လူင်ပွင်ၸိုင်ႈပိုၼ်ၽၢဝ်ႇဝႆႉဝႃႈ ပၢင်လိူၵ်ႈတင်ႈသွမ်ႈတၢင်းၼႃႈၼႆႉ  တေၸတ်းႁဵတ်းၼႂ်း လိူၼ်ဢေႊပရိူဝ်ႊလ် 2017 ၊ တေလိူၵ်ႈတင်ႈသွမ်ႈ တႅၼ်းတီႈၼင်ႈၽွင်းတႅၼ်းသၽႃး ဢၼ်ပဝ်ႇႁၢမ်းဝႆႉယူႇ ၼႂ်းၸႄႈမိူင်းတႆးၼၼ်ႉ လၢႆလၢႆတီႈၼင်ႈ ၼႆလႄႈ ပႃႇတီႇႁူဝ်သိူဝ် (SNLD) တေၶဝ်ႈၶေႉၶႅင်ႇ - ၽူႈၼမ်းၼႂ်းၵူႈလွင်ႈလွင်ႈ ပႃႇတီႇႁူဝ်သိူဝ် ၸၢႆးၺုၼ်ႉလုၼ်ႇ လၢတ်ႈ ။

ၽိုၼ်လိၵ်ႈၽႃသႃမၢၼ်ႈ ဢၼ်ၶွမ်ႊမသျိၼ်ႊၵၢၼ်လိူၵ်ႈတင်ႈဢွၵ်ႇဝႆႉ

ပၢင်လိူၵ်ႈတင်ႈတူဝ်ႈမိူင်းပီ 2015 ၼၼ်ႉ တီႈၼႂ်းမိူင်းတႆးၼႆႉ ပိုၼ်ႉတီႈၼႃႈလိၼ်ပွတ်းတွၼ်ႈ ဢၼ်ဢမ်ႇလႆႈ ၸတ်းႁဵတ်းပၢင်လိူၵ်ႈတင်ႈၼၼ်ႉ ပဵၼ်တီႈၸႄႈဝဵင်းၵေးသီးလႄႈ ၸႄႈဝဵင်းမိူင်းသူႈ။ လိူဝ်သေၼၼ်ႉ ၽူႈတႅၼ်းသၽႃး ဢၼ်လႆႈလူႉသဵင်ႈမုၼ်ၵႂႃႇသေ ဢၼ်ပဵၼ်တီႈၼင်ႈပဝ်ႇႁၢမ်းဝႆႉၼၼ်ႉၵေႃႈ ပဵၼ်တီႈဝဵင်း ၵဵင်းတုင် တီႈၼိုင်ႈ၊ ၸိူဝ်းၼႆႉ ယူႇတီႈပႃႇတီႇႁူဝ်သိူဝ် တေၶဝ်ႈၶေႉၶႅင်ႇၵၢၼ်လိူၵ်ႈတင်ႈသွမ်ႈ တင်းမူတ်း- ၼႆယဝ်ႉ ။


ၸၢႆးၺုၼ်ႉလုၼ်ႇလၢတ်ႈဝႃႈ- “ႁဝ်းၶႃႈတေၶဝ်ႈၶေႉၶႅင်ႇ တီႈဢၼ်ႁၢမ်းပဝ်ႇဝႆႉ ၼႂ်း 3 ၸႄႈဝဵင်း။ တီႈမိူင်းသူႈတင်း ၵေးသီးၼႆႉ သၽႃးၸႄႈမိူင်း ၼိုင်ႈၸႄႈဝဵင်း 2 တီႈၼင်ႈ (2 ၸႄႈဝဵင်းႁူမ်ႈ 4 တီႈၼင်ႈ)။ သၽႃးၵူၼ်းမိူင်း ၼိုင်ႈၸႄႈဝဵင်းလႂ် 1 တီႈၼင်ႈ (2 ၸႄႈဝဵင်းႁူမ်ႈ 2 တီႈၼင်ႈ)၊ သမ်ႉတီႈၵဵင်းတုင် သၽႃးၸႄႈမိူင်းပဝ်ႇဝႆႉ 1 တီႈၼင်ႈ၊ ႁူမ်ႈတင်းမူတ်း 7 တီႈၼင်ႈ- ဝႃႈၼႆ ။


မိူဝ်ႈၼႂ်းပီ 2015 ၼၼ်ႉ ၼႂ်းၸႄႈဝဵင်းမိူင်းသူႈလႄႈ ၸႄႈဝဵင်းၵေးသီး ဢိင်ၼိူဝ်တပ်ႉသိုၵ်းမၢၼ်ႈ ႁႅၼ်းသိုၵ်းလေႃႇတိုၵ်း တပ်ႉသိုၵ်းၸိုင်ႈတႆး SSPP/SSA သေ ငဝ်းလၢႆးၵၢၼ်မိူင်း ၵၢၼ်သိုၵ်းယုင်ႈယၢင်ႈဝႆႉ။ ၾၢႆႇၼိုင်ႈၵေႃႈ ပႃႇတီႇသိူဝ်ၽိူၵ်ႇ (SNDP) လႆႈတၢင်ႇလိၵ်ႈဝႃႈ ပႆႇထုၵ်ႇလီၸတ်းႁဵတ်းပၢင်လိူၵ်ႈတင်ႈ၊ ၸၢင်ႈဢမ်ႇမီးလွင်ႈၽဵင်ႇပဵင်း ဝႃႈၼႆလႄႈ ၼႂ်းပိုၼ်ႉတီႈၸိူဝ်းၼႆႉ ၶွမ်ႊမသျိၼ်ႊၵၢၼ်လိူၵ်ႈတင်ႈ ၸိုင်ႈမိူင်းႁူမ်ႈတုမ်ၵေႃႈ ပူတ်းပၢၵ်ႈပႅတ်ႈ ၵၢၼ်လိူၵ်ႈတင်ႈသေ ဢမ်ႇမီးပၢင်လိူၵ်ႈတင်ႈ ။


ထႅင်ႈလွင်ႈၼိုင်ႈၵေႃႈ ဢၼ်လူင်ပွင်ၸိုင်ႈ ပိုၼ်ၽၢဝ်ႇဢွၵ်ႇမႃးမိူဝ်ႈဝၼ်းတီႈ 10/10/2016 ဝႃႈ တေၸတ်း ႁဵတ်းပၢင်လိူၵ်ႈတင်ႈသွမ်ႈ (By election) ၼႆႉ ဢမ်ႇပႃးၼႂ်းၼႃႈလိၼ်ဝႃႉ မိူၼ်ၼင်ႇၼႂ်းၸႄႈဝဵင်းပၢင်သၢင်း၊ ၼႃးၽၢၼ်း၊ ပၢင်ဝၢႆ၊ မၢၵ်ႇမၢင်ၸိူဝ်းၼႆႉ။ တီႈၼႂ်းၼႃႈလိၼ်ၸႄႈဝဵင်းမိူင်းလႃးၵေႃႈ ဢမ်ႇပႃးၼင်ႇၵဝ်ႇ ။


ၸၢႆးၺုၼ်ႉလုၼ်ႇ ထတ်းသၢင်ဝႃႈ- လူင်ပွင်ၸိုင်ႈၶဝ်မီးဢႃႇၼႃႇလႄႈ ၶဝ်တေၸတ်းႁဵတ်းၵႂႃႇ၊ ၵူၺ်းၵႃႈ ၸွင်ႇတေႁပ်ႉႁွင်းမၵ်းမၼ်ႈႁိုဝ် ဢမ်ႇမၵ်းမၼ်ႈၵေႃႈဢမ်ႇႁူႉ၊ ပေႃးမၵ်းမၼ်ႈၵေႃႈ တေမၵ်းမၼ်ႈပၼ် တီႈလႂ်ၵေႃႈဢမ်ႇႁူႉ- ဝႃႈၼႆ ။


လူင်ပွင်ၸိုင်ႈ NLD ပိုၼ်ၽၢဝ်ႇဝႆႉဝႃႈ ဢၼ်တေၸတ်းႁဵတ်းပၢင်လိူၵ်ႈတင်ႈသွမ်ႈ ဝၼ်းတီႈ 01/04/2017 တေမႃးၼႆႉ တင်းမူတ်းမီး 18 ပိုၼ်ႉတီႈ- ၼႆယဝ်ႉ ။