ၵူၼ်းဝၢၼ်ႈယၢင်းႁၢဝ်ႉ ၸၢႆးသူၺ်ႇဢူး ဢႃယု 35 ပီ ၽႅၼ်ၶေႃးၶႃႈတူဝ်တၢႆ တီႈတႂ်ႈတူၼ်ႈမႆႉၶီႈ လဵၵ်း(မႆႉၸီႇလီႇ) ႁိမ်းၼွင်မၼ်းၸၢႆး ၼႂ်းဝၢၼ်ႈယၢင်းႁၢဝ်ႉ မိူဝ်ႈဝၼ်းသုၵ်း တီႈ 07/10/2016 ယၢမ်းၵၢင်ၼႂ် 05:00 မူင်း ။

လုင်းၸၢႆးသူၺ်ႇ ၵေႃႉပဵၼ်ပေႃႈမၼ်းၸၢႆးလၢတ်ႈဝႃႈ “ လုၵ်ႈၸၢႆးၶႃႈၼႆႉ လဝ်ႈဢမ်ႇၵိၼ်၊ ယႃႈမဝ်းၵမ် ၵေႃႈ မၼ်းဢမ်ႇသူႇသမ်း ၵွပ်ႈသင်လႄႈမၼ်းလႆႈၽႅၼ်ၶေႃးတၢႆ ဢမ်ႇလႆႈႁူႉၸွမ်း လႅပ်ႈတေဝူၼ်ႉ ၼမ်ၼႃလႄႈ ၸင်ႇပဵၼ်ႁိုဝ်၊ တူဝ်တၢႆမၼ်းၼၼ်ႉ  ၶႃႈႁဝ်းလႆႈ ႁၼ်တၢႆၽႅၼ်ၶေႃး တီႈတႂ်ႈတူၼ်ႈမႆႉၶီႈ လဵၵ်းဝႆႉ ႁဵတ်းၼၼ်သေ ၸင်ႇႁွင်ႉ ၵူၼ်းဝၢၼ်ႈၵူၼ်းသူၼ် မႃးၸွႆႈၵၼ် ဢဝ်တူဝ်တၢႆမၼ်းၸၢႆးသေ ပူၼ်ႉၶၢပ်ႈတူဝ်ၼႂ်း ဝၼ်းၼၼ်ႉ ၵမ်းလဵဝ်” ဝႃႈၼႆ ။


ၵူၼ်းဝၢၼ်ႈၵမ်ႈပႃႈၼမ်ဝႃႈ ၸၢႆးသူၺ်ႇဢူးၼႆႉ မၼ်းၸၢႆးယၢမ်ႈဢဝ်မေးမႃးသွင်ၵေႃႉ လုၵ်ႈလၢင်း တႄႉ ဢမ်ႇမီးသေၵေႃႉ၊ ဝၢႆးၼႆႉမႃး မၼ်းၸၢႆးယူႇၵေႃႉလဵဝ်ၵူၺ်း။ လႅပ်ႈဝူၼ်ႉၼမ် လွင်ႈလုၵ်ႈလွင်ႈ မေး  ဝႃႈၼႆ ။


ၸဝ်ႈၸၢင်းၵုလိသႃ လၢတ်ႈဝႃႈ “ ၵူၼ်းႁဝ်းၼႆႉ ပေႃးဢမ်ႇမီးသတိတြႃး တေၸၢင်ႈႁဵတ်းႁွတ်းလူင်ၵႂႃႇ၊ ၵူၼ်းလီၵေႃႈ ၸၢင်ႈပဵၼ်ၵူၼ်းႁၢႆႉ၊ လူဝ်ႇလႆႈမီးသတိတြႃးၵၼ်။ တႃႇတေမႃးပဵၼ်ၵူၼ်းၼိုင်ႈၸၢတ်ႈၼႆႉ မၼ်းယၢပ်ႇၼႃႇ” ဝႃႈၼႆ ။


ၸၢႆးသူၺ်ႇဢူးၼႆႉ ပဵၼ်လုၵ်ႈၸၢႆးလုင်းသူၺ်ႇလႄႈပႃႈလဵဝ်း ယူႇဝၢၼ်ႈယၢင်းႁၢဝ်ႉ ဢိူင်ႇယၢင်းၵဵင် ၸႄႈဝဵင်းၵဵင်းတုင် ၸိုင်ႈတႆးပွတ်းဢွၵ်ႇၶူင်း။ မီးပီႈ ၼွင်ႉႁူမ်ႈတွင်ႉၵၼ် 3 ၵေႃႉ ၸၢႆးသူၺ်ႇၼႆႉ ပဵၼ် ၵေႃႉယႂ်ႇသုတ်း ဝႃႈၼႆ ။


လႅင်ႇၶၢဝ်ႇ လႅတ်ႇၼုမ်ႇ မၢင်းရၢႆး