ဢၼ်တပ်ႉသိုၵ်းမၢၼ်ႈ ႁႅၼ်းသိုၵ်းလေႃႇတိုၵ်း RCSS/SSA တီႈႁူင်းမူၼ်ႉမႄးတူဝ်ၸႂ် ႁိုဝ် ႁူင်းတိုတ်းတွၼ် ယႃႈမဝ်းၵမ် ၼႂ်းဢိူင်ႇတူင်ႇလၢဝ်း ၸႄႈဝဵင်းမိူင်းၵိုင် ၸိုင်ႈတႆးပွတ်းၸၢၼ်းၼၼ်ႉ ၾၢႆႇသိုၵ်းမၢၼ်ႈပူၼ်ႉပႅၼ် ၶေႃႈၵိၼ်ၵႅၼ်ႇ NCA လႄႈ RCSS/SSA တုၵ်းယွၼ်းတီႈ တပ်ႉမတေႃႇမၢၼ်ႈ ႁႂ်ႈလႆႈၵႄႈလိတ်ႈပၼ်ဝႆးဝႆး ။

ၵဵဝ်ႇၵပ်းလွင်ႈၼႆႉ ယူႇတီႈၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) လၢတ်ႈဝႃႈ- လွင်ႈဢၼ် RCSS/SSA ႁဵတ်းႁူင်းတိုတ်းတွၼ်ယႃႈမဝ်းၵမ် တွၼ်ႈတႃႇၵူၼ်းမိူင်းသေ မူၼ်ႉမႄးတၢင်းယၢမ်ႈ ၸရိတ်ႉတၵူၼ်းမိူင်း ႁႂ်ႈလီၼၼ်ႉ သိုၵ်းမၢၼ်ႈပူၼ်ႉပႅၼ်ၼိူဝ်လိၵ်ႈႁူမ်ႈမၢႆ ၶေႃႈၵိၼ်ၵႅၼ်ႇ ၵၢၼ်ၵိုတ်းတိုၵ်း တူဝ်ႈမိူင်း (NCA) ၵူၺ်းပႆႇပေႃး၊ ပူၼ်ႉပႅၼ်ပႃးၶေႃႈတူၵ်းလူင်း ၸၼ်ႉၸႄႈမိူင်းလႄႈ ၸၼ်ႉမိူင်းႁူမ်ႈတုမ် လွင်ႈဢၼ်လႆႈၸႂ်ၵၼ်ဝႃႈ တေႁူမ်ႈမိုဝ်းၵၼ်တိုၵ်းတေႃးၽဵဝ်ႈမူၺ်ႉယႃႈမဝ်းၵမ်ႁူမ်ႈ ။


ၵဵဝ်ႇၵပ်းလွင်ႈၼႆႉ ၽူႈၼမ်းၼႂ်းၶွမ်ႊမတီႊဢုပ်ႇၵုမ်လွင်ႈငမ်းယဵၼ် RCSS/SSA ၸဝ်ႈသိုၵ်းၸၢႆးငိုၼ်း လၢတ်ႈဝႃႈ- ပၼ်ႁႃယႃႈမဝ်းၵမ်ၼႆႉ မၼ်းပဵၼ်ပၼ်ႁႃၸိူဝ်ႉၸၢတ်ႈ၊ ပဵၼ်ပၼ်ႁႃတွၼ်ႈတႃႇၵူၼ်းတင်းၼမ်လႄႈ RCSS/SSA ႁဝ်းၶႃႈလႄႈၵူၼ်းမိူင်း ႁူမ်ႈၵၼ်ပိုတ်ႇဝႆႉႁူင်းတိုတ်းတွၼ်ယႃႈ ပိူဝ်ႈတႃႇမူၼ်ႉမႄးတူဝ်ၸႂ်ပၼ် ၵူၼ်းဝၢၼ်ႈၵူၼ်းမိူင်း ၸိူဝ်းသူႇၵိၼ်သမ်းယႃႈ တိတ်းၸပ်းယႃႈမဝ်းၵမ်ပၼ်။ သိုၵ်းမၢၼ်ႈသမ်ႉမႃးၸႂ်ႉ ဢဵၼ်ႁႅင်းသိုၵ်းသေၶဝ်ႈမႃး၊ မႃး လေႃႇတိုၵ်းယိုဝ်း RCSS/SSA ၼႆႉ ၾၢႆႇသိုၵ်းမၢၼ်ႈပူၼ်ႉပႅၼ် ၶေႃႈၵိၼ်ၵႅၼ်ႇ NCA တွၼ်ႈၵၼ် 3 ဝႃႈလူၺ်ႈလွင်ႈ ၸၼ်ႉတၢင်းတႂ်ႈပဵၼ်ပၼ်ႁႃမႃးၵေႃႈ တေဢမ်ႇၸႂ်ႉ ႁႅင်းသိုၵ်းသေၵႄႈလိတ်ႈ ၼႆၼၼ်ႉဢၼ်ၼိုင်ႈ။ ဢၼ်ႁႅၼ်းသိုၵ်းသေပူၼ်ႉၶဝ်ႈမႃးၼႂ်းၼႃႈလိၼ် RCSS ၵုမ်းၵမ်ၼႆႉၵေႃႈ ပူၼ်ႉပႅၼ်ၼိူဝ် NCA ယဝ်ႉ-ဝႃႈၼႆ ။


ၵဵဝ်ႇၵပ်းလွင်ႈၼႆႉ ၽိုၼ်ၶၢဝ်ႇမျႃႉဝတီႇ ဢၼ်ပဵၼ်ႁွင်ႈၵၢၼ်ၶၢဝ်ႇလူင်ပွင်ၸိုင်ႈ တပ်သိုၵ်းမၢၼ်ႈ တႅမ်ႈဢွၵ်ႇၶၢဝ်ႇ မိူဝ်ႈဝၼ်းတီႈ 10/10/2016 ၼၼ်ႉဝႃႈ- တပ်ႉသိုၵ်းမၢၼ်ႈတပ်ႉမတေႃႇၼႆႉ တူင်ႉၼိုင်ၵႂၢတ်ႇလၢင်ႉပိုၼ်ႉတီႈ ၸွမ်းၼင်ႇၽႅၼ်ၵၢၼ်မီးသေ လႆႈၵႂႃႇၵႂၢတ်ႇလၢင်ႉၼႂ်းပိုၼ်ႉတီႈ RCSS/SSA ၵုမ်းၵမ်သေ လႆႈပွႆႇပၼ်ၵူၼ်းမိူင်း ဢၼ်ၶဝ်တီႉၺွပ်းၵုမ်းၶင်ဝႆႉ 25 ၵေႃႉ မိူဝ်ႈဝၼ်းတီႈ 7 ဝၢႆးဝၼ်းယၢမ်း 14:45 မူင်း၊ လႆႈမွပ်ႈပၼ်လုမ်း ၾၢႆႇၽွင်းငမ်း ဝၢၼ်ႈၼမ်ႉလၼ်ႈ ၸႄႈဝဵင်းသီႇပေႃႉ၊ မီးၽူႈႁူႉႁၼ်ၸွမ်း 14 ၵေႃႉသေ မွပ်ႈပၼ်ၵူၼ်းဝၢၼ်ႈၵူၼ်းမိူင်းယဝ်ႉ- ဝႃႈၼႆ ။


လွင်ႈၼႆႉ သိုၵ်းမၢၼ်ႈပူၼ်ႉပႅၼ်လိၵ်ႈႁူမ်ႈမၢႆ ၶေႃႈၵိၼ်ၵႅၼ်ႇ NCA တွၼ်ႈၵၼ် 3 ထႅင်ႈလူးၵွၼ်ႇ။ ၼႂ်းၶေႃႈၵိၼ်ၵႅၼ်ႇတွၼ်ႈၼၼ်ႉ တႅမ်ႈဝႆႉဝႃႈ ၸုမ်းၼိုင်ႈလႄႈၸုမ်းၼိုင်ႈၼႆႉ ယူႇတီႈၼွၵ်ႈမိူင်းၵေႃႈလီ၊ ယူႇတီႈၼႂ်းမိူင်းၵေႃႈလီ တေဢမ်ႇႁဵတ်းႁႂ်ႈဢူမုၼ် (ၵုင်ႇသိၵ်ႈၶႃႇ) ႁႂ်ႈပေႃးသဝ်ႈဝဝ်းမွင်၊ တေဢမ်ႇပိုၼ်ၽၢဝ်ႇ သူၼ်းသေႇ ႁႂ်ႈတုမ်ႉတိူဝ်ႉသေၸုမ်းၸုမ်း၊ တိုၼ်းတေလႆႈငိူင်ႉဝႄႈ။ ၵွပ်ႈၼၼ် ဢၼ်ၶၢဝ်ႇလူင်ပွင်ၸိုင်ႈ မျႃႉဝတီႇဢွၵ်ႇလိၵ်ႈပိုၼ်ၽၢဝ်ႇၵႂႃႇ ၸိူင်ႉၼႆၵူၺ်းၵေႃႈ ပေႃးဢမ်ႇႁဵတ်းၸွမ်း ၶေႃႈၵိၼ်ၵႅၼ်ႇ NCA ထႅင်ႈယဝ်ႉ- ၸဝ်ႈသိုၵ်းၸၢႆးငိုၼ်း လၢတ်ႈ ။


ဢိင်ၼိူဝ်ၾၢႆႇသိုၵ်းမၢၼ်ႈပူၼ်ႉပႅၼ်ၼိူဝ်ၶေႃႈၵိၼ်ၵႅၼ်ႇ NCA ၼႆႉသေ ယူႇတီႈ ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) သေ တေတႅမ်ႈလိၵ်ႈပဵၼ်တၢင်းၵၢၼ် တၢင်ႇထိုင်ၸူးတီႈ ၶွမ်ႊမတီႊလူလွမ် ၵုမ်းတူၺ်းၵၢၼ်ၵိုတ်းတိုၵ်း ၸၼ်ႉၸႄႈမိူင်း (JMC-S) လႄႈ  ၶွမ်ႊမတီႊလူလွမ်ၵုမ်းတူၺ်းၵၢၼ်ၵိုတ်းတိုၵ်း ၸၼ်ႉမိူင်းႁူမ်ႈတုမ် (JMC-U) - ၼႆယဝ်ႉ ။


တပ်ႉသိုၵ်းမၢၼ်ႈ ႁႅၼ်းသိုၵ်းၶဝ်ႈလေႃႇတိုၵ်းယိုဝ်း RCSS/SSA တီႈ ႁူင်းတိုတ်းယႃႈမဝ်းၵမ် တီႈဝၢၼ်ႈပၢင်ပွႆး ဢိူင်ႇတူင်ႇလၢဝ်းၼၼ်ႉ သေတႃႉၵေႃႈယႃႇ ယူႇတီႈတပ်ႉသိုၵ်းၸိုင်ႈတႆး (RCSS/SSA)သေ ႁၼ်ထိုင်ဝႃႈ ယွၼ်ႉပိူဝ်ႈယႃႈမဝ်းၵမ်ၼႆႉ မၼ်းပဵၼ်ၽေးလူင်တႃႇၵူၼ်းဝၢၼ်ႈၵူၼ်းမိူင်း၊ ပဵၼ်ၽေးတေႃႇၵူၼ်းတင်းၼမ်လႄႈ တေႁူမ်ႈတင်းၵူၼ်းဝၢၼ်ႈၵူၼ်းမိူင်းသေ ႁဵတ်းသၢင်ႈၵႂႃႇ။ ဢမ်ႇၵွမ်ႉၵႃႈတီႈတူင်ႇလၢဝ်းၵူၺ်း တၢင်ႇဝၢၼ်ႈ တၢင်ႇဝဵင်း တၢင်ႇပိုၼ်ႉတီႈၵေႃႈ ပေႃးဝႃႈၵူၼ်းမိူင်းလႆႈၸႂ် တေႁူမ်ႈၵူၼ်းဝၢၼ်ႈၵူၼ်းမိူင်းသေ ပိုတ်ႇႁူင်းတိုတ်း တွၼ်ယႃႈမဝ်းၵမ်ၵႂႃႇထႅင်ႈ၊ ၵၢၼ်ၽဵဝ်ႈမူၺ်ႉယႃႈမဝ်းၵမ်ၼႆႉ တေႁဵတ်းသၢင်ႈၵႂႃႇဢမ်ႇယင်ႉဢမ်ႇလိုဝ်ႈ- ၼႆယဝ်ႉ ။


သိုၵ်းလူင်ပွင်ၸိုင်ႈမၢၼ်ႈ တပ်ႉမတေႃႇၼႆႉ မိူဝ်ႈၽွင်းႁူဝ်လိူၼ်ဢွၵ်ႊထူဝ်ႊၿိူဝ်ႊ (2016)ၼႆႉ ဢမ်ႇၵွမ်ႉၵႃႈ ႁႅၼ်းသိုၵ်းလေႃႇတိုၵ်းယိုဝ်း တပ်ႉသိုၵ်းလွတ်ႈလႅဝ်းၶၢင် (KIA) ၊ တပ်ႉသိုၵ်းၸိုင်ႈတႆး (SSPP/SSA) ၸိူဝ်းၼႆႉၵူၺ်း၊ ၸုမ်းၸၢဝ်းၶိူဝ်း ဢၼ်လူင်းလၢႆးမိုဝ်းၶေႃႈၵိၼ်ၵႅၼ်ႇ ၵၢၼ်ၵိုတ်းတိုၵ်းတူဝ်ႈမိူင်း (NCA) ဝႆႉၸွမ်းလူင်ပွင်ၸိုင်ႈ တပ်ႉသိုၵ်းမၢၼ်ႈ မိူၼ်ၼင်ႇ တပ်ႉသိုၵ်းၸိုင်ႈတႆး (RCSS/SSA) ၵေႃႈ ယင်းႁၢင်ႈႁႅၼ်း သိုၵ်းလေႃႇတိုၵ်း၊ ႁဵတ်းႁႂ်ႈၵူၼ်းဝၢၼ်ႈၵူၼ်းမိူင်းၼႂ်းပိုၼ်ႉတီႈ ႁိမ်းသွင်ႁဵင်ၵေႃႉ ၺႃးၸၢၵ်ႇၽေးသိုၵ်းသိူဝ် ။