RCSS/SSA လူတ်းတုင်းၸိူဝ်ႉၸၢတ်ႈ လူင်းၶိုင်ႈသဝ် ၼႄလွင်ႈမွင်ၸႂ် တေႃႇၸဝ်ႈမုၼ်ယႂ်ႇ ၶုၼ်ႁေႃၶမ်း ၸိုင်ႈထႆး သဵင်ႈမုၼ် တႃႇၶၢဝ်းတၢင်း 15 ဝၼ်း ။

Photo: တႆးလွတ်ႈလႅဝ်ႈ

ဝၼ်းတီႈ 14/10/2016 ငဝ်ႈငုၼ်း ၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး (RCSS/SSA) ၸိသင်ႇ လူင်းမႃး တပ်ႉသိုၵ်းၸိုင်ႈတႆး ၸိူဝ်းပၵ်းတပ်ႉဝႆႉ ၸွမ်းလႅၼ်လိၼ် တႆး-ထႆး ႁႂ်ႈဢွၼ်ၵၼ် လူတ်းတုင်းၸိူဝ်ႉၸၢတ်ႈ လူင်းၶိုင်ႈသဝ်သေ ၼႄလွင်ႈမွင်ၸႂ် ၸွမ်းၸဝ်ႈမုၼ်ယႂ်ႇၶုၼ်ႁေႃၶမ်း ၸိုင်ႈထႆး သုတ်းမုၼ် ၼွၼ်းၽေးၵႂႃႇ ၽွင်းဢႃယု ၸဝ်ႈလႆႈ 89 ဝႃႈၼႆ ။


ၸဝ်ႈသိုၵ်းၸၢႆးသႅင်မိူင်း ၽူႈၶၢၼ်ပၢၵ်ႇ ၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး လၢတ်ႈဝႃႈ “ ၸဝ်ႈမုၼ်ယႂ်ႇၶုၼ်ႁေႃၶမ်းလႆႈၼွၼ်းၽႄးၵႂႃႇၼႆႉယူႇတီႈမုၵ်ႉၸုမ်းႁဝ်းၶႃႈၵေႃႈ ပဵၼ်ဢၼ်ၸႂ် ဢမ်ႇလီ မွင်ၸႂ်ၸွမ်းတႄႉတႄႉဝႃႈဝႃႈ  မိူၼ်ၼင်ႇၵူၼ်းမိူင်းထႆးတင်းသဵင်ႈ။ ယွၼ်ႉပိူဝ်ႈ ၼၼ်လႄႈ ယူႇတီႈတၢင်း မုၵ်ႉၸုမ်းၵေႃႈ လႆႈၸိသင်ႇႁႂ်ႈ ၵူႈတီႈတီႈ ၼႂ်းမုၵ်ႉၸုမ်းႁဝ်းၶႃႈ ၼၼ်ႉႁႂ်ႈလူတ်းယွၼ်ႇတုင်း ၸိူဝ်ႉ ၸၢတ်ႈ ထိုင်ၶိုင်ႈသဝ် ၶၢဝ်းတၢင်း 15 ဝၼ်းသေ ၼပ်ႉယမ်၊ ၼႄတၢင်းမွင်ၸႂ်ၸွမ်း တီႈၸဝ်ႈၶုၼ်ႁေႃၶမ်းလႆႈၼွၼ်းၽေးၵႂႃႇၼၼ်ႉ” ဝႃႈၼႆ ။


သိုပ်ႇလၢတ်ႈဝႃႈ ယူႇတီႈတပ်ႉသိုၵ်းၸိုင်ႈတႆးႁဝ်းၶႃႈ ၸိူဝ်းၼႃႈလိၼ်ၵတ်းယဵၼ်ၸိူဝ်းၼၼ်ႉ ပေႃးထိုင်ဝၼ်းပေႃႈမႃး ႁဝ်းၶႃႈ ဢွၼ်ၵၼ်ၸတ်းႁဵတ်းပၢင်ၵႃရႃဝၼပ်ႉယမ်လႄႈ ပွႆးဝၼ်းၵိူတ်ႇ ၸဝ်ႈ မုၼ်ယႂ်ႇၶုၼ်ႁေႃၶမ်း မႃးၵူႈပီပီ ဢမ်ႇဝႃႈငဝ်ႈငုၼ်းလွႆတႆးလႅင်း ၸွမ်းလႅၼ်လိၼ်ၸိူဝ်းၼႆႉ ဝႃႈၼႆ ။


ၼွၵ်ႈလိူဝ်ၼၼ်ႉ ယူႇတီႈႁူမ်ႈတုမ်ၸိူဝ်ႉၸၢတ်ႈယၢင်းၽိူၵ်ႇ KNU ဢၼ်တူင်ႉၼိုင်တၢင်း ပွတ်းၼႂ်းတိူင်း တႃႈၼၢဝ်းသီ(တႃႈၼၢင်းသႃႇရီႇ) လႆႈၸီႉသင်ႇႁႂ်ႈလူတ်းတုင်းၸိူဝ်ႉၸၢတ်ႈ လူင်းၶိုင်ႈသဝ် ၼႂ်းဝၼ်းတီႈ 15-30/10/2016 ၼႄလွင်ႈမွင်ၸႂ်ၸွမ်း။ ယူႇတီႈတပ်ႉသိုၵ်း KNU သေ ပိုၼ်ၽၢဝ်ႇ ဝႆႉ မီးသွင်ၶေႃႈ 1) မွင်ၸႂ်ၸွမ်းၸဝ်ႈမုၼ်ယႂ်ႇၶုၼ်ႁေႃၶမ်းၸိုင်ႈထႆး သုတ်းမုၼ် ၼွၼ်းၽႄး၊ 2) ယိၼ်းၸူမ်းၶွပ်ႈၸႂ်ထိုင် တီႈၸဝ်ႈမုၼ်ယႂ်ႇၶုၼ်ႁေႃၶမ်း မီးမျၢတ်ႉတႃႇတူၺ်းထိုင်လူလွမ် ၸၢဝ်းၶိူဝ်း ပီႈၼွင်ႉယၢင်းၽိူၵ်ႇ၊ ပီႈၼွင်ႉမွၼ်းလႄႈ ပီႈၼွင်ႉမၢၼ်ႈ ဢၼ်လႆႈမႃးပိုင်ႈ ၽူၺ်းယူႇ သဝ်း ၼႂ်းၸိုင်ႈထႆး ၸဵမ်ၸိူဝ်းၼႆႉ ဝႃႈၼႆ ။


ၸဝ်ႈမုၼ်ယႂ်ႇၶုၼ်ႁေႃၶမ်းထႆး ၽူးမိၽူလ်း ဢၻုလ်းယၻဵတ်ႇ၊ ဢႃယု ၸဝ်ႈ 89၊ ၽွင်းငမ်းႁၢင်ႈ ႁေႃ 70 ပီပၢႆ ၼွၼ်းၽႄး သဵင်ႈမုၼ်ၵႂႃႇ မိူဝ်ႈဝၼ်းတီႈ 13/10/2016 ၶၢဝ်းယၢမ်း 15:52 မူင်း၊ တီႈႁူင်းယႃလူင်သီရိရၢတ်ႉ မိူင်းၵွၵ်ႇ ၸိုင်ႈထႆး ။