ၸုမ်းၵူၼ်းၼုမ်ႇတႆး ဝဵင်းလၢႆးၶႃႈ ၸတ်းႁဵတ်းပၢင်တၢၼ်ႈၶႆႈ လိၵ်ႈလၢႆးပၢႆးႁၼ် ပွၵ်ႈၵမ်းသၢမ် တီႈပၢင်တၢၼ်ႈၶႆႈၼၼ်ႉ ၶူးႁိုၼ်းၵႃယၢင်းတၵ်ႉၼၢႆဝႃႈ ပၢႆးပၺ်ၺႃတႆးတူၵ်းလိုၼ်း သေတၢင်ႇ ၶိူဝ်းဝႃႈၼႆ ။

ပေႃးတႅၵ်ႈၵၼ်တင်းတၢင်ႇၶိူဝ်း ၶၢင်၊ ယၢင်း၊ ၶျၢင်း ၶဝ်ၼႆၸိုင် တေလႆႈဝႃႈပၢႆးပၺ်ၺႃတႆး တူၵ်းလႃႈတူၵ်းလိုၼ်း ၶူးႁိုၼ်းၵႃယၢင်းလၢတ်ႈတီႈပၢင်တၢၼ်ႈၶႆႈၼၼ်ႉဝႃႈ ယွၼ်ႉဢမ်ႇ မီးတၢင်းၶတ်းၸႂ် - ဝႃႈၼႆ ။


ဝၼ်းတီႈ 09/10/2016 ၸုမ်းၵူၼ်းၼုမ်ႇဝဵင်းလၢႆးၶႃႈ ဢွၼ်ႁူဝ်ၵူၼ်းမိူင်းလၢႆးၶႃႈ ၸတ်းႁဵတ်းပၢင် တၢၼ်ႈၶႆႈသႂ်ႇၸိုဝ်ႈဝႃႈ - “ပၢင်တၢၼ်ႈၶႆႈ လိၵ်ႈလၢႆးပၢႆးႁၼ်”  တီႈႁွင်ႈၸွမ်သႅင် ပွၵ်ႉႁူဝ်ၼွင်လူင် ၸႄႈဝဵင်းလၢႆးၶႃႈ ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း ။ ၼႂ်းပၢင်တၢၼ်ႈၶႆႈၼႆႉ မီးၽူႈလူင်ႉ လႅၼ်ႇလၢႆၸဝ်ႈလၢႆၵေႃႉမိူၼ်ၼင်ႇ ၸဝ်ႈၶူးဢႅၵ်းၵသေႇၼ ၊ ၶူး ႁိုၼ်းၵႃယၢင်း ၊ ၸၢႆးဝၼ်းလႅင်းၶမ်း ၊ ၶူးပူင်သွၼ်လူင်လုင်းၸၢႆးၾႃႈ ၸိူဝ်းၼႆႉ မႃးမွၵ်ႇလၢတ်ႈ ။ မီးၵူၼ်းၼုမ်ႇလႄႈပေႃႈမႄႈပီႈၼွင်ႉ ၼႂ်းပိုၼ်ႉတီႈ ၶဝ်ႈႁူမ်ႈထွမ်ႇငိၼ်း 400 ပၢႆ ။


ၸၢႆးလႅင်းႁိူင်း ႁူဝ်ၼႃႈၵူၼ်းၼုမ်ႇ ဝဵင်းလၢႆးၶႃႈ လၢတ်ႈဝႃႈ - “ ၽူႈမီးပၺ်ၺႃတၢင်းႁူႉတႆးႁဝ်းမီးတင်း ၼမ် ပေႃးႁဝ်းဢမ်ႇယုၵ်ႉယွင်ႈၵၼ်ၵေႃႈ ၽႂ်ဢမ်ႇမႃးယုၵ်ႉယွင်ႈႁဝ်း ၸိူင်ႉၼင်ႇၶေႃႈၵႂၢမ်းဢၼ်ဝႃႈ - “ၸဝ်ႈဢမ်ႇယွင်ႈၶွင်ဢမ်ႇၵႃႈ” ၾၢႆႇၼိုင်ႈၵေႃႈႁႂ်ႈၵူၼ်းမိူင်းမီးတၢင်းႁူႉတၢင်းႁၼ် မီးလွင်ႈၸမ်ၸႂ်ၵၼ် လႄႈ ၼင်ႇႁိုဝ်ပေႃးတေပဵၼ်တူဝ်ယၢင်ႇလီ ႁႂ်ႈတၢင်ႇဝၢၼ်ႈတၢင်ႇဝဵင်း ပေႃးတေမီးၸႂ်ၶႂ်ႈၸတ်း ႁဵတ်းပၢင်တၢၼ်ႈၶႆႈၵႂႃႇ” ဝႃႈၼႆ ။


ၸဝ်ႈၶူးဢႅၵ်ႉၵသေႇၼ လၢတ်ႈပိုၼ်းဝဵင်းလၢႆးၶႃႈ၊ ၽူႈတႅၼ်းသၽႃးၸိူဝ်ႉၸၢတ်ႈ ၸၢႆးဝၼ်းလႅင်းၶမ်း လၢတ်ႈလွင်ႈၵူၼ်းၼုမ်ႇ၊ ၶူးပူင်သွၼ်လူင်လုင်းၸၢႆးၾႃႈသမ်ႉလၢတ်ႈလွင်ႈပၢင်ၵုမ်လူင်ၸုမ်းတႆး တီႈဝဵင်းလႃႈသဵဝ်ႈၸိူဝ်းၼႆႉ ။


ၸၢႆးလၢဝ်ၶိူဝ်း ၵူၼ်းၼုမ်ႇဢၼ်လႆႈၶဝ်ႈထွမ်ႇပၢင်တၢၼ်ႈၶႆႈလၢတ်ႈဝႃႈ - “ ပၢင်တၢၼ်ႈၶႆႈၼႆႉ မၼ်း ႁဵတ်းႁႂ်ႈႁဝ်းၶႃႈလႆႈတၢင်းႁူႉတၢင်းႁၼ်ၼမ် ႁဵတ်းႁႂ်ႈမီးၸႂ်ၶႂ်ႈလဵပ်ႈႁဵၼ်းလႄႈ မီးၸႂ်ၶႂ်ႈဢၢၼ်ႇလိၵ်ႈမႃး ပေႃႈပဵၼ်လႆႈၶႂ်ႈႁႂ်ႈမီးၵူႈပီ ယဝ်ႉၵေႃႈ ၶႂ်ႈႁႂ်ႈၵူႈဝဵင်းၸတ်းႁဵတ်းပၢင်တၢၼ်ႈၶႆႈၵူႈတီႈ” ဝႃႈၼႆ။
လိူဝ်ၼၼ်ႉတွၼ်ႈၵၢင်ၶမ်ႈသိုပ်ႇၸတ်းပၢင်တၢၼ်ႈၶႆႈထႅင်ႈတီႈ တိူၵ်ႈသွၼ်လိၵ်ႈ ဝတ်ႉၵၢင်တူင်ႈ ဢိူင်ႇထုင်ႉယိူင်း ၸႄႈဝဵင်းလၢႆးၶႃႈ မီးၽူႈမႃးငိၼ်းထွမ်ႇၼပ်ႉပၢၵ်ႇ ။


မိူဝ်ႈဝၼ်းတီႈ 18/10/2015 ၼၼ်ႉၵေႃႈ ၸုမ်းၵူၼ်း ၼုမ်ႇဝဵင်းလၢႆးၶႃႈ ၸတ်းႁဵတ်းပၢင်တၢၼ်ႈၶႆႈ လိၵ်ႈလၢႆးပၢႆးႁၼ် ပွၵ်ႈၵမ်း 2 တီႈဝတ်ႉၸွမ်သႅင် ႁူဝ်ၼွင်လူင် ဝဵင်းလၢႆးၶႃႈ ။ မီးၽူႈလူင်ႉလႅၼ်ႇ လၢႆလၢႆၸဝ်ႈမႃးၶဝ်ႈႁူမ်ႈဢုပ်ႇဢူဝ်း မိူၼ်ၼင်ႇ ၶူးၸၢႆးၾႃႈ ၶူးပူင်သွၼ်လိၵ်ႈလၢႆးတႆး ၊ ၶူးၸၢႆး သၢင်ႇဢၢႆႈ ၽူႈတႅမ်ႈလိၵ်ႈ ၊ ၶူးၸၢႆးပၢၼ်းႁႅင်း ၶူးတႅမ်ႈၵႃႇတုၼ်း / ႁၢင်ႈလူၼ်ႉတႆး လႄႈ ၶူးၸၢႆးၽူင်း ၶွင်ႇ ၽူႈၵွၼ်းႁူင်းႁဵၼ်း လွႆတႆးလီ ၵႃလိ ၸဵမ်ၸိူဝ်းၼႆႉ - ဝႃႈၼႆ ။