ႁူဝ်ပဝ်ႈလူင် RCSS ၸဝ်ႈယွတ်ႈသိုၵ်း ႁဵတ်းလိၵ်ႈသူင်ႇထိုင် ယုၵ်ႉယွင်ႈဢဝ်မုၼ်ပၢင်ဢုပ်ႇၵုမ် ဢၼ်ၸႂ်ႉၸိုဝ်ႈဝႃႈ ပၢင်တုမ်လူင်တူင်ႇဝူင်းၸိူဝ်ႉၶိူဝ်းတႆး ဢၼ်ၸတ်းတီႈဝဵင်းလႃႈသဵဝ်ႈ၊ ဢုပ်ႇၵုမ်ပိူဝ်ႈတႃႇ ႁူမ်ႈၵၼ်ၵႄႈလိတ်ႈ ပၼ်ႁႃလွင်ႈၶွင်ႉၶမ် ၼႂ်းတူင်ႇဝူင်းၸိူဝ်ႉၶိူဝ်းတႆး ။

ပၢင်ဢုပ်ႇၵုမ်ၼႆႉ မီးၸုမ်းတူင်ႇဝူင်းၵူၼ်းတႆးလၢႆလၢႆၸုမ်း၊ ၵေႃလိၵ်ႈလၢႆးလႄႈၾိင်ႈငႄႈတႆး လၢႆလၢႆၸႄႈဝဵင်း ၶဝ်ႈႁူမ်ႈ။ ၼႂ်းဝၼ်းတီႈ 07/10/2016 ၼၼ်ႉ ၸုမ်းပႃႇတီႇၵၢၼ်မိူင်းမိူၼ်ၼင်ႇ ပႃႇတီႇႁူဝ်သိူဝ် (SNLD) လႄႈပႃႇတီႇသိူဝ်ၽိူၵ်ႇ (SNDP) ၸိူဝ်းၼႆႉၵေႃႈ ၶဝ်ႈႁူမ်ႈမွၵ်ႇလၢတ်ႈငဝ်းလၢႆးၵၢၼ်သၢင်ႈ ၸိူဝ်ႉၶိူဝ်းတႆး ။


ပၢင်ဢုပ်ႇၵုမ်ၼႆႉ ဢိင်ၼိူဝ်ငဝ်းလၢႆးၵၢၼ်ၵၢၼ်းသေ လႆႈႁပ်ႉလိၵ်ႈမွၵ်ႇထိုင်ယူႇၵေႃႈ ႁူဝ်ပဝ်ႈၶွင်ႇသီႇဢဝ်ၶိုၼ်း ၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) ၸွမ်သိုၵ်းယွတ်ႈသိုၵ်း ဢမ်ႇလႆႈၵႂႃႇၶဝ်ႈႁူမ်ႈ၊ ၵူၺ်းၵႃႈမၼ်းၸဝ်ႈ ႁဵတ်းလိၵ်ႈသူင်ႇထိုင် ၸုမ်းတူင်ႇဝူင်းၸိူဝ်ႉၶိူဝ်းတႆး၊ ယုၵ်ႉယွင်ႈဢဝ်မုၼ်ပၢင်ဢုပ်ႇၵုမ် ပွၵ်ႈၼႆႉယူႇ ။


ၼႂ်းလိၵ်ႈၸဝ်ႈယွတ်ႈသိုၵ်းလၢတ်ႈဝႃႈ- ၵူၼ်းၼုမ်ႇႁဝ်းပဵၼ်ႁႅင်းမိူင်းမိူဝ်းၼႃႈလႄႈ ႁႂ်ႈမီးသတိ သမႃႇထိ ပၺ်ၺႃသေ လဵပ်ႈႁဵၼ်းၸွမ်းလႄႈတူင်ႉၼိုင်ၸွမ်းယိူင်းမၢႆ ဢၼ်ၵူၼ်းမိူင်းၸိုင်ႈတႆး မုင်ႈမွင်းၶႂ်ႈႁႂ်ႈၶိုၼ်ႈယႂ်ႇ ၵတ်းယဵၼ်ၼၼ်ႉ။ ႁႂ်ႈဢဝ်တွၼ်ႈသွၼ်ပၢင်လူင်ပီ 1947 သႂ်ႇၸႂ်ၼမ်ၼမ်။ ၵၢၼ်ၽွမ်ႉႁူမ်ႈၼႆႉလၢတ်ႈငၢႆႈ ႁဵတ်းယၢပ်ႇ၊ ပေႃးဢမ်ႇမီးၽႅၼ်ၵၢၼ်ယိူင်းမၢႆၸိုင် တေမိူၼ်ၵူၼ်းၵႂႃႇတၢင်းသေ ၵႂင်တၢင်းဝႆႉၼၼ်ႉယဝ်ႉ”- ဝႃႈၼႆ ။


လိူဝ်သေၼၼ်ႉ မၼ်းၸဝ်ႈလၢတ်ႈလွင်ႈၽေးယႃႈမဝ်းၵမ်၊ လွင်ႈလၢႆးလုၵ်ႉၽိုၼ်ႉ၊ လွင်ႈၻီႊမူဝ်ႊၶရေႊၸီႊ၊ လွင်ႈတီႈလိၼ် သူၼ်ႁႆႈၼႃးၵူၼ်းမိူင်းတႆး ၸိူဝ်းၼႆႉ ။


ၸဝ်ႈယွတ်ႈသိုၵ်း ယင်းၾၢၵ်ႇပႃးပၢႆးဝူၼ်ႉ 4 ၶေႃႈ တီႈၸၢဝ်းၶိူဝ်းတႆးတင်းလၢႆဝႃႈ- 1.ၽူႈဢွၼ်ႁူဝ်ၼႆႉ ႁႂ်ႈမီးယိူင်းမၢႆ။ 2.ၽူႈမီးၼမ်ႉၵတ်ႉ ႁႂ်ႈၽွင်းငမ်းဝၢၼ်ႈမိူင်း။ 3.ၽူႈႁတ်းႁၢၼ် ႁႂ်ႈၵႅတ်ႇၶႄၸိူဝ်ႉၶိူဝ်း။ 4.ၽူႈမီးငိုၼ်းတွင်း ႁႂ်ႈမေႃၵမ်ႉၸွႆႈၸိူဝ်ႉၸၢတ်ႈၸိူဝ်ႉၶိူဝ်း။ ပေႃးႁဵတ်းသၢင်ႈၸိူင်ႉၼႆၸင်ႇ ပဵၼ်ၵူၼ်းမီး ၵုၼ်းမုၼ်ၼိူဝ်ၸိုင်ႈမိူင်း ၸိူဝ်ႉၶိူဝ်း- ၼႆယဝ်ႉ ။


ၼွၵ်ႈသေၼၼ်ႉ မၼ်းၸဝ်ႈယင်းၾၢၵ်ႇပႃးပၢႆးဝူၼ်ႉၶိုၵ်ႉတွၼ်းထႅင်ႈဝႃႈ- “ၽူႈမီးၼမ်ႉၵတ်ႉပၺ်ၺႃ ယူႇသႃႇဢဝ်တူဝ်လွတ်ႈၼၼ်ႉ မိူၼ်မၢၵ်ႇႁိၼ်ၾင်လိၼ်ဝႆႉၵူၺ်း ဢမ်ႇမီးၵုၼ်းမုၼ်သင်။ ၽူႈႁတ်းႁၢၼ်ဢမ်ႇၵႅတ်ႇၶႄၸိူဝ်ႉၶိူဝ်းၼၼ်ႉၵေႃႈ မိူၼ်ၵူၼ်းႁၢႆႉၸူၼ်လူင် မိူၵ်ႈမႂ်ႈတေႃႇၸိူဝ်ႉၶိူဝ်းၼၼ်ႉၵူၺ်း”- ဝႃႈၼႆ ။


ၵဵဝ်ႇၵပ်းလွင်ႈ ပၢင်ဢုပ်ႇၵုမ်တီႈလႃႈသဵဝ်ႈပွၵ်ႈၵမ်းၼႆႉ ၸၢႆးသုၼ်ယုၵ်ႉ ၵႅမ်ၽူႈၼမ်းၼႂ်းၵေႃလိၵ်ႈလၢႆး လႄႈၾိင်ႈငႄႈတႆး ဝဵင်းပၢင်လူင် လၢတ်ႈဝႃႈ- တူင်ႇဝူင်းတႆးႁဝ်းလႄႈ ၵေႃလိၵ်ႈလၢႆးလႄႈၾိင်ႈငႄႈတႆးၵေႃႈ လႆႈဢွၼ်ၵၼ်မႃး ၶိုၼ်ႈပၢင်တုမ်လူင်ၸိူဝ်ႉၶိူဝ်းတႆး တင်းၼမ်။ လႆႈမႃးႁၼ်ပီႈၼွင်ႉႁဝ်းၶဝ်ၵူႈတီႈၵူႈတၢင်း၊ လႆႈဢဝ်မႃးတၢင်ႇလၢတ်ႈၼႄ လွင်ႈၶွင်ႉၶမ်ၼႂ်းပိုၼ်ႉတီႈၽႂ်မၼ်း ၸွမ်းၼင်ႇဢၼ်လႆႈႁူႉလႆႈႁၼ်မႃး ၸိူဝ်းၼၼ်ႉ။ ဢၼ်မႃးတၢင်ႇလၢတ်ႈၸိူဝ်းၼႆႉ ၵူႈတီႈတီႈ ဢၼ်ၶွင်ႉၶမ်ပဵၼ်လွင်ႈယႃႈမဝ်းၵမ်ၵမ်ႈၼမ်- ဝႃႈၼႆ ။


သိုပ်ႇလၢတ်ႈထႅင်ႈဝႃႈ- ၶေႃႈၵႂၢမ်းဢၼ်ဢွၵ်ႇမႃးၼႂ်းပၢင်ဢုပ်ႇၵုမ်ၼႆႉ မီးလွင်ႈႁူႉတၢင်းႁၼ်တင်းၼမ်။ ၵဵဝ်ႇၵပ်းလွင်ႈယူင်ႉၶၢပ်ႈ ၵၢၼ်ဝၢင်းၽႅၼ်ၸိူဝ်းၼၼ်ႉၵေႃႈ ဢဝ်ၵၢင်ၸႂ်ၵူၼ်းတင်းၼမ်သေ ၶိုၼ်းမႄးထႅမ်ထွၼ်- ဝႃႈၼႆ ။


ပၢင်ဢုပ်ႇၵုမ်ၸုမ်းတႆးလၢႆလၢႆၸုမ်းၼႆႉ ၸတ်းႁဵတ်းတင်ႈတႄႇဝၼ်းတီႈ 5-7/10/2016 (ၶၢဝ်းတၢင်း 3 ဝၼ်း) တီႈႁူင်းႁေႃၵေႃလိၵ်ႈလၢႆးလႄႈၾိင်ႈငႄႈတႆး ဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ။ ယိူင်းဢၢၼ်း တႃႇႁူမ်ႈၵၼ် ၵႄႈလိတ်ႈပၼ်ႁႃလွင်ႈၶွင်ႉၶမ်ၸိူဝ်ႉၶိူဝ်းတႆး။ ပိူင်လူင်မၼ်း ဢုပ်ႇၵုမ်ၵၼ်ၽႅၼ်ၵၢၼ်တႃႇမိူဝ်းၼႃႈ ၸိူဝ်းၼႆႉ။ ပိူဝ်ႈတႃႇႁဵတ်းသၢင်ႈၵၢၼ်ငၢၼ်းၵႂႃႇမိူဝ်းၼႃႈၼၼ်ႉ တေလိူၵ်ႈတင်ႈၸုမ်းပွင်ၵၢၼ် တူင်ႇဝူင်းၸိူဝ်ႉၶိူဝ်းတႆးႁူမ်ႈ- ၼႆယဝ်ႉ ။