သင်ၶၸဝ်ႈလႄႈ ပီႈၼွင်ႉတၵ်ႉၵႃႇသတ်ႉထႃး ၼႂ်းၸႄႈဝဵင်းၵျွၵ်ႉမႄး ႁူမ်ႈၵၼ်ပိုတ်ႇလုမ်း ၵိင်ႇၽႄ ၼမ်ႉၶူင်း ထႅင်ႈ တီႈဝတ်ႉဝိႁၢရ်လူင် ၵမ်ႇပေႃးၸၵျွင်းတႆး(ၵျွင်းၽႃႉပွတ်း) မီးပီႈၼွင်ႉ တီႈၸမ်ၵႆ မႃးၶဝ်ႈႁူမ်ႈတင်းၼမ်လၢႆ ။

ဝၼ်းတီႈ 11/10/2016 ယၢမ်းၵၢင်ၼႂ် 07:00-10:30 မူင်း သင်ၶၸဝ်ႈ၊ ၵႅမ်ႁူဝ်ပဝ်ႈ ငဝ်ႈငုၼ်း ၼမ်ႉၶူင်းၶႅၵ်ႇ လီပၢင်ၸႃႉ ဝဵင်းတူၼ်ႈတီး ၸၢႆးသႅင်မိူင်း ဢွၼ်ႁူဝ်ပီႈၼွင်ႉတၵ်ႉၵႃႇသတ်ႉထႃး တီႈၸမ်ၵႆ ႁူမ်ႈၵၼ်ပိုတ်ႇလုမ်းလႄႈ တၢင်ႇပၢႆႉ ၵိင်ႇၽႄ ၸုမ်းၼမ်ႉၶူင်း ၶႅၵ်ႇလီပၢင်ၸႃႉ တီႈဝတ်ႉဝိႁၢရ်လူင်ၵမ်ႇ ပေႃးၸၵျွင်းတႆး ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ။ ၼင်ႇႁိုဝ် တေၸွႆႈထႅမ်ပၼ် ၵၢၼ်လူႇ ၵၢၼ်တၢႆ ၽူႈထူပ်းၽေး သၽႃဝ၊ ၽေးသိုၵ်း ၽေးသိူဝ် ၵူႈဢၼ်ဢၼ် ၼႆယဝ်ႉ ။


လုင်းၽေႃးၵ ၽူႈပွင်ၵၢၼ် ၼႂ်းၸုမ်းၼမ်ႉၶူင်း ဝဵင်းၵျွၵ်ႉမႄး လၢတ်ႈဝႃႈ “ ဝၼ်းမိူဝ်ႈၼႆႉႁဝ်းၶႃႈ ပိုတ်ႇလုမ်းတၢင်ႇ  ပၢႆႉဢေႃႈ။ ယဝ်ႉၵေႃႈ သိုပ်ႇယိုၼ်ႈမွပ်ႈပၼ် ဝႂ်ယွင်ႈယေႃး ၽူႈမီးၼမ်ႉ ၸႂ်ၸေႇ တႃႇၼ ၸိူဝ်းၵမ်ႉထႅမ်လူႇတၢၼ်းငိုၼ်း တႃႇပဵၼ်ငိုၼ်းၵွင်ၵၢင် ၼႂ်းၸုမ်းႁဝ်းသေဢမ်ႇၵႃး၊ ၼွၵ်ႈလိူဝ်ၼၼ်ႉ  မီးၸဝ်ႈတႃႇၼ ၸိုဝ်ႈၸၢႆးဢွင်ႇထုၼ်း လႄႈၼၢင်း မိၼ်ႉဢေးၶၢႆႇ လၢၼ်ႉ ၶၢႆၼမ်ႉမၼ်း “ႁိူင်း” တၢၼ်းလူတ်ႉလမ်းၼိုင်ႈ ၵႃးၼိပ်ႉပၢၼ်ႇလူတ်ႉတၢင်ႇၵူၼ်းတၢႆ” ဝႃႈၼႆ ။


ဢၼ်လႆႈပိုတ်ႇလုမ်းၵိင်ႇၽႄၼမ်ႉၶူင်း တီႈၸႄႈဝဵင်းၵျွၵ်ႉမႄးၼႆႉ တႃႇၸွႆႈထႅမ် ပီႈၼွင်ႉၵူၼ်း ထူပ်းၽေး ၵူႈလွင်ႈလွင်ႈ၊ တႃႇႁႂ်ႈပီႈၼွင်ႉတႆး ပေႃးတေလႆႈပဵၼ်ၼမ်ႉ ၼိုင်ႈၸႂ်လဵဝ် ၵၼ်လႄႈ ၶဝ်ႈဢွၵ်ႇၸွႆႈထႅမ်ၵၼ် ၵူႈတီႈတီႈ ၸဵမ်ၸိူဝ်းၼႆႉ ဢမ်ႇဝႃႈၸၢဝ်းၶိူဝ်းလႂ် သင်ထူပ်း ၽေးမႃး ၼင်ႇပွင်ပဵၼ်လႆႈ ယူႇတီႈၸုမ်းသေ တေၸွႆႈယူတ်းယႃ ပၼ်ၵႂႃႇပိူင်လူင် တႃႇၸွႆႈသူင်ႇ ၵူၼ်းတၢႆလႄႈၶူဝ်းလူႇၶူဝ်းတၢၼ်းပႃးၸဵမ်လွင်ႈပၢႆးယူႇလီ ဝႃႈၼႆ ။


ၼႂ်းပၢင်ပိုတ်ႇလုမ်းလႄႈ တၢင်ႇပၢႆႉမိူဝ်ႈၼႆႉ မီးၾၢႆႇမေႃယႃ ၾၢႆႇတႃ၊ ၾၢႆႇၶေႃးလႄႈ ၾၢႆႇၵူတ်ႇထတ်း ၵူႈလွင်ႈလွင်ႈ ပိုတ်ႇၵူတ်ႇထတ်း ပၼ်ပီႈၼွင်ႉၸိူဝ်းမႃးၶဝ်ႈႁူမ်ႈပိုတ်ႇပၢင် တီႈဝတ်ႉဝိႁၢရ်လူင် ၵမ်ႇပေႃးၸၵျွင်းတႆး (ၵျွင်းၽႃႉပွတ်း) ၵႂႃႇ ၼႆယဝ်ႉ ။


ၸုမ်းၶႅၵ်ႇလီပၢင်ၸႃႉ ၼမ်ႉၶူင်း လႆႈပိုတ်ႇဝႆႉ ႁွင်ႈၵၢၼ်ငဝ်ႈငုၼ်းလူင် တီႈဝဵင်းတူၼ်ႈတီး၊ ၵိင်ႇၽႄႁွင်ႈၵၢၼ် ဢၼ်လႆႈပိုတ်ႇၸွမ်းၸႄႈဝဵင်းသမ်ႉ ႁၢႆးၵႆႇ၊ ၵႃလိ၊ မိူင်းၼွင်၊ မိူင်းသူႈ၊ လၢင်းၶိူဝ်း၊ ဝၢၼ်ႈၼႃးၵူင်း၊ မိူင်းၼၢႆး၊ ၵဵင်းတွင်း၊ မိူင်းပၼ်ႇ၊ လၢႆးၶႃႈ၊ ၵေးသီး၊ ၵုၼ်ႁဵင်၊ မိူင်းပၼ်ႇလႄႈ ၵျွၵ်ႉမႄး ၸဵမ်ၸိူဝ်းၼႆႉ ။