ်။ ၶဝ်ဢွၼ်ၵၼ်ဝႃႈ မိူဝ်ႈႁဝ်းတိုၵ်ႉယိုဝ်းၵၼ် ယူႇၼႆႉ ႁဝ်းယင်းမီးၶၢဝ်းလိုဝ်ႈ ၶၢဝ်းမူၼ်ႈၶၢဝ်းၵျေႃႇယူႇၽွင်ႈ၊ ၽိူဝ်ႇႁဝ်းမႃးႁဵတ်းလွင်ႈငမ်းယဵၼ်ယဝ်ႉ ၶၢဝ်းလိုဝ်ႈ ၶၢဝ်းမူၼ်ႈၶၢဝ်းၵျေႃႇၼႆႉ တိုၼ်းဢမ်ႇမီးသေဢိတ်းယဝ်ႉ၊ မိူဝ်ႈၼႆႉၶိုၼ်ႈပၢင်ၵုမ်၊ မိူဝ်ႈၽုၵ်ႈၶိုၼ်ႈဝိူၵ်ႊသျွပ်ႊ (Workshop) ၊ မိူဝ်ႈႁိုဝ်းသမ်ႉတေလႆႈၵႂႃႇၶၢဝ်းတၢင်း၊ မိူဝ်ႈၼိုင်ႈသမ်ႉ တေလႆႈၵႂႃႇလဵပ်ႈႁဵၼ်းတီႈမိူင်းၼၼ်ႉ မိူင်းၼႆႉ၊ ပေႃးပွၵ်ႈမႃးၶိုၼ်းယဝ်ႉၵေႃႈ ႁဵတ်းပၢင်ၵုမ် ၸိူဝ်းၼႆႉ ပဵၼ်ဝႆႉယူႇၸိူင်ႉၼႆ ။


(တွၼ်ႈတွင်ႈထၢမ်ၸဝ်ႈၶိုၼ်းသႂ် ၵဵဝ်ႇၵပ်းလွင်ႈငမ်းယဵၼ် ယဝ်ႉယဝ်ႉ)