သင်ၶၸဝ်ႈလႄႈ ပီႈၼွင်ႉၵူၼ်းမိူင်း ၸႄႈဝဵင်းထုင်ႉပူင်း ႁူမ်ႈၵၼ်ၸတ်းႁဵတ်း ပၢင်ၶႄႉၶႅင်ႇ ပွႆးၽၢႆးႁိူဝ်း ပွၵ်ႈၵမ်း 3 တင်းမူတ်း ၽူႈၶဝ်ႈၶႄႉၶႅင်ႇ မီး 43 ဝၢၼ်ႈ ။

ဝၼ်းတီႈ 08-09/10/2016 ယၢမ်းၵၢင်ၼႂ်ထိုင် ႁူဝ်ၶမ်ႈ ၽူႈဢွၼ်ႁူဝ်ၸတ်းႁဵတ်းပၢင်ပွႆး ၸဝ်ႈတူၼ်ၶူး ဝႃႇလိင်ႇ ပဵၼ်ၽူႈၼမ်းၼႃႈ တင်း ႁူဝ်ပဝ်ႈ ၵေႃပွင်ပဵၼ်ပၢင်ပွႆး လုင်းၸရေးပေႇတ ႁူမ်ႈၵၼ် ၸတ်းႁဵတ်း ပၢင်ၶႄႉၶႅင်ႇ ပွႆးၽၢႆးႁိူဝ်း တီႈဝၢၼ်ႈတူၼ်ႈမူင်ႈတင်း ဝၢၼ်ႈႁူဝ်တၢတ်ႇ ၼႂ်းဢိူင်ႇထုင်ႉပူင်း  ၸႄႈတွၼ်ႈတူၼ်ႈတီး ၸိုင်ႈတႆး ပွတ်းၸၢၼ်း ၼင်ႇႁိုဝ် ၾိင်ႈႁိတ်ႈႁွႆး ပီႈၼွင်ႉတႆး ထုင်ႉပူင်း ပေႃး တေဢမ်ႇမွတ်ႇဝၢႆးႁၢႆလႄႈ လုၵ်ႈလၢၼ်ၸိူဝ်းၶိုၼ်ႈမႃးတၢင်းလင် ပေႃးတေလႆႈ သိုပ်ႇ ႁဵတ်းသၢင်ႈ ၵႂႃႇထႅင်ႈ ။


ၸၢႆးသီႇႁႃႉ ၽူႈၶၢၼ်ပၢၵ်ႇ ၵေႃပွင်ပဵၼ်ပၢင်ပွႆးလၢတ်ႈဝႃႈ “ ၵွပ်ႈဝႃႈ မၼ်းပဵၼ်ၾိင်ႈငႄႈ ၾိင်ႈထုင်းႁဝ်း၊ ႁဝ်းလူဝ်ႇလႆႈၶတ်းၸႂ် ဢွမ်ႇလွမ်ႈၽွမ်ႉသဵင်ပဵင်းပၢၵ်ႇၵၼ်၊ မၼ်းဢမ်ႇၸႂ်ႈ ပွႆးဝၢၼ်ႈတႂ်ႈၼႃးၼိူဝ် ပဵၼ်ပွႆးထုင်ႉပူင်းဢၼ်လဵဝ်ၵၼ်ၵူၺ်း ယိူင်းဢၢၼ်းမီးၼင်ႇၼႆ ” ဝႃႈၼႆ။
သိုပ်ႇလၢတ်ႈထႅင်ႈ ၼႂ်းဝၼ်းတီႈ 08 ၼႆႉ ပဵၼ်ဝၼ်းပိုတ်ႇပၢင်ပွႆး၊ ယဝ်ႉၵေႃႈ ၸူၵ်းၶႅပ်းမႄးၵၼ် ဝႃႈဝၢၼ်ႈလႂ်တေလႆႈၶႄႉၶႅင်ႇတင်းဝၢၼ်ႈလႂ်၊ ဝၼ်းတီႈ 09 သမ်ႉ တွၼ်ႈရၢင်းဝလ်းသူး ၽူႈၶႅင်ႇပေႉ တီႈၼိုင်ႈထိုင် တီႈသီႇ” ဝႃႈၼႆ ။


ပၢင်ၶႄႉၶႅင်ႇ ပွႆးၽၢႆးႁိူဝ်းၼႆႉ ၼႂ်းထုင်ႉပူင်း တင်းမူတ်း ဝၢၼ်ႈၶဝ်ႈႁူမ်ႈ ၶႄႉၶႅင်ႇ မီး 43 ဝၢၼ်ႈ၊ ၵၢၼ် ၶႄႉၶႅင်ႇၽၢႆးႁိူဝ်းၼႆႉ မီးသွင်သႅၼ်း၊ ၽၢႆးႁိူဝ်း 5 ၵေႃႉလႄႈ 4 ၵေႃႉ ။


ၽူႈၸၢႆး ၾၢႆး 5 ၵေႃႉ လႆႈတီႈၼိုင်ႈ ဝၢၼ်ႈသၢႆလေး ၾၢႆႇတူၵ်းၼမ်ႉ၊ ပေႉတီႈသွင် ဝၢၼ်ႈၼွင်ၵၢင် ၾၢႆႇတူၵ်းၼမ်ႉ၊ တီႈသၢမ်သမ်ႉ ဝၢၼ်ႈႁူဝ်တၢတ်ႇ၊ တီႈသီႇ ဝၢၼ်ႈၵၢတ်ႇၵူႇ လႆႈႁပ်ႉၵႂႃႇႉႉႉ ၸဵမ်ၸိူဝ်းၼႆႉ ။


ၽူႈယိင်းၽၢႆး 5 ၵေႃႉသမ်ႉ ဝၢၼ်ႈတိုဝ်ႉႁိူဝ်း တီႈၼိုင်ႈ၊ ဝၢၼ်ႈၵုင်းသႃႇ တီႈသွင်၊ ဝၢၼ်ႈသီႇသူင်ႇ တီႈသၢမ်၊ ဝၢၼ်ႈႁူဝ်တၢတ်ႇ တီႈသီႇ ၸဵမ်ၸိူဝ်းၼႆႉ။
ၽူႈၸၢႆး ၽၢႆး 4 ၵေႃႉသမ်ႉ ဝၢၼ်ႈၵၢတ်ႇၵူႇ တီႈၼိုင်ႈ ၊ ဝၢၼ်ႈသီႇသူင်ႇ တီႈသွင် ၊ ဝၢၼ်ႈတူၼ်ႈမူင်ႈ တီႈသၢမ် ၊ ဝၢၼ်ႈၸဝ်ႈမိူင်း တီႈသီႇ ၸဵမ်ၸိူဝ်းၼႆႉ။
ၵၢၼ်ၶႄႉၶႅင်ႇၽၢႆးႁိူဝ်းၼႆႉ တၢင်းၵႆၽၢႆးၶႄႉၵၼ် မီး 300 ပေႇ(100 မိတႃႇ) ၼႆယဝ်ႉ ။


ပၢင်ၶႄႉၶႅင်ႇပွႆးၽၢႆးႁိူဝ်းၼႆႉ လႆႈၸတ်းႁဵတ်းမႃး ပၢၼ်သိုပ်ႇပၢၼ်။ ဢိင်ၼိူဝ်ငဝ်းလၢႆးသေ လႆႈၵိုတ်း ၵႂႃႇလၢႆပီ။ ဢၼ်ၶိုၼ်းၸတ်းမႃးပီၼႆႉ ပဵၼ်ၵမ်းထူၼ်ႈ 3 ယဝ်ႉဝႃႈၼႆ ။