ငဝ်ႈငုၼ်းပႃႇတီႇမႂ်ႇသုင်ၸိုင်ႈတႆး (SSPP) ဢွၵ်ႇလိၵ်ႈမွင်ၸႂ်ၸွမ်း ၸဝ်ႈမုၼ်ယႂ်ႇၶုၼ်ႁေႃၶမ်း မိူင်းထႆး ၼွၼ်းၽႄး။ ယူႇတီႈ SSPP/SSA ဢိၵ်ႇ ပေႃႈမႄႈၵူၼ်းမိူင်းၸိုင်ႈတႆး မွင်ၸႂ်ၸွမ်း မိူၼ်ၼင်ႇၶိူဝ်းႁေႃၶမ်း လႄႈ ၵူၼ်းမိူင်းထႆးတင်းသဵင်ႈ။ တေၶတ်းၸႂ်ႁူမ်ႈမိုဝ်းၵေႃႇသၢင်ႈ လွင်ႈၶွတ်ႇလိူတ်ႈၽွမ်ႉႁူမ်ႈၸၢဝ်းၶိူဝ်း သယၢမ်ၵႂႃႇ ။

ၵဵဝ်ႇၵပ်းလွင်ႈၼႆႉ ယူႇတီႈၶွမ်ႊမတီႊငဝ်ႈငုၼ်း ပႃႇတီႇမႂ်ႇသုင်ၸိုင်ႈတႆး/တပ်ႉသိုၵ်းၸိုင်ႈတႆး (SSPP/SSA) ပိုၼ်ဢွၵ်ႇၽိုၼ်လိၵ်ႈမွင်ၸႂ် မိူဝ်ႈဝၼ်းတီႈ 17/10/2016 ။ ၼႂ်းလိၵ်ႈမွင်ၸႂ်ၼၼ်ႉ မီးၼင်ႇၼႆ ။


ၸဝ်ႈမုၼ်ယႂ်ႇၶုၼ်ႁေႃၶမ်း ၽူးမိၽူလ်း ဢၻုလ်းယၻဵတ်ႇ မိူင်းထႆး လႆႈၼွၼ်းၽႄးၵႂႃႇမိူဝ်ႈ ဝၼ်းတီႈ 13/10/2016 ယၢမ်း 15:52 မူင်း၊ တီႈႁူင်းယႃလူင်သီရိရၢတ်ႉ ၼႂ်းဝဵင်းလူင်ၵုင်းထဵပ်ႈ (မိူင်းၵွၵ်ႇ) ၼၼ်ႉ ယူႇတီႈ ပႃႇတီႇမႂ်ႇသုင်ၸိုင်ႈတႆး/တပ်ႉသိုၵ်းၸိုင်ႈတႆး (SSPP/SSA) ဢိၵ်ႇၽူႈၵွၼ်းတပ်ႉ လုၵ်ႈတပ်ႉလႄႈ ပေႃႈမႄႈၵူၼ်းမိူင်းၼႂ်းၸိုင်ႈတႆးပတ်းပိုၼ်ႉ ပဵၼ်ဢၼ်ၶေႃးၶူမ်မွင်ၸႂ် မိူၼ်ၼင်ႇသၢႆၸိူဝ်ႉႁိူဝ်ႇၶႆးၸဝ်ႈႁေႃၶမ်း ႁဝ်းလႄႈ ပေႃႈမႄႈၵူၼ်းမိူင်းၸိုင်ႈထႆးတႄႉတႄႉ ။


ၸဝ်ႈႁဝ်းၼႆႉ ပဵၼ်ၸဝ်ႈႁေႃၶမ်းတူၼ်ဢၼ် ၼင်ႈႁၢင်ႈႁေႃႁိုင်ၼၢၼ်းသုတ်းၼႂ်းလုမ်ႈၾႃႉသေ ပဵၼ်ၸဝ်ႈတူၼ်ဢၼ်မီးပၢႆးဝူၼ်ႉၶိုၵ်ႉၶႅမ်ႉ၊ မီးဢူမုၼ်ၽုင်းယႂ်ႇ၊ မေႃႁၵ်ႉသႃလူလွမ်တူၺ်းထိုင်ပေႃႈမႄႈ ၵူၼ်းမိူင်း၊ ၵေႃႇသၢင်ႈပၼ်ႁႂ်ႈပေႃႈမႄႈၵူၼ်းမိူင်းၸိုင်ႈထႆး လႆႈမီးလွင်ႈယူႇလီၵတ်းယဵၼ် ၶိုၼ်ႈယႂ်ႇမႂ်ႇသုင် ၶိုတ်းၸၼ်ႉၼႂ်းလုမ်ႈၾႃႉ၊ ၼင်ႇႁိုဝ်မိူင်းထႆး ပေႃးတေဢမ်ႇတူၵ်းပဵၼ်ၶီႈၶႃႈၽႂ်ၼၼ်ႉ သၢႆၸိူဝ်ႉၶိူဝ်းႁေႃၶမ်းလႄႈ ၸဝ်ႈႁေႃၶမ်း လႆႈၶတ်းၸႂ်ႁႃလၢႆးတၢင်းၵူႈၸိူဝ်ႉၵူႈပိူင်သေ ၵႅတ်ႇၶႄလူလွမ်တူၺ်းထိုင်မႃးၸိူဝ်းၼၼ်ႉ ႁဝ်းၶႃႈၵူၼ်းမိူင်းၸိုင်ႈတႆး ၼပ်ႉယမ်ဢဝ်ၵုၼ်းမုၼ်တႄႉတႄႉ ။


ဢၼ်ၸဝ်ႈႁေႃၶမ်းႁဝ်းၼွၼ်းၽႄးၵႂႃႇၼႆႉ ပဵၼ်လွင်ႈဢၼ်လူႉယႂ်ႇသုမ်းလူင် တႃႇၸၢဝ်းၶိူဝ်းမိူင်းထႆး သေဢမ်ႇၵႃး ပဵၼ်လွင်ႈလူႉယႂ်ႇသုမ်းလူင် တႃႇၸၢဝ်းၶိူဝ်းတႆးႁဝ်းၶႃႈတင်းသဵင်ႈ။ ပဵၵ်ႉသမ်ႉဝႃႈ ၸဝ်ႈႁေႃၶမ်း လႆႈၼွၼ်းၽႄးၵႂႃႇယဝ်ႉၼႆသေတႃႉၵေႃႈ ၸိူဝ်းပဵၼ်သၢႆၸိူဝ်ႉႁိူဝ်ႇငိူၼ်ႈၶႆး ဢၼ်ၵိုတ်းဝႆႉၾၢႆႇၼွင်ႈၾၢႆႇလင် ၸိူဝ်းၼၼ်ႉ ႁဝ်းၶႃႈၵေႃႈမီးလွင်ႈယုမ်ႇယမ်ၼပ်ႉထိုဝ်သေ တေၶတ်းၸႂ်ပိုင်ႈဢိင်ႁူမ်ႈမိုဝ်းၵေႃႇသၢင်ႈ လွင်ႈၶွတ်ႇလိူတ်ႈၽွမ်ႉႁူမ်ႈၸၢဝ်းၶိူဝ်းသယၢမ် (SIAM) ႁဝ်းတင်းသဵင်ႈၵႂႃႇယူႇ ဢၼ်ဝႃႈၼၼ်ႉ ႁဝ်းၶႃႈပၼ်ၵႂၢမ်းမၼ်ႈဝႆႉယူႇဢေႃႈ ။


ယွၼ်းသူး ႁႂ်ႈဝိၺဵၼ်ႇၶႂၼ်ငဝ်းၸဝ်ႈၶုၼ်ႁေႃၶမ်းႁဝ်း လႆႈႁွတ်ႈၽႅဝ်ထိုင်ၵႂႃႇတီႈသုၵတိၵတ်းယဵၼ်သေၵမ်း ။