ၽူႈႁၵ်ႉၵေးၼမ်ႉပွၼ် ၵူၼ်းမိူင်းယၢင်းလႅင် ဢွၵ်ႇလိၵ်ႈပိုၼ်ၽၢဝ်ႇ တုၵ်းယွၼ်း ႁႂ်ႈၵေးၼမ်ႉပွႆလႆႈလႆလွင်ႈလူင်း တႃႇသေႇ ၵိုၵ်းၼႃႈလိၼ်လုမ်ႈၾႃႉ (ၵမ်ႇၽႃႇ)၊ ပေႃးတဵင်ၾၢႆတတ်းၼမ်ႉပွၼ် ထိူၼ်ႇၶိူဝ်းတူၼ်ႈၼမ်ႉ တေလူႉၵွႆၸူမ်ႁၢႆ၊ တေမီးၽွၼ်းႁၢႆႉတုမ်ႉတိူဝ်ႉၵူၼ်းမိူင်းၼမ် ။

ႁၢင်ႈလိၵ်ႈပိုၼ်ၽၢဝ်ႇၽႃသႃဢိင်းၵလဵတ်ႈ ဢၼ်ၽူႈႁၵ်ႉၵေးၼမ်ႉပွၼ်ၶဝ်ဢွၵ်ႇဝႆႉ

မိူဝ်ႈဝၼ်းတီႈ 11/10/2016 ၽူႈႁၵ်ႉၵေးၼမ်ႉပွၼ် ၵူၼ်းမိူင်းယၢင်းလႅင်၊ ဢၼ်မီးၸိုဝ်ႈဝႃႈ ၸုမ်းတူင်ႉၼိုင် တႃႇၵေးၼမ်ႉပွၼ် လႆလွင်ႈလူင်းတႃႇသေႇလႄႈ သၢၼ်ၶတ်းၶူင်းၵၢၼ်ၾၢႆ ဢၼ်တေၵေႃႇသၢင်ႈၼိူဝ် ၵေးၼမ်ႉပွၼ် ဢွၵ်ႇလိၵ်ႈပိုၼ်ၽၢဝ်ႇ။ ၼႂ်းလိၵ်ႈပိုၼ်ၽၢဝ်ႇၼၼ်ႉ တင်းမူတ်းမီး 4 ၶေႃႈ ။


1.ၵူၼ်းမိူင်းယၢင်းလႅင်တင်းလၢႆ တုၵ်းယွၼ်းဝႃႈ တီႈထုင်ႉၵေးၼမ်ႉပွၼ် လႆလွင်ႈလူင်းယူႇၼႆႉ ပဵၼ်တီႈယူႇသဝ်း ပဵၼ်တီႈပူၵ်းႁၢင်ႈႁေႃၸဝ်ႈၾႃႉယၢင်းလႅင် ။


2. ပေႃးဝႃႈမႃးတဵင်ၾၢႆတတ်းၼိူဝ်ၵေးၼမ်ႉပွၼ်ၸိုင် တေႁဵတ်းႁႂ်ႈၼမ်ႉဝွတ်း ၼမ်ႉလိၼ်း ၼမ်ႉႁူၺ်ႈ ၼမ်ႉလႆဢွၵ်ႇမႃးႁင်းၵူၺ်းၸိူဝ်းၼၼ်ႉ ၸူမ်လူႉႁၢႆၵႂႃႇ၊ တူဝ်သတ်းတတ်းမႅင်း ဢၼ်ပိုင်ႈႁူမ်ႈယူႇသဝ်းၸွမ်း သၢပ်ႇၼမ်ႉပွၼ်ၵေႃႈ တေလူႉႁၢႆလၢႆၵႂႃႇၵူၺ်းဢမ်ႇၵႃး ၵူၼ်းဝၢၼ်ႈၵူၼ်းမိူင်းၸိူဝ်းယူႇသဝ်းထုင်ႉ သၢပ်ႇၼမ်ႉပွၼ်တင်းသဵင်ႈၼၼ်ႉၵေႃႈ တေႁူပ်ႉတၢင်းယၢပ်ႇၽိုတ်ႇ၊ တေလူႉသုမ်းတီႈလိၼ်ၽုၵ်ႇသွမ်ႈ၊ တီႈလိၼ်သူၼ်ႁႆႈၼႃးၵေႃႈ တေၸူမ်ႁၢႆတူၵ်းၵႂႃႇတႂ်ႈၼမ်ႉ (ၼမ်ႉထူမ်ႈ) ။


3. ၸုမ်းဢၼ်မႃးၵူတ်ႇထတ်းတႅၵ်ႈမၢႆဢွင်ႈတီႈ တႃႇတေၵေႃႇသၢင်ႈၾၢႆၼိူဝ်ၵေးၼမ်ႉပွၼ် ယၢမ်းလဵဝ်ၼႆႉ ဢမ်ႇမီးလွင်ႈမႃးႁူပ်ႉထူပ်းဢုပ်ႇဢူဝ်းသပ်းလႅင်းၼႄၵူၼ်းမိူင်း၊ ဢမ်ႇသိုဝ်ႈသႂ်တေႃႇၵူၼ်းမိူင်း၊ ဢမ်ႇၼပ်ႉယမ်ၵၢင်ၸႂ်ၵူၼ်းမိူင်း ။


4. ဢၼ်ၶဝ်မႃးႁၢင်ႈႁႅၼ်းၵူတ်ႇထတ်းပိုၼ်ႉတီႈ တႃႇတေတဵင်ၾၢႆၼိူဝ်ၵေးၼမ်ႉပွၼ်ၼႆႉ ၽွၼ်းပၢင်ႈ ဢၼ်ၵူၼ်းမိူင်းတေလႆႈ မီးဢိတ်းၼိုင်ႈၵူၺ်း၊ ၽွၼ်းႁၢႆႉလူင် ဢၼ်တေတုမ်ႉတိူဝ်ႉၼိူဝ်ၵူၼ်းဝၢၼ်ႈၵူၼ်းမိူင်း မီးတင်းၼမ်။ ၵွပ်ႈၼၼ်လႄႈ ၾၢႆႁေႃၶမ်းတွၼ်ႈၼိူဝ် ဢၼ်ၶဝ်တေမႃးၵေႃႇသၢင်ႈၼၼ်ႉ ၵူၼ်းဝၢၼ်ႈၵူၼ်းမိူင်း ဢမ်ႇယွမ်းႁပ်ႉ၊ ၸင်ႇလႆႈတုၵ်းယွၼ်း ႁႂ်ႈယႃႉပႅတ်ႈၶူင်းၵၢၼ် တႃႇတေမႃးၵေႃႇသၢင်ႈၾၢႆၼိူဝ်ၵေးၼမ်ႉပွၼ်ၼႆႉ၊ ယူႇတီႈ ပေႃႈမႄႈၵူၼ်းမိူင်းလႄႈၸုမ်းႁၵ်ႉၵေးၼမ်ႉပွၼ် လႆႈတုၵ်းယွၼ်းမႃးၸိူင်ႉၼင်ႇၼႆ ။