ၼၢင်းမူဝ် ဢႃယု 22 ပီ ႁႅင်းၵၢၼ်ယၢၼ်မိူင်း ႁဵတ်းၵၢၼ်တီႈၼႂ်းၵဵင်းမႆႇ ၸိုင်ႈထႆး ၶပ်းႁေႃႈလူတ်ႉၶိူင်ႈ ၽႃႇတမ်သႂ်ႇတူၼ်ႈမႆႉႁိမ်းၶၢင်ႈတၢင်း လူမ်ႉႁူဝ်ၽတ်ႉလိၼ် တၢႆထင်တီႈ ။

ႁႅင်းၵၢၼ်ယၢၼ်မိူင်း ၼၢင်းမူဝ် ဢႃယု 22 ပီ ပဵၼ်လုၵ်ႈယိင်း လုင်းၺုၼ်ႉ လႄႈ ပႃႈဢုင်ႇ ၸႃႇတိ ဝၢၼ်ႈၵုင်းယူမ်း ၶူဝ်လမ် ဝၼ်းတီႈ 12/10/2016 ယၢမ်းၵၢင်ၼႂ် 02:00 မူင်း လုၵ်ႈတီႈတႆးၵေႃႉသေ ပွၵ်ႈႁိူၼ်းၶိုၼ်းၼၼ်ႉ ၾူၼ်တူၵ်းတၢင်းမိုၼ်ႈ သမ်ႉၶပ်းလူတ်ႉၶိူင်ႈဝႆးလႄႈ လေႃႇၺႃးတူၼ်ႈမႆႉတီႈ ႁိမ်းၶၢင်ႈတၢင်း တီႈၼိူဝ်သဵၼ်ႈတၢင်း မၼီႊရတ်ႊ ဝဵင်းၵဵင်းမႆႇ ၸိုင်ႈထႆး ။


ၸၢႆးတူၼ်ႉ ပီႈဢၢႆႈၶႅၼ်ႈတွင်ႉ ၼၢင်းမူဝ် လၢတ်ႈဝႃႈ “ မၼ်းလုၵ်ႉ တီႈပွႆး(ငၢၼ်းပႃႊတီႊ) မႃး တေပွၵ်ႈႁွင်ႈလိုဝ်ႈသဝ်း တၢင်းၽၵ်းတူၵဵင်းမႆႇ၊ ၶိုၼ်းၼၼ်ႉ ယွၼ်ႉၾူၼ်ၵေႃႈတူၵ်းႁၢဝ်ႈႁႅင်း မၼ်း ပွၵ်ႈမႃးႁင်းၵူၺ်း သမ်ႉတေၶပ်းလူတ်ႉဝႆးပႃး၊ ထႅင်ႈပိူင်ၼိုင်ႈၵေႃႈသမ်ႉတေမဝ်းလဝ်ႈပႃးၽွင်ႈ။ လူတ်ႉၶိူင်ႈမၼ်း ပလၢတ်ႈ လူမ်ႉထူ တမ်သႂ်ႇတူၼ်ႈမႆႉသေ တၢႆထင်တီႈၼၼ်ႈၵမ်းလဵဝ်” ဝႃႈၼႆ ။


ၵဵဝ်ႇၵပ်းလွင်ႈၼႆႉ ၸဝ်ႈၼႃႈတီႈပလိၵ်ႈ ဝဵင်းၵဵင်းမႆႇ လႆႈႁပ်ႉႁူႉသေ ၼမ်းဢဝ်တူဝ်တၢႆမၼ်း ၼၢင်း ၵႂႃႇ ဝႆႉတီႈႁူင်းယႃ သူၼ်ၻွၵ်ႇ၊ လူတ်ႉၶိူင်ႈသမ်ႉ ဢဝ်ၵႂႃႇဝႆႉတီႈႁူင်းပလိၵ်ႈၵွင်မိူင်း၊ ထိုင်မႃး ဝၼ်းတီႈ 12/10/2016 ယၢမ်း ဝၢႆးဝၼ်း 03:00 မူင်း ယူႇတီႈၸိူဝ်ႉၶိူဝ်းပီႈၼွင်ႉလႄႈ ဢူၺ်းၵေႃႉ ဢွၼ်ၵၼ်ၵႂႃႇဢဝ်ၶၢပ်ႈတူဝ်တၢႆ ၼၢင်းမူဝ်(မူဝ်းမေး) မႃးဝႆႉတီႈ ဝတ်ႉၵူႇတဝ်ႈ ဢိူင်ႇသီၽုမ်း ဝဵင်းၵဵင်းမႆႇ ၸိုင်ႈထႆး ။


ယွၼ်ႉပိူဝ်ႈပဵၼ်ၶၢဝ်းဢွၵ်ႇဝႃႇၵေႃႈၸႂ်ႈ-ပေႃႈမႄႈပီႈၼွင်ႉ တၢင်းႁိူၼ်းၵေႃႈ ပႆႇႁွတ်ႈထိုင်ၵဵင်းမႆႇလႄႈ တေၽဝ်ၶၢပ်ႈတူဝ်ဝၼ်းလႂ်တႄႉပႆႁူႉ ဝႃႈၼႆ ။


ၼၢင်းမူဝ်ၼႆႉ မီးပီႈၼွင်ႉႁူမ်ႈတွင်ႉၵၼ် 2 ၵေႃႉ၊ မၼ်းၼၢင်းၼႆႉ ပဵၼ်ၵေႃႉယႂ်ႇ၊ ပဵၼ်ၵူၼ်းၸႃတိ ဝၢၼ်ႈၵုင်းယူမ်း ၸႄႈဝဵင်းၶူဝ်လမ်(ၶူဝ်ၶမ်း) ၸိုင်ႈတႆးပွတ်းၸၢၼ်း။ ၶဝ်ႈမႃးႁဵတ်းၵၢၼ် တီႈလၢၼ်ႉ/ႁၢၼ်ႉ ၶၢႆၶဝ်ႈမုၼ်း ၼႂ်းၵဵင်းမႆႇ ၸိုင်ႈထႆး တိုၵ်ႉလႆႈပီပၢႆ ။