ၸုမ်းပွင်ၵၢၼ် ၵူၼ်းၼုမ်ႇတႆး TYO ၸႄႈဝဵင်းၼမ်ႉၶမ်းလႄႈ ၵူၼ်းၼုမ်ႇထုင်ႉလွႆႁူဝ်သိူဝ် ၸႄႈဝဵင်းမၢၼ်ႈၸႄႈ ၸတ်းႁဵတ်းပၢင်ႁူပ်ႉထူပ်းပေႃႈမႄႈၵူၼ်းမိူင်းလႄႈ ၽူႈၶဝ်ႈၸုမ်းမႂ်ႇ တီႈလႅၼ်လိၼ်တႆး-ၶၢင် တီႈၼိုင်ႈ ။

ဝၼ်းတီႈ 06/10/2016 ၸုမ်းပွင်ၵၢၼ်ၵူၼ်းၼုမ်ႇတႆး TYO ၸႄႈဝဵင်းၼမ်ႉၶမ်းလႄႈ ၸုမ်းၵူၼ်းၼုမ်ႇ TYO ထုင်ႉလွႆႁူဝ်သိူဝ် ဢိၵ်ႇၽူႈၶဝ်ႈၸုမ်းမႂ်ႇ ၸတ်းႁဵတ်း ပၢင်ႁူပ်ႉထူပ်းပေႃႈမႄႈပီႈၼွင်ႉၵူၼ်းမိူင်း လႄႈ ၵူၼ်းၼုမ်ႇၸၢႆးယိင်း ၽူႈၶဝ်ႈၸုမ်းမႂ်ႇ တီႈႁူင်းၸရွပ်ႈ ဝၢၼ်ႈမွၼ်း  ဢိူင်ႇထုင်ႉလွႆႁူဝ်သိူဝ် ၸႄႈဝဵင်းမၢၼ်ႈၸႄႈ လႅၼ်လိၼ်တႆး - ၶၢင် မီးၽူႈၶဝ်ႈႁူမ်ႈမွၵ်ႈ 60 ပၢႆ ။


ၸုမ်းပွင်ၵၢၼ်ၵူၼ်းၼုမ်ႇတႆး ၸၢႆးၸိုၼ်ႈသႂ် သပ်းလႅင်းၼႄဢၼ်လႆႈၵႂႃႇၸွႆႈၼႂ်းၸုမ်း CSSU၊ လၵ်းပိူင်ၵၢၼ်ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး 12ၶေႃႈ၊ ၸၢႆးၶျိတ်ႉၽွႆႇ ႁူဝ်ပဝ်ႈပွတ်းႁွင်ႇၵူၼ်းၼုမ်ႇ တႆး လၢတ်ႈလွင်ႈ ၶေႃႈယၼ်ႇၸႂ်လႄႈ ယိူင်းဢၢၼ်းသဵၼ်ႈတၢင်းၼႃႈၵၢၼ် ၸုမ်းၵူၼ်းၼုမ်ႇ ၸိူဝ်းၼႆႉ ။


ယိူင်းဢၢၼ်း ၼင်ႇႁိုဝ်ၵူၼ်းၼုမ်ႇတႆးတေၶဝ်ႈႁႃၵၼ်၊ ၽွမ်ႉၵၼ်၊ ပၼ်ႁႅင်းပိူင်တီႇမူဝ်ႇၶရေႇၸီႇ ၊ လွင်ႈၵတ်းယဵၼ်၊ ပၼ်ႁႅင်းႁႂ်ႈလိၵ်ႈတႆးၶိုၼ်ႈယႂ်ႇ၊ ပႅင်းမႅတ်ႇၾိင်ႈငႄႈႁိတ်ႈႁွႆး၊ ႁႂ်ႈမိူင်းတႆးမီးသုၼ်ႇ လႆႈၽဵင်ႇပဵင်း၊ ႁႂ်ႈမီးလွင်ႈၶိုၼ်ႈယႂ်ႇၶိုတ်းၸၼ်ႉလုမ်ႈၾႃႉ၊ ၸုၵ်းၼိူဝ်သဵၼ်ႈတၢင်းထုၵ်ႇမႅၼ်ႈသေ ပၼ်ႁႅင်းတႃႇၽွမ်ႉႁူမ်ႈၸိုင်ႈတႆး ၸိူဝ်းၼႆႉ ။


ၸၢႆးသၢႆၶိူဝ်း ႁူဝ်ပဝ်ႈၸုမ်းၵူၼ်းၼုမ်ႇ လၢတ်ႈဝႃႈ - “ ဢၼ်လႆႈႁၼ်ၵူၼ်းၼုမ်ႇ ၸၢႆးယိင်းဝၼ်းမိူဝ်ႈၼႆႉ ပဵၼ်ဢၼ်ယိၼ်းၸူမ်းၶွပ်ႈၸႂ်ယႂ်ႇၼမ်တႄႉတႄႉ၊ ယွၼ်ႉပေႃႈမႄႈပီႈၼွင်ႉၵူၼ်းမိူင်းလႄႈ ၽူႈၶဝ်ႈ ၸုမ်းမႂ်ႇ ၵူၼ်းၼုမ်ႇၸၢႆးယိင်းၼႂ်းဢိူင်ႇထုင်ႉလွႆႁူဝ်သိူဝ် ႁၼ်လီၼိူဝ်ၸုမ်းၵူၼ်းၼုမ်ႇတႆး TYO ယဝ်ႉၵေႃႈ  ႁႂ်ႈၵူၼ်းၼုမ်ႇမေႃၽွမ်ႉၵၼ်သေ လဵပ်ႈႁဵၼ်းတၢင်းႁူႉၵႂႃႇၼမ်ၼမ် ” ဝႃႈၼႆ ။


မိူဝ်ႈပူၼ်ႉမႃးလိူၼ်ပၢႆ (25-27/08/2016) သင်ၶၸဝ်ႈ၊ ၸုမ်းၵူၼ်းၼုမ်ႇတႆးTYO လႄႈ ၸုမ်းၵေႃ တႆးၵႃလိ ႁူမ်ႈၵၼ်ၸတ်းႁဵတ်း ပၢင်ပၼ်တၢင်းႁူႉလႄႈ ၽိူမ်ႉထႅမ်ၼမ်ႉၵတ်ႉ ၵူၼ်းၼုမ်ႇ ပွၵ်ႈႁႅၵ်ႈ။ မီးၵူၼ်းၼုမ်ႇထုင်ႉလွႆႁူဝ်သိူဝ်လႄႈၵူၼ်းၼႂ်းပိုၼ်ႉတီႈ ၶိုၼ်ႈႁဵၼ်းဢဝ် 350 ပၢႆ ။