ၽူႈသူၼ်ၸႂ်ၵၢၼ်ၵူၼ်းတင်းၼမ် သွင်ၽူဝ်မေးႁူမ်ႈၵၼ်တင်းပီႈၼွင်ႉ သိုဝ်ႉရူတ်ႉၵႃးၼိပ်ႉပၢၼ်ႇ ပၼ်တီႈၸုမ်းၶႅၵ်ႇလီပၢင်ၸႃႉၼမ်ႉၶူင်း ဝဵင်းမိူင်းပၼ်ႇ ။

Photo By - Sai Da

ဝၼ်းတီႈ 06/10/2016 ၸၢႆးၼွင်ႉ + ၼၢင်းမိၼ်ႉၶိၼ်ႇ ပွၵ်ႉႁူဝ်ၾၢႆ မွၵ်ႇၸၢမ် တင်းႁေႃႁိူၼ်းလႄႈပီႈ ၼွင်ႉ ႁူမ်ႈၵၼ်သိုဝ်ႉရူတ်ႉၵႃး ၼိပ်ႉပၢၼ်ႇ (ၵႃးတၢင်ႇၵူၼ်းတၢႆ ) မွပ်ႈပၼ်တီႈၸုမ်းၶႅၵ်ႇလီပၢင်ၸႃႉ ၼမ်ႉၶူင်း ဝဵင်းမိူင်းပၼ်ႇ။ ပဵၼ်ၵႃး ToYoTa Hilux “ၵျပၢၼ်ႇ ” မီးပႃးလၢႆႊသျိၼ်ႊ ၵႃႈၶၼ် 80-90 သႅၼ်ၵျၢတ်ႉ ။


ၸၢႆးၼွင်ႉ ၽူႈမီးၼမ်ႉၸႂ်ဢၼ်တၢၼ်း ၵႃးၼိပ်ႉပၢၼ်ႇလၢတ်ႈဝႃႈ - “ ဢၼ်ႁဝ်းၶႃႈလႆႈလူႇၼႆႉတႄႉ ယွၼ်ႉဝႃႈ ၵႃႈၵွၼ်ႇပူၼ်ႉမႃး ပေႃးတေပူၼ်ႉၶၢပ်ႈတူဝ်ၽူႈသဵင်ႈၵမ်ၸိုင် လႆႈၵႂႃႇယိမ်ထူဝ်ႈပိူၼ်ႈ။ ဢမ်ႇမီးၵႃးဢၼ်တၢင်ႇၵမ်းသိုဝ်ႈလႄႈ မၢင်ပွၵ်ႈၵေႃႈထူပ်းတၢင်းယၢပ်ႇၽိုတ်ႇတႄႉတႄႉ ၼင်ႇႁိုဝ်ပေႃးတေ မီးၸႂ်ႉၼႂ်းဢိူင်ႇၼႂ်းဝၢၼ်ႈလႄႈ ႁဝ်းၶႃႈပီႈၼွင်ႉ ၸင်ႇႁူမ်ႈၵၼ် သေသိုဝ်ႉလူႇ တၢၼ်းပၼ်ၶႃႈ ၾၢႆႇၼိုင်ႈၵေႃႈ တၢင်းလီယိူင်းၸူးထိုင်ၵေႃႉ ပဵၼ်ပေႃႈလုင်းၶုၼ်သၢင်ႇၵတ်း လႄႈ တင်းၵေႃႉပဵၼ်မႄႈ မႄႈထဝ်ႈၸၢင်းႁၢၼ်ႇၼု ဢၼ်လႆႈသဵင်ႈမုၼ်ၵႂႃႇ” - ဝႃႈၼႆ ။


ၸၢႆးၶိူဝ်းတႆး ၵူၼ်းမိူင်းပၼ်ႇလၢတ်ႈဝႃႈ- “ယိၼ်းၸူမ်းထိုင်ၸၢႆးၼွင်ႉလႄႈၼၢင်းမိၼ်ႉၶိၼ်ႇတင်းႁေႃ ႁိူၼ်းလႄႈ ပီႈၼွင်ႉၵူႈၵေႃႉ ဢၼ်လႆႈတၢၼ်းပၼ်ၵႃးၼိပ်ႉပၢၼ်ႇ မီးၽွၼ်းလီ တွၼ်ႈတႃႇ ၼႂ်းဝၢၼ်ႈ ၼႂ်းဢိူင်ႇတႄႉတႄႉၶႃႈ တၢင်ႇဝၢၼ်ႈတၢင်ႇဝဵင်းၵေႃႈ ပေႃးပဵၼ်လႆႈၼႆ ၶႂ်ႈႁႂ်ႈမီးၵူႈဝဵင်းၼင်ႇႁိုဝ်တေ မီးလွင်ႈငၢႆႈလူမ်လႄႈ ၼႂ်းဢိူင်ႇပိုၼ်ႉတီႈႁဝ်းၵေႃႈပေႃတေၶိုၼ်ႈယႂ်ႇမိူၼ်ပိူၼ်ႈၼၼ်ႉ” ဝႃႈၼႆ ။


ၸုမ်းၶႅၵ်ႇလီပၢင်ၸႃႉၼမ်ႉၶူင်းၼႆႉ မီးၵိင်ႇၽႄ ၸႄႈဝဵင်းလၢႆလၢႆတီႈ မိူၼ်ၼင်ႇ ႁၢႆးၵႆႇ ၊ ၵႃလိ ၊ မိူင်းၼွင် ၊ မိူင်းသူႈ ၊ လၢင်းၶိူဝ်း ၊ ဝၢၼ်ႈၼႃးၵူင်း ၊ မိူင်းၼၢႆး ၊ ၵဵင်းတွင်း ၊ မိူင်းပၼ်ႇ ၊ လၢႆးၶႃႈ ၊ ၵေးသီး ၊ ၵုၼ်ႁဵင် ၸဵမ်ၸိူဝ်းၼႆႉ ။ ၸွႆႈထႅမ်ပၼ် ၵၢၼ်လူႉၵၢၼ်တၢႆ ၽူႈထူပ်းၽေး သၽႃဝ ၊ ၽေးသိုၵ်း ၽေးသိူဝ် ၸိူဝ်းၼႆႉ ။