ပၢင်ၾိုၵ်းၽွၼ်ႉ ၽိူမ်ႉထႅမ် ၼမ်ႉၵတ်ႉၵူၼ်းၼုမ်ႇတႆး Tai Youth Organization (TYO) တီႈဢိူင်ႇမိူင်းၸီး ၸႄႈဝဵင်းၵူတ်ႉၶၢႆၼႆႉ ၼင်ႇႁိုဝ် ၵူၼ်းၼုမ်ႇတႆး ၵူႈၸႄႈဝဵင်း ပေႃးတေမီးလွင်ႈ ၵွင်ႉသၢၼ်ၵၼ်လႄႈ ႁူမ်ႈၵၼ်ပူၵ်းပွင်ၵၢၼ်ၸိူဝ်ႉၶိူဝ်း မီးၵူၼ်းၼုမ်ႇတႆးၶဝ်ႈႁူမ်ႈ လဵပ်ႈႁဵၼ်း 130 ပၢႆ ၼႆယဝ်ႉ ။

ဝၼ်းတီႈ 12-14/09/2016 ယၢမ်းၵၢင်ၼႂ် 09:00-16:00 မူင်း ၸုမ်းၵူၼ်းၼုမ်ႇတႆး (TYO) တင်းၸုမ်းၵေႃတႆး ႁူမ်ႈၵၼ်ၸတ်းႁဵတ်း ပၢင်ၽိူမ်ႉထႅမ်ၼမ်ႉၵတ်ႉ ၵူၼ်းၼုမ်ႇတႆး တီႈႁူင်းႁေႃး ၵေႃလိၵ်ႈလၢႆးလႄႈၾိင်ႈငႄႈတႆး ဢိူင်ႇမိူင်းၸီး ၸႄႈဝဵင်းၵူတ်ႉၶၢႆ ၸိုင်ႈတႆး ပွတ်းႁွင်ႇ ၼင်ႇႁိုဝ် ၵူၼ်းၼုမ်ႇၵူႈၸႄႈဝဵင်း ၵူႈတီႈတီႈ ႁႂ်ႈမေႃၶဝ်ႈႁူမ်ႈၵွင်ႉသၢၼ်ၵၼ်၊ ႁႂ်ႈမေႃပူၵ်းပွင်ၸွႆႈထႅမ်ၵၢၼ် တူင်ႇဝူင်း၊ ၵၢၼ်ၸိူဝ်ႉၶိူဝ်းလႄႈ သင်ဝႃႈ ပွၵ်ႈၶိုၼ်းပိုၼ်ႉတီႈၽႂ်မၼ်း ႁႂ်ႈမေႃၸတ်းႁဵတ်း ပွင်သၢင်ႈၵႂႃႇ ဝႃႈၼႆ ။


ၸၢႆးထုၼ်းလႃႉ ႁူဝ်ပဝ်ႈၵူၼ်းၼုမ်ႇတႆး TYO ဢိူင်ႇမိူင်းၸီး လၢတ်ႈဝႃႈ “ ပၢင်သွၼ် ၽိူမ်ႉထႅမ်ၼမ်ႉၵတ်ႉၵူၼ်းၼုမ်ႇတႆး ပွၵ်ႈၵမ်းၼႆႉ ပဵၼ်ၵမ်းတီႈ 2 ယဝ်ႉ ၽႃႇသႃႇၵၢၼ်သွၼ်သမ်ႉ မိူၼ် ၵၢၼ်ပုၼ်ႈၽွၼ်းၵူၼ်းမိူင်း၊ ၵၢၼ်ပဵၼ်ၵူၼ်းမိူင်းလီ၊ ပိူင်တီႇမူဝ်ႇၶရေႇသီႇ၊ ၵၢၼ်ၸတ်းပၢင်ၵုမ်၊ ၵၢၼ်ဢုပ်ႉပိူင်ႇၽွင်းငမ်း၊ လွင်ႈသုၼ်ႇလႆႈသုၼ်ႇပဵၼ်ၵူၼ်း၊ လွင်ႈတူင်ႇဝူင်းၵူၼ်း လႄႈၾိင်ႈတၢင်းၵႃႈ ၵူႈဢၼ်ဢၼ် ၸဵမ်ၸိူဝ်းၼႆႉ။ ထႅင်ႈၾၢႆႇၼိုင်ႈၵေႃႈ ၼင်ႇႁိုဝ် ၵူၼ်းၼုမ်ႇႁဝ်း ပေႃးတေၶဝ်ႈဢွၵ်ႇၵၼ် မိုတ်ႈၵိုဝ်းၵၼ် လႄႈ မေႃၸွႆႈထႅမ်ႁဵတ်းသၢင်ႈ ၼႂ်းပိုၼ်ႉတီႈၽႂ်မၼ်းၵႂႃႇ” ဝႃႈၼႆ ။


ပၢင်သွၼ်ၽိူမ်ႉၼမ်ႉၵတ်ႉ ၵူၼ်းၼုမ်ႇတႆး ပွၵ်ႈၵမ်း 2  ၶူးမႃးပူင်သွၼ်ပၼ်မီး ၶူးသွၼ် ၸၢႆးသိူဝ်ႁၢၼ်၊ ၶူးသွၼ် ၸၢႆးၵွၼ်းလႅင်း၊ ၶူးသွၼ် ယိင်းၼုမ်ႇၶမ်း၊ ၶူးသွၼ် ၼၢင်းၶဵမ်ဝၼ်း လႄႈ ႁူမ်ႈပႃးထႅင်ႈလၢႆလၢႆ ၵေႃႉ ဝႃႈၼႆ ။


ၵူၼ်းၼုမ်ႇတႆးၸိူဝ်းမႃးၶဝ်ႈႁူမ်ႈလဵပ်ႈႁဵၼ်းသမ်ႉ တင်းမူတ်းမီး 130 ၵေႃႉ ယူႇၼႂ်းဢိူင်ႇမိူင်းၸီး၊ မိူင်းယူႉ၊ မိူင်းႁွမ်၊ မိူင်းထၢမ်၊ မိူင်းဝုၼ်း၊ မေႃႇႁၢၼ်၊ မၢၼ်ႈဝဵင်း၊ ပၢင်ၾိုၵ်ႇ၊ ၼမ်ႉဝၼ်း၊ ၼမ်ႉၽိင်း၊ ၼႃးငူး၊ ယုင်းမေႃး၊ တႃႈႁိူဝ်း၊ ပဵင်းၶၢၼ် ၸဵမ်ၸိူဝ်းၼႆႉ ဝႃႈၼႆ ။


ဝၢႆးသေပၢင်သွၼ် ၽိူမ်ႉၼမ်ႉၵတ်ႉၵူၼ်းၼုမ်ႇ ၸတ်းႁဵတ်းပွႆးလူင်းပၢင်ယဝ်ႉၼႂ်းဝၼ်းတီႈ 15 ၼၼ်ႉ၊ သိုပ်ႇသေၼၼ်ႉ ၸင်ႇလႆႈဢွၼ်ၵၼ်ၸတ်းႁဵတ်းပၢင်လဵၼ်ႈမၢၵ်ႇၼင်ထႅင်ႈ ၼင်ႇႁိုဝ် တေမီးလွင်ႈမိုတ်ႈၵိုဝ်းၸမ်ၸႂ် ၵၼ်ထႅင်ႈသေ ၵူၼ်းၼုမ်ႇဢိူင်ႇမိူင်းၸီး၊ မိူင်းယူႉ၊ မေႃႇႁၢၼ်၊ ၵူတ်ႉၶၢႆ ၸဵမ်ၸိူဝ်းၼႆႉ တႄႇဢဝ် ဝၼ်းတီႈ 15-17/09/2016 ၶၢဝ်းတၢင်း 3 ဝၼ်း။ ၵေႃလိၵ်ႈလၢႆးလႄႈ ၾိင်ႈငႄႈတႆး၊ ၸုမ်းဝူင်းမဵတ်ႉတႃႇလႄႈ ၸုမ်းၼၢင်းယိင်းတႆးႁူမ်ႈၵၼ်သေ ဢဝ်ပုၼ်ႈၽွၼ်း လဵင်ႉလူ ၵႂႃႇဝႃႈၼႆ ။


လႅင်ႇၶၢဝ်ႇ ႁဵဝ်းႁိုၼ်းႁွမ်