ပၢင်ဢုပ်ႇၵုမ် ၸုမ်းတူင်ႇဝူင်းၵူၼ်းတႆးလၢႆလၢႆၸုမ်း၊ ဢၼ်ၸႂ်ႉၸိုဝ်ႈဝႃႈ ပၢင်တုမ်လူင်တူင်ႇဝူင်းၸိူဝ်ႉၶိူဝ်းတႆး ဢၼ်ၸတ်းတီႈ ႁူင်းႁေႃၵေႃလိၵ်ႈလၢႆးလႄႈၾိင်ႈငႄႈတႆး ဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ၶၢဝ်းတၢင်း 3 ဝၼ်း ႁူမ်ႈၵၼ်လႆႈၸႂ်ဢွၵ်ႇၶေႃႈတႅပ်းတတ်း 5 ၶေႃႈ ။

ပီႈၼွင်ႉၵူၼ်းမိူင်းၸုမ်းတူင်ႇဝူင်းတႆး ဢၼ်ၶိုၼ်ႈႁွတ်ႈၶဝ်ႈႁူမ်ႈပၢင်တုမ်လူင်

ၶေႃႈလႆႈၸႂ်ၸိူဝ်းၼၼ်ႉ 1.ပိူဝ်ႈတႃႇႁူမ်ႈၵၼ်သၢၼ်ၶတ်း ၽဵဝ်ႈမူၺ်ႉယႃႈမဝ်းၵမ်။ 2.ပိူဝ်ႈတႃႇသၢင်ႈလွင်ႈ ၸမ်ၸႂ်လႄႈ လွင်ႈၽွမ်ႉႁူမ်ႈဝူင်ႈၵၢင် တူင်ႇဝူင်းၸိူဝ်ႉၶိူဝ်းတႆးလၢႆမူႇလၢႆၸုမ်း ႁႂ်ႈမီးလွင်ႈပၼ်ႈၵႅၼ်ႇၼႅၼ်ႈၼႃ ၵၼ်မႃးလိူဝ်ၵဝ်ႇ။ 3.ပိူဝ်ႈတႃႇႁူမ်ႈၵၼ် ၵႄႈလိတ်ႈပၼ်ႁႃ တၢင်းတုၵ်ႉၶယၢပ်ႇၽိုတ်ႇလူင် ဢၼ်ၵူၼ်းၶိူဝ်းတႆး လႆႈႁူပ်ႉထူပ်းယူႇ ၼႂ်းဝၼ်းမိူဝ်ႈၼႆႉ။ 4.ပိူဝ်ႈတႃႇပိုတ်ႇႁူင်းႁဵၼ်းတႆးလႄႈ သွၼ်ႁဵၼ်းပိုၼ်ႉထၢၼ်ၾိင်ႈငႄႈ ၾိင်ႈထုင်းတႆး ပႃးၸဵမ် 5.ပိူဝ်ႈတႃႇပူၵ်းပွင်ပၢႆးပၺ်ၺႃ ယုၵ်ႉမုၼ်းၼမ်ႉၵတ်ႉၵူၼ်းၼုမ်ႇၸိူဝ်းၼႆႉ- ၼႆယဝ်ႉ ။


ၽူႈၶဝ်ႈၸုမ်းပွင်ၵၢၼ် ၸၢႆးလွႆၶမ်းပၢင်ႇ လၢတ်ႈဝႃႈ- ၸွမ်းၼႂ်းၶူးၼႂ်းဝဵင်းၵေႃႈ ယႃႈမဝ်းၵမ်လိူင်ႇၼမ်မႃး၊ မီးၽေးၼမ်မႃး၊ ၶူဝ်းၶွင်လႄႈသၢႆၸႂ်ၵူၼ်းမိူင်းၵေႃႈဢမ်ႇမီးလွင်ႈႁူမ်ႇလူမ်ႈ။ ၼွၵ်ႈသေၼၼ်ႉ မီးလွင်ႈပူၼ်ႉပႅၼ်သုၼ်ႇလႆႈၵူၼ်း။ ယဝ်ႉၵေႃႈ ဢၼ်ၵူၼ်းမိူင်းႁဝ်း လႆႈၺႃးၸၢၵ်ႇၽေးသိုၵ်းသိူဝ်ယူႇၸိူဝ်းၼႆႉ မၼ်းႁဵတ်းႁႂ်ႈပၢႆးပၺ်ၺႃတူၵ်းတႅမ်ႇ၊ ပၢႆးယူႇလီတူၵ်းတႅမ်ႇ၊ လႆႈဢဝ်ၸိူဝ်းၼႆႉပဵၼ်ပိူင်လူင်သေ ဢုပ်ႇဢူဝ်းၵၼ်- ဝႃႈၼႆ ။


ပၢင်ဢုပ်ႇၵုမ် တူင်ႇဝူင်းၸိူဝ်ႉၶိူဝ်းတႆးပွၵ်ႈၼႆႉ ၸတ်းႁဵတ်းတင်ႈတႄႇဝၼ်းတီႈ 05-07/10/2016 (ၶၢဝ်းတၢင်း 3 ဝၼ်း) ၊ မီးမူႇၸုမ်းၶဝ်ႈႁူမ်ႈတင်းမူတ်း 80 ၸုမ်းပၢႆ။ မူႇၸုမ်းၼႂ်းမိူင်းတႆး မီးမိူၼ်ၼင်ႇၸုမ်းတူင်ႇဝူင်းၵူၼ်းတႆး လၢႆလၢႆၸုမ်း၊ သင်ၶၸဝ်ႈ၊ ၸုမ်းယိပ်းၵွင်ႈၵၢင်ႇလၢႆလၢႆၸုမ်း၊ ၸုမ်းပႃႇတီႇၵၢၼ်မိူင်းလႄႈ ၵေႃလိၵ်ႈလၢႆးလႄႈ ၾိင်ႈငႄႈတႆး လၢႆလၢႆၸႄႈဝဵင်းၶဝ်ႈႁူမ်ႈ။ ၼွၵ်ႈသေၼၼ်ႉ ပီႈၼွင်ႉတႆးလႅင် လႄႈတႆးၶမ်းတီး ၸိူဝ်းယူႇသဝ်း ၼႂ်းၸႄႈမိူင်းၶၢင် တင်းတိူင်းၸၵၢႆး (ၸႄႈၵႅင်ႇ)၊ ၵူၼ်းၼုမ်ႇၼႂ်းၵေႃလိၵ်ႈလၢႆးလႄႈၾိင်ႈငႄႈတႆး တိူင်းပၵူဝ်း (ပႃႇၵိူဝ်) ၸိူဝ်းၼႆႉၵေႃႈ မႃးၶိုၼ်ႈႁွတ်ႈၶဝ်ႈႁူမ်ႈ ။


“ဢၼ်ၵူၼ်းတႆးႁဝ်း လႆႈႁူပ်ႉထူပ်းတၢင်းယၢပ်ႇၽိုတ်ႇယူႇ ၼႂ်းဝၼ်းမိူဝ်ႈလဵဝ်ၼႆႉ ပဵၼ်ပၼ်ႁႃဢၼ်ၵိူတ်ႇၶိုၼ်ႈ ယူႇၼႂ်းပိုၼ်ႉတီႈ မိူၼ်ၼင်ႇပၼ်ႁႃၵၢၼ်မိူင်း၊ ၵၢၼ်မၢၵ်ႈမီး၊ လွင်ႈပိူင်ၵူၼ်းၸိူဝ်းၼႆႉ။ ၵွပ်ႈၼႆ လႆႈဢဝ်လွင်ႈ ၸိူဝ်းၼႆႉႁဵတ်းပဵၼ်ႁူဝ်ၶေႃႈသေဢုပ်ႇဢူဝ်းၵၼ်၊ ပိူဝ်ႈတႃႇႁူမ်ႈမိုဝ်းၵၼ်ၵႄႈလိတ်ႈ”- ၸၢႆးလွႆၶမ်းပၢင်ႇ လၢတ်ႈၼႄၼင်ႇၼႆ ။


ဢၼ်ၸုမ်းတူင်ႇဝူင်းၵူၼ်းတႆးလၢႆမူႇလၢႆၸုမ်း၊ ၵူၼ်းၶိူဝ်းတႆး လၢႆတီႈလၢႆတၢင်း မႃးႁူပ်ႉထူပ်းဢုပ်ႇၵုမ်ၵၼ် ပွၵ်ႈၼႆႉ ပဵၼ်ဢၼ်မီးႁႅင်းၸႂ်ၶိုၼ်ႈမႃးတႄႉတႄႉၼႆ ၽူႈၶဝ်ႈႁူမ်ႈ လဵပ်ႈႁဵၼ်းၼႂ်းပၢင်ဢုပ်ႇၵုမ် ၸၢႆးဢၢႆႈသိူဝ် လၢတ်ႈၼင်ႇၼႆ ။


“ပၢင်ဢုပ်ႇၵုမ်ၸိူင်ႉၼႆၼႆႉ လီသိုပ်ႇၸတ်းႁဵတ်းထႅင်ႈ။ ပေႃးၸတ်းႁဵတ်းထႅင်ႈတၢင်းၼႃႈၼႆ ဢၼ်ႁဝ်းၶႂ်ႈလႆႈ ၶႂ်ႈပဵၼ်ၼႆႉ မိူၼ်ၼင်ႇမူႇၸုမ်းၸိူဝ်းမႃးၶိုၼ်ႈႁွတ်ႈၶဝ်ႈႁူမ်ႈတင်းသဵင်ႈၵေႃႈ တေမီးလွင်ႈၸမ်ၸႂ်ၵၼ်မႃး လိူဝ်ၵဝ်ႇ။ ဢၼ်တိုၵ်ႉမီးလွင်ႈယူပ်ႈယွမ်းဢိတ်းဢွတ်းတႄႉ ပၢင်ဢုပ်ႇၵုမ်ပွၵ်ႈၼႆႉ ယင်းပႆႇမီးလွင်ႈၸမ်ၸႂ်ၵၼ် ၵႃႈႁိုဝ်”- ဝႃႈၼႆ ။


ပၢင်ဢုပ်ႇၵုမ် တူင်ႇဝူင်းၸိူဝ်ႉၶိူဝ်းတႆးပွၵ်ႈၼႆႉ ၸတ်းႁဵတ်းတီႈ တီႈႁူင်းႁေႃၵေႃလိၵ်ႈလၢႆးလႄႈၾိင်ႈငႄႈတႆး ဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ။ ယိူင်းဢၢၼ်းတႃႇႁူမ်ႈၵၼ် ၵႄႈလိတ်ႈပၼ်ႁႃလွင်ႈၶွင်ႉၶမ်ၸိူဝ်ႉၶိူဝ်းတႆး။ ပိူင်လူင်မၼ်း ဢုပ်ႇၵုမ်ၵၼ်ၽႅၼ်ၵၢၼ်တႃႇမိူဝ်းၼႃႈ ၸိူဝ်းၼႆႉ။ ပိူဝ်ႈတႃႇႁဵတ်းသၢင်ႈၵၢၼ်ငၢၼ်းၵႂႃႇမိူဝ်းၼႃႈ ၼၼ်ႉ တေလိူၵ်ႈတင်ႈၸုမ်းပွင်ၵၢၼ် တူင်ႇဝူင်းၸိူဝ်ႉၶိူဝ်းတႆးႁူမ်ႈ 21 ၵေႃႉ။ ၸုမ်းပွင်ၵၢၼ်ၵဝ်ႇ 9 ၵေႃႉ လႄႈ ၸုမ်းပွင်ၵၢၼ်မႂ်ႇထႅင်ႈ 21 ၵေႃႉ- လႆႈႁူႉၼင်ႇၼႆ ။