ႁွင်ႈၵၢၼ်ၾၢႆႇၸတ်းႁႃၵၢၼ်ငၢၼ်းမိူင်းထႆးပိုၼ်ၽၢဝ်ႇဝႃႈတေဢမ်ႇႁဵတ်းပၼ်ဝႂ်ႁဵတ်းၵၢၼ်ဢၼ် “မႂ်ႇ” လႄႈၼႂ်းၶၢဝ်းတၢင်း5ပီတၢင်းၼႃႈၼႆႉတေၶတ်းၸႂ်ဢမ်ႇပိုင်ႈႁႅင်းၵၢၼ်ယၢၼ်မိူင်း- ဝႃႈၼႆ ။

ပၢင်ၵုမ်လူင်ၵဵဝ်ႇလူၺ်ႈႁႅင်းၵၢၼ်ယၢၼ်မိူင်းလႄႈ လွင်ႈၵႃႉၶၢႆၵူၼ်းပွၵ်ႈၵမ်း 4 ၸတ်းႁဵတ်းဝၼ်းတီႈ 12/10/ 2016 ၼႆႉဢွၼ်ၵၼ်ႁၼ်လီၸွမ်းၵဵဝ်ႇလူၺ်ႈလွင်ႈဝႃႈ တေဢမ်ႇႁဵတ်းပၼ်ဝတ်းမႂ်ႇ ပၼ်ပီႈ ၼွင်ႉႁႅင်းၵၢၼ်ယၢၼ်မိူင်း 3 ၸိူဝ်ႉၸၢတ်ႈလၢဝ်း၊မၢၼ်ႈ၊ၶႅမ်ႊပေႃႊတီႊယိူဝ်ႊ ။


သိင်ႊႁႃၻဵတ်ႊ ၶျူႊဢမ်ႊၼၢတ်ႉၾၢႆႇၸတ်းႁႃၵၢၼ်ငၢၼ်းလၢတ်ႈဝႃႈ- “ တႄႇဢဝ်ၼႆႉၵႂႃႇတေ ႁႂ်ႈႁႅင်းၵၢၼ်ႁဵတ်းၸွမ်းပိူင် MOU ၵူၺ်းတေဢမ်ႇတေႃႇပၼ်ဝႂ်မႂ်ႇယဝ်ႉ။ လိူဝ်သေႁႅင်းၵၢၼ်ဢၼ် ႁဵတ်းၵၢၼ်လႃႈၼမ်ႉၵူၺ်းဢၼ်တေႁဵတ်းပၼ် ။

ယဝ်ႉၵေႃႈၼင်ႇႁိုဝ်ဢမ်ႇမီးႁႅင်းၵၢၼ်ယၢၼ်မိူင်းၵေႃႈၵူၼ်းမိူင်းထႆးႁဵတ်းၵၢၼ်လႆႈၼၼ်ႉၵေႃႈ တေၶတ်းၸႂ်ဝၢင်ႈၽႅၼ်ႁဵတ်းသၢင်ႈၵႂႃႇ။ ၶၢတ်ႈလၢမ်းဝႃႈထႅင်ႈ 5 ပီတၢင်းၼႃႈၼႆႉတေလူတ်းယွမ်းလႆႈလွင်ႈပိုင်ႈဢိင်ႁႅင်းၵၢၼ်ယၢၼ်မိူင်း” ဝႃႈၼႆ ။


ၵဵဝ်လူၺ်ႈလွင်ႈၼႆႉထွင်းၶမ်းတီႈတိူင်ႇပၢင်ႇႁႅင်းၵၢၼ်ယၢၼ်မိူင်းလၢတ်ႈဝႃႈ - “ လွင်ႈဝႂ်ႁဵတ်းၵၢၼ် ဢၼ်မႂ်ႇၼႆႉလႆႈႁူႉဝႃႈပိူၼ်ႈဢမ်ႇႁဵတ်းပၼ်ယဝ်ႉတႄႇဢဝ်ၼႆႉၵႂႃႇၵေႃႈ တေႁႂ်ႈၶဝ်ႈမိူင်းမႃးၸွမ်းပိူင်ႇ MOU ၵူၺ်း။ တႃႇတေႁဵတ်း MOU ၼၼ်ႉသင်ဝႃႈၸၢင်ႈၼၢႆးၼႃႈႁဵတ်းၸိုင်တေသဵင်ႈငိုၼ်းမွင်ႈ 20,000 – 40,000 ဝၢတ်ႇ သေတေလႆႈၸႂ်ႉၶၢဝ်းယၢမ်းမွၵ်ႈ 3 လိူၼ် ။


“ ပေႃးယူႇမိူင်းႁဝ်းလႆႈၸိုင်ယူႇတီႈဝၢၼ်ႈႁဝ်းမိူင်းႁဝ်းၼၼ်ႉလီလိူဝ်သဵင်ႈပိူၼ်ႈယဝ်ႉ၊တီႈမိူင်းထႆးၼႆႉၵေႃႈပေႃးဢမ်ႇမီးဝႂ်ၸိုင်ယူႇယၢပ်ႇ၊ၵိၼ်ယၢပ်ႇ၊မိူဝ်းၼႃႈမႃးတေပဵၼ်ၸိူင်ႉႁိုဝ်ၵေႃႈဢမ်ႇႁူႉ” -ထွင်းၶမ်းယင်း မွၵ်ႇလၢတ်ႈပီႈၼွင်ႉႁႅင်းၵၢၼ်ယၢၼ်မိူင်းဝႃႈဝႃႈၼႆ ။


“ ၵူၺ်ႈၵႃႈမိူဝ်ႈၼႃႈမႃးတေပဵၼ်ၸိူင်ႉႁိုဝ်မႃးထႅင်ႈၼႆၵေႃႈလူဝ်ႇပႂ်ႇထႅင်ႈၵမ်းၼိုင်ႈ”-ၸၢႆးမၢတ်ႈၵေႃႉ ပဵၼ်ၼၢႆးၸၢင်ႈလၢတ်ႈဝႃႈ ။ မၼ်းၸၢႆးလၢတ်ႈထႅင်ႈဝႃႈ- ၶႂ်ႈၾၢၵ်ႇထိုင်ပီႈၼွင်ႉႁႅင်းၵၢၼ် ဝႃႈႁႂ်ႈဢွၼ် ၵၼ်ထွမ်ႇၶၢဝ်ႇ၊တူၺ်းၶၢဝ်ႇယူႇတႃႇသေယႃႇယုမ်ႇပိူၼ်ႈငၢႆႈ ” ဝႃႈၼႆ ။


မိူဝ်ႈလဵဝ်ႁႅင်းၵၢၼ်ယၢၼ်မိူင်းၸိူဝ်းဢၼ်ၵႂႃႇၶိုၼ်ႈသဵၼ်ႈမၢႆဢၼ်လူင်ပွင်ၸိုင်ႈပိုတ်ႇႁဵတ်းပၼ် တႄႇ 01/04/2016 – 29/07/2016 ၼၼ်ႉ ႁႅင်းၵၢၼ်ယၢၼ်မိူင်း ၸိူဝ်ႉၸၢတ်ႈၶႅမ်ႊၿေႃႊတီႊယိူဝ်ႊ၊ လၢဝ်းလႄႈမၢၼ်ႈ ဢၼ်လႆႈ လူင်းသဵၼ်ႈမၢႆမီးဝႆႉ1,067,410ၵေႃႉ။ ပေႃႈ/မႄႈလဵင်ႉ (ၼၢႆးၸၢင်ႈ ) မီး 287,135ၵေႃႉ။ ၸႅၵ်ႇပဵၼ် ၵူၼ်း မိူင်းမၢၼ်ႈ 639,464ၵေႃႉ၊ ၶႅမ်ႊၿေႃႊတီႊယိူဝ်ႊ 365,542လႄႈ လၢဝ်း 62,404 ၵေႃႉ။ ၵူၼ်းမႃးၸွမ်း (ၽူႈတိတ်း တၢမ်) 22,807 ၵေႃႉ ဝႃႈၼႆ ။