တူဝ်တႅၼ်း ၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး RCSS/SSA လူင်းပိုၼ်ႉတီႈ ႁူပ်ႉထူပ်း ပီႈၼွင်ႉၵူၼ်းမိူင်းၵျွၵ်ႉမႄး သပ်းလႅင်းလၢတ်ႈၼႄ လွင်ႈ NCA လႄႈ လွင်ႈလႆႈၶိုၼ်ႈပၢင် ၵုမ်လူင် ပၢင်လူင် ပီ 21 ၸဵမ်ၸိူဝ်းၼႆႉ ။

ဝၼ်းတီႈ 10/10/2016 ယၢမ်း ၵၢင်ၼႂ် 09:00-05:00 မူင်းႁူဝ်ၶမ်ႈ တူဝ်တႅၼ်းၶွင်ႇ သီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး (RCSS/SSA) ၸၢႆးဢုမ်ႈၶိူဝ်း၊ ၸၢႆးသႅင်ႁၢၼ်လႄႈ ၸၢႆးသၢမ်တိပ်ႉ ၶေႇမရတ်ႉ ႁူမ်ႈလူၺ်ႈထႅင်ႈလၢႆလၢႆၵေႃႉ လူင်းပိုၼ်ႉတီႈ သပ်းလႅင်းလၢတ်ႈၼႄ လွင်ႈလႆႈၵိုတ်းတိုၵ်း ပတ်းပိုၼ်ႉတူဝ်ႈမိူင်း NCA၊ လွင်ႈလႆႈၶိုၼ်ႈႁွတ်ႈပၢင်ၵုမ်လူင် ပၢင်လူင်ပီ ႁူဝ်ပၢၵ်ႇ 21 တီႈၼေႇပျီႇတေႃႇ၊ တွင်ႈထၢမ် တၢင်းႁၼ်ထိုင်သဵင်ႁူဝ်ၸႂ်ၵူၼ်းမိူင်း ဢၼ်တေ ဢဝ်ၵႂႃႇၼမ်း လၢတ်ႈ/တၢင်ႇလၢတ်ႈ ပၢင်ၵုမ်ၵၢၼ်မိူင်းဢၼ်တေထိုင်မႃး ႁူၵ်းလိူၼ် ၼိုင်ႈပွၵ်ႈ၊ လွင်ႈပၼ်ပိုၼ်ႉ ႁူႉပၢႆးႁၼ် လွင်ႈယႃႈမဝ်းၵမ် ၸဵမ်ၸိူဝ်းၼႆႉ။ ပၢင်ႁူပ်ႉထူပ်းၼႆႉ ၸတ်းႁဵတ်း တီႈဝတ်ႉၼွင်ပိင်ဢွၼ်ႇ ၸႄႈဝဵင်းၵျွၵ်ႉမႄး ၸိုင်ႈတႆး ပွတ်းႁွင်ႇ ၼႆယဝ်ႉ ။


ယူႇတီႈပေႃႈမႄႈၵူၼ်းမိူင်း ၸိူဝ်းၶဝ်ႈႁူမ်ႈ တွင်ႈထၢမ်ၶိုၼ်း မိူၼ်ၼင်ႇ လွင်ႈပၢင်တိုၵ်းဢၼ် ပဵၼ်ယူႇ တၢင်းပွတ်း ဢိူင်ႇတူင်ႇလၢဝ်း၊ လွင်ႈၵေႃႇသၢင်ႈၾၢႆၼိူဝ်မႄႈၼမ်ႉၶူင်း၊ လွင်ႈပၼ်ႁႃယႃႈမဝ်းၵမ်လႄႈ လွင်ႈ သုၼ်ႇလႆႈသုၼ်ႇပဵၼ်ၼၢင်းယိင်း ၸဵမ်ၸိူဝ်းၼႆႉ ယူႇတီႈ တူဝ်တႅၼ်း RCSS/SSA လႆႈတွပ်ႇၵႄႈ ပၼ်ၶိုၼ်းလွင်ႈၵူၼ်းမိူင်း ထၢမ်ၶိုၼ်းမႃး ၸဵမ်ၸိူဝ်းၼၼ်ႉ ဝႃႈၼႆ ။


ၸဝ်ႈဢွၼ်ႇ(ၸဝ်ႈသြႃႇၼွင်ပိင်ဢွၼ်ႇ) ၽူႈၵွၼ်းဝတ်ႉၼွင်ပိင်ဢွၼ်ႇ လၢတ်ႈဝႃႈ “ ယူႇတီႈ RCSS/SSA လႆႈလူင်းႁူပ်ႉထူပ်းပေႃႈမႄႈၵူၼ်းမိူင်း ၸႄႈဝဵင်းၵျွၵ်ႉမႄးၵမ်းၼႆႉ ၶဝ်ၸဝ်ႈ မႃးထွမ်ႇသဵင် ႁူဝ်ၸႂ်ပေႃႈ မႄႈၵူၼ်းမိူင်း၊ သပ်းလႅင်းလၢတ်ႈၼႄ လွင်ႈ NCA၊ ယဝ်ႉၵေႃႈ ပၼ်ပိုၼ်ႉႁူႉပၢႆးႁၼ် ပေႃႈမႄႈၵူၼ်းမိူင်း တိုၵ်းသူၼ်းထိုင် ၽူႈယႂ်ႇၵူၼ်းလူင် ႁႂ်ႈလုၵ်ႉႁဵတ်းၵၢၼ် ၵူၼ်းတင်းၼမ် ၽွမ်ႉသဵင်ပဵင်းပၢၵ်ႇၵၼ်၊ ယဝ်ႉၵေႃႈ  ႁဵတ်းၵၢၼ်မိူင်းၼမ်ၼမ်၊ ႁႂ်ႈပီႈၼွင်ႉၵူၼ်းမိူင်းမိုတ်ႈၵိုဝ်းၸမ်ၸႂ် တင်း တပ်ႉသိုၵ်း RCSS/SSA ယႃႇပေၵူဝ်တပ်ႉသိုၵ်းတႆး မိူၼ်ၸိူင်ႉၼင်ႇ မိူဝ်ႈၵူႈပွၵ်ႈၼၼ်ႉ ဢၼ်လႆႈၵူဝ်သိုၵ်းဝႃႇ ပဵၼ်သိုၵ်းထိူၼ်ႇဝႃႇ ၸဵမ်ၸိူဝ်းၼႆႉ ယႃႇပေႁႂ်ႈလႆႈၵူဝ်ယဝ်ႉ တေႃႈလဵဝ်၊ ပၵ်းပိူင် 17/1 ၼၼ်ႉ ဢမ်ႇမီးယဝ်ႉ၊ ယူႇတီႈ ၶဝ်ၸဝ်ႈသေ သပ်းလႅင်းတိုၵ်းသူၼ်းပၼ်ၵူၼ်းမိူင်းၵႂႃႇၸိူင်ႉၼၼ်” ဝႃႈၼႆ ။


RCSS/SSA လႆႈမွၵ်ႇ ပီႈၼွင်ႉၵူၼ်းမိူင်းၸိူဝ်းယူႇတၢင်းပွတ်း ပၢင်ဢူး၊ မိူင်းၵုတ်ႈ၊ ၼွင်ၶဵဝ်၊ လႃႈသဵဝ်ႈ၊ သီႇပေႃႉ လႄႈ ၵျွၵ်ႉမႄး ၸဵမ်ၸိူဝ်းၼႆႉ တင်းမူတ်းၽူႈၶဝ်ႈႁူမ်ႈ မီးႁိမ်း 200 ၵေႃႉ ဝႃႈၼႆ ။


တႄႇဢဝ်ႁူဝ်လိူၼ် ဢွၵ်ႊထူဝ်ႊၿိူဝ်ႊ ပီ 2016 ၼႆႉမႃး တူဝ်တႅၼ်း RCSS/SSA လႆႈၸတ်းႁဵတ်း ပဵၼ်သၢမ်ၸုမ်းသေ လူင်းပိုၼ်ႉတီႈႁူပ်ႉထူပ်း ပေႃႈမႄႈပီႈၼွင်ႉ မိူင်းတႆး ပွတ်းဢွၵ်ႇၶူင်း၊ ပွတ်းၸၢၼ်း လႄႈ ပွတ်းႁွင်ႇ တႃႇၶၢဝ်းတၢင်း 10 ဝၼ်းပၢႆ ၼႆယဝ်ႉ။