ပၢင်ၵုမ်ႁၢင်ႈႁႅၼ်းပွႆးယုၵ်ႉယွင်ႈၸဝ်ႈၶူးမေႃလိၵ်ႈတႆးပွၵ်ႈတီႈ 41 ၵမ်းတီႈ 1 ၽူႈယႂ်ႇဝၢၼ်ႈ (ပေႃႈလူင်) တႆး လၢႆဝၢၼ်ႈ ႁူမ်ႈတင်းၵေႃလိၵ်ႈလၢႆးလႄႈၾိင်ႈငႄႈတႆးၵဵင်းမႆႇၶဝ်ႈႁူမ်ႈ ။

ဝၼ်းတီႈ 8/10/2016 ၵေႃၵမ်ၵၢၼ်ပွႆးယုၵ်ႉယွင်ႈၸဝ်ႈၶူးမေႃလိၵ်ႈတႆး ပွၵ်ႈတီႈ 40 တီႈႁေႃၸဝ်ႈၶူးမေႃ လိၵ်ႈတႆး ဢၼ်ၸတ်းႁဵတ်းတီႈဝၢၼ်ႈမႂ်ႇမွၵ်ႇၸၢမ်ၵူႈပီၼၼ်ႉ  ဝၼ်းတီႈ 8/10/2016 ၼႆႉလႆႈၸတ်းပၢင်ၵုမ် တီႈဝတ်ႉမႄႈသၢဝ်မိူင်းၼွင် ၸႄႈဝဵင်းမႄႈဢၢႆး ၸႄႈတွၼ်ႈၵဵင်းမႆႇ လႄႈၵေႃၵမ်ၵၢၼ် ပွႆးယုၵ်ႉယွင်ႈ ၸဝ်ႈၶူးမေႃလိၵ်ႈတႆး ပွၵ်ႈတီႈ 40 ပီ 2016 လႄႈပေႃႈလူင်တႆးလၢႆဝၢၼ်ႈဢိၵ်ႇတင်းၵေႃလိၵ်ႈလၢႆး ၾိင်ႈငႄႈတႆး ၵဵင်းမႆႇၶဝ်ႈႁူမ်ႈ ။


ၼႂ်းပၢင်ၵုမ်ၼၼ်ႉ လႆႈလိူၵ်ႈပေႃႈလူင်ၸၼ်ၵႅဝ်ႈ ၼေႃႇၵႅဝ်ႈ ဝၢၼ်ႈလၢၼ်း (ႁူဝ်ပဝ်ႈၸုမ်းတႆးသၢမ်ၸႄႈဝဵင်း) ပဵၼ် ႁူဝ်ပဝ်ႈၸတ်းပွႆးယုၵ်ႉယွင်ႈၸဝ်ႈၶူးမေႃလိၵ်ႈတႆး ပီတီႈ 41 ၼႂ်းပီ 2017  ၵႅမ်ႁူဝ်ပဝ်ႈၵေႃႉတီႈ 1 ပေႃႈလူင် ဝၢၼ်ႈမႂ်ႇမွၵ်ႇၸၢမ် ၽႆႊၿုၼ်ႊ ပၼ်ႊၸၼ်ႊ လႄႈၵေႃႉတီႈ 2 ပေႃႈလူင်ၵႃႊဝီႊ ယွတ်ႈသႅင် ဝၢၼ်ႈမႄႈသၢဝ် ႁူမ်ႈတင်းၵေႃၵမ်ၵၢၼ်ၵဝ်ႇတင်းသဵင်ႈပဵၼ်ၵေႃၵမ်ၵၢၼ်ၶိုၼ်း၊ လိူဝ်ၼၼ်ႉၵေႃႈ တေဝွၵ်ႇၸိူၼ်းပေႃႈလူင် လႄႈၽူႈၸွႆႈထႅင်ႈလၢႆဝၢၼ်ႈ ၸိူဝ်းပဵၼ်ဝၢၼ်ႈတႆးၶဝ်ႈႁူမ်ႈၸွမ်းထႅင်ႈ ပိူဝ်ႈမီးသူၼ်ႇႁူမ်ႈ ။


ဝၼ်းပွႆးယုၵ်ႉယွင်ႈၸဝ်ႈၶူးမေႃလိၵ်ႈတႆး ပွၵ်ႈတီႈ 41 ၼႆႉၸွမ်းၼင်ႇလႆႈမၵ်းမၼ်ႈၵၼ်ဝႆႉမိူဝ်ႈပၢင်ဢုပ်ႇၵုမ် ၽွင်းပွႆးယုၵ်ႉယွင်ႈၸဝ်ႈၶူးမေႃလိၵ်ႈတႆး ပွၵ်ႈတီႈ 40 ပီ 2016 မိူဝ်ႈဝၼ်းတီႈ 28 လိူၼ် 2 (February) ၼၼ်ႉ လိူၵ်ႈဢဝ် ဝၼ်းတီႈ 10-12/02/2017 ဢွင်ႈတီႈႁေႃၸဝ်ႈၶူးမေႃ ဝတ်ႉမွၵ်ႇၸၢမ် ဝၢၼ်ႈမႂ်ႇမွၵ်ႇၸၢမ် မူႇ 8 ဢိူင်ႇတႃႈတွၼ်း ၸႄႈဝဵင်းမႄႈဢၢႆ ၸႄႈတွၼ်ႈၵဵင်းမႆႇ ။


ၸိူင်ႉႁိုဝ်ၵေႃႈလီ ပီၼႆႉၵေႃႈတေဝွၵ်ႇၸိူၼ်းပီႈၼွင်ႉတႆး ၵေႃလိၵ်ႈလၢႆးလႄႈၾိင်ႈငႄႈတႆးၼႂ်းမိူင်းတႆး လၢႆလၢႆတီႈ ၸွမ်းၼင်ႇယိုၼ်းၶိုတ်းလႆႈၼၼ်ႉ မႃးၶဝ်ႈႁူမ်ႈၸွမ်းၼႆယဝ်ႉ ။