ၽွင်းလူင်ၵဝ်ႇ ဝဵင်းလႅၵ်ႉသိင်ႊတၼ် ၸိုင်ႈမိူင်းဢမေႊရိၵၼ်ႊ ႁူပ်ႉထူပ်း ၽူႈတႅၼ်းသၽႃး ၸႄႈမိူင်းတႆး တီႈႁူင်းႁေႃလုမ်းႁူဝ်သိူဝ်(ႁိုဝ်) သၽႃးမိူင်းတႆး တီႈဝဵင်းတူၼ်ႈတီး ။

ဝၼ်းတီႈ 10/10/2016 ယၢမ်းဝၢႆးဝၼ်း 04:00 မူင်း Ms Terass Ann Isaac ၽွင်းလူင်ၵဝ်ႇ ဝဵင်း လႅၵ်ႇသိင်ႊတၼ် ၸႄႈမိူင်းၶႅၼ်ႊတၵ်ႊၶီႊ ၸိုင်ႈမိူင်းဢမေႊရိၵၼ်ႊ ႁူပ်ႉထူပ်း လႅၵ်ႈလၢႆႈတၢင်း ႁူႉၵၼ် တင်းၽူႈတႅၼ်းသၽႃးၸႄႈမိူင်းတႆး တီႈလုမ်းသၽႃးမိူင်းတႆး ၸႄႈဝဵင်းတူၼ်ႈတီး ၸိုင်ႈတႆးပွတ်း ၸၢၼ်း။ ဢုပ်ႇဢူဝ်းလႅၵ်ႈလၢႆႈၵၼ် ၵဵဝ်ႇၵပ်းလွင်ႈပၼ်ႁႃယႃႈမဝ်းၵမ်၊ လွင်ႈတေႁူမ်ႈမိုဝ်း တၢင်းလူင် ပွင်ၸိုင်ႈ တေႁဵတ်းႁိုဝ် ႁဵတ်းသၢင်ႈၵၢၼ်ငၢၼ်းၵႂႃႇၸွမ်းလူင်ပွင်ၸိုင်ႈ ၸိူင်ႉႁိုဝ်၊ လွင်ႈမိူင်းႁူမ်ႈတုမ် ၾႅတ်ႊၻရေလ်ႊ၊ လွင်ႈတူဝ်ထူပ်းပဵၼ်ၽူႈတႅၼ်း ၸဵမ်ၸိူဝ်းၼႆႉ ။


ၼၢင်းပီး ၽူႈတႅၼ်းသၽႃးၸႄႈမိူင်း ပၢင်လူင် လၢတ်ႈဝႃႈ ယူႇတီႈ Ms Terasa Ann Isaac ၽွင်းလူင်းၵဝ်ႇ ဝဵင်းလႅၵ်ႇသိင်ႊတၼ် ၼၼ်ႉ ဢုပ်ႇလၢတ်ႈၼႄ လွင်ႈမိူင်းႁူမ်ႈတုမ်ၾႅတ်ႊတရေလ်ႊ၊ ယဝ်ႉၵေႃႉ လၢတ်ႈဝႃႈ သင်ပဵၼ်ၽူႈတႅၼ်း ၼိုင်ႈၵေႃႉၼႆႉ ႁဵတ်းသင်ၵေႃႈယဝ်ႉ တေလႆႈမီးလွင်ႈ ပူင်ႇသႂ်ႇၸႅင်ႈလႅင်း၊ တေႁဵတ်းသင်ၵေႃႈယဝ်ႉ တေလႆႈတၢင်ႇၶိုၼ်ႈတၢင်းၼိူဝ် ႁတ်းႁတ်းႁၢၼ်ႁၢၼ်” ဝႃႈၼႆ ။


သိုပ်ႇလၢတ်ႈထႅင်ႈဝႃႈ လွင်ႈဢၼ်မႃးႁူပ်ႉထူပ်းႁဝ်းၽူႈတႅၼ်းၸႄႈမိူင်း မိူင်းတႆးၼႆႉ ၶၢဝ်းယၢမ်းမၼ်းဢေႇၼႃႇ ႁဝ်းဢမ်ႇတၼ်းလႆႈထၢမ် ယွၼ်ႉၶၢဝ်းတၢင်းမၼ်းႁိပ်ႈၼႅတ်ႈၼႃႇ၊ ယူႇတီႈမၼ်းၼၢင်းဢွၵ်ႇၶၢဝ်းတၢင်းသေ မႃးတွင်ႈထၢမ် ႁူပ်ႉထူပ်းၽူႈတႅၼ်းၸႄႈမိူင်း ၼႂ်းမိူင်းႁူမ်ႈတုမ်မိူင်းမၢၼ်ႈလႄႈ ၵူၼ်းမိူင်းၼႂ်းပိုၼ်ႉတီႈ ၸဵမ်ၸိူဝ်းၼႆႉ မၼ်းၼၢင်းတေဢၢၼ်းၵႂႃႇ 5 တီႈ တႄႇဢဝ် ဝၼ်းတီႈ 05-20/10/2016 ဝႃႈၼႆ ။


ယူႇတီႈၽူႈတႅၼ်းသၽႃးၸႄႈမိူင်းတႆး ဢၼ်မႃးၶိုၼ်ႈႁွတ်ႈဢုပ်ႇဢူဝ်းၸွမ်းတႄႉ မိူၼ်ၼင်ႇ ပႃႇတီႇႁူဝ်သိူဝ်(SNLD)၊ ပႃႇတီႇၼူၵ်ႉယုင်း( NLD)၊  ပႃႇတီႇသၢင်ႇသီႈ(USDP)လႄႈ ပႃႇတီႇ PNO ၸဵမ်ၸိူဝ်းၼႆႉ ဝႃႈၼႆ ။


Ms Terasa Ann Isaac ၼႆႉ မၼ်းၼၢင်းယၢမ်ႈ ပဵၼ်ၽွင်းလူင်ဝဵင်းၵဝ်ႇ လႅၵ်ႉသိင်ႊတၼ် ၸႄႈမိူင်းၶႅၼ်ႊတၵ်ႊၶီႊ ၸိုင်ႈမိူင်းဢမေႊရိၵၼ်ႊ။ ယၢမ်းလဵဝ် ႁၢပ်ႇၵၢၼ်ဝႆႉပဵၼ် ႁူဝ်ပဝ်ႈၶွင်ႊသီႊၾၢႆႇ လွင်ႈၽဵင်ႇပဵင်းပဵၼ်ထမ်း ၾၢႆႇတီႈယူႇႁိူၼ်းယေး (Lexington Fair Housing Council) ၼႆယဝ်ႉ A။