ၽူႈတႅၼ်းသၽႃး ၵူၼ်းမိူင်း ပႃႇတီႇႁူဝ်သိူဝ်(ႁိုဝ်) ငဝ်ႈငုၼ်းတီႇမူဝ်ႇၶရေႇသီႇၸိူဝ်ႉၶိူဝ်းတႆး (SNLD) ၵႂႃႇဢႅဝ်ႇယဵမ်ႈ လဵပ်ႈႁဵၼ်း ႁူင်းပွႆႇငဝ်းႁၢင်ႈသဵင် ၸၢဝ်းၶိူဝ်း NRC တီႈၼေႇပျီႇတေႃႇ ၼႆယဝ်ႉ ။

ဝၼ်းတီႈ 10/09/2016 ယၢမ်း ဝၢႆးဝၼ်း ၽူႈတႅၼ်းသၽႃးၵူၼ်းမိူင်း ပႃႇတီႇႁူဝ်သိူဝ် 7 ၵေႃႉ ၵႂႃႇဢႅဝ်ႇယဵမ်ႈ သူႇၸႂ်းလဵပ်ႈႁဵၼ်း ႁူင်းပွႆႇငဝ်းႁၢင်ႈသဵင် ၸၢဝ်းၶိူဝ်း NRC တီႈၸႄႈဝဵင်းတၢတ်ႉၵူင်း တိူင်းၼေႇပျီႇတေႃႇ။ ႁူပ်ႉထူပ်း ၽူႈႁၢပ်ႇၵၢၼ်ၸၢဝ်းၶိူဝ်းတႆး ဢၼ်ႁၢပ်ႇၵၢၼ်ၼႂ်းလူင်ပွင်ၸိုင်ႈ မၢၼ်ႈ ၾၢႆႇႁူင်းပွႆႇသဵင်လႄႈ ငဝ်းႁၢင်ႈသဵင် ၼႆယဝ်ႉ ။


ၸၢႆးသႅင်မိူင်း ၽူႈတႅၼ်းသၽႃးၵူၼ်းမိူင်း ၸႄႈဝဵင်းမိူင်းၵိုင် လၢတ်ႈဝႃႈ “ ဢၼ်လႆႈၵႂႃႇႁူပ်ႉ ထူပ်းၼွင်ႉၶဝ် တီႈႁူင်းပွႆႇငဝ်းႁၢင်ႈသဵင်ၼႆႉ ႁဝ်းၶႃႈလႆႈႁပ်ႉႁူႉတၢင်းယၢပ်ႇၽိုတ်ႇၶဝ် မိူၼ် လွင်ႈယူႇလွင်ႈၵိၼ်ၶဝ် မီးၸိူင်ႉႁိုဝ်ၼႆ။ ၼင်ႇႁိုဝ် တေၸၢင်ႇၸွႆႈ ႁႃတၢင်းၵႄႈလိတ်ႈ ၵႂႃႇလွႆးလွႆး။ ၾၢႆႇၼိုင်ႈၵေႃႈ ၼင်ႇႁိုဝ် ၵူၼ်းႁဵတ်းၵၢၼ်တေ မီးႁႅင်းၸႂ် ယႂ်ႇၼမ် ”။


ႁူင်းပွႆႇသဵင် Radio ၾၢႆႇတႆးသမ်ႉ ယွၼ်ႉပိူဝ်ႈဝႃႈ ပဵၼ် ႁူင်းပွႆႇသဵင် ၶွင်လူင်ပွင်ၸိုင်ႈၵမ်းသိုဝ်ႈ လႄႈ ယၢပ်ႇၽိုတ်ႇၼႂ်းၵႃႈၸႂ်ႉၸၢႆႇ-ဝႃႈၼႆ။ “ မိူၼ်ၼင်ႇ ၶႅပ်းၵႂၢမ်းတႆး ဢၼ်တေပွႆႇသဵင်ၼၼ်ႉ တေလႆႈ ၸႂ်ႉငိုၼ်းႁင်းၵူၺ်းၸဝ်ႈၵဝ်ႇသေ သိုဝ်ႉ၊ တေလႆႈသိုဝ်ႉၶႅပ်းၽဵင်းၵႂၢမ်းဢၼ်တႄႉမၼ်း။ သင်ၸိူဝ်ႉဝႃႈ ပဵၼ်ၸဝ်ႈၽဵင်းၵႂၢမ်းလႂ် ပွင်ႇၸႂ်သေ မီးၸႂ်ၸေႇတၼႃႇမႃးယိုၼ်ႈတွၼ်ႈပၼ်ၼႆႉ လီသုတ်း။  ယူႇတီႈၽူႈတႅၼ်းသၽႃးႁဝ်းတႄႉ လႆႈၵမ်ႉၸွႆႈထႅမ်ပၼ်ၵႂႃႇငိုၼ်း 2 သႅၼ်ပျႃး” ၸၢႆးသႅင်မိူင်း လၢတ်ႈ ။


ၸၢႆးလၢဝ်ၶမ်း ၽူႈပွင်ၵၢၼ် ၾၢႆႇငဝ်းႁၢင်ႈသဵင်တႆး တီႈ NRC လၢတ်ႈဝႃႈ “ တေႃႈလဵဝ် ယူႇတီႈၾၢႆႇ မၢၼ်ႈ MRTV ၶဝ် လႆႈၸႅၵ်ႇၽေဝႆႉပၼ် တွၼ်ႈတႃႇၸၢဝ်းၶိူဝ်းႁဝ်း ၶျွင်ႉTV ၸၢဝ်းၶိူဝ်း တႃႇပွႆႇငဝ်းႁၢင်ႈသဵင်၊ ၶျွင်ႉ TV ဢၼ်မႂ်ႇၼႆႉ  ၸၢဝ်းၶိူဝ်း 11 ဢၼ်၊ ၼႂ်းၼၼ်ႉ ပႃးတႆးၶိူဝ်းၼိုင်ႈ၊ ၼႂ်းတႆးႁဝ်းသမ်ႉ တေႇပွႆႇၶၢဝ်းယၢမ်း ၵၢင်ၼႂ် 08:00-10:00 မူင်း ၵူႈဝၼ်း ၼႂ်းၼၼ်ႉတေ မီးလၢႆးၵၢၼ်ၶၢဝ်ႇမိူင်းႁူမ်ႈတုမ်မိူင်းမၢၼ်ႈ၊ ၶၢဝ်ႇၸၢဝ်းၶိူဝ်း ၼႂ်းမိူင်းတႆး၊ လွင်ႈ (Documentary) ၶွင်တႆးလႄႈၸၢဝ်းၶိူဝ်းၼႂ်းမိူင်းႁဝ်း ၸဵမ်ၸိူဝ်းၼႆႉ ။


ၾၢႆႇငဝ်းႁၢင်ႈသဵင် ဢၼ်လႆႈထူပ်းတၢင်းယၢပ်ႇၽိုတ်ႇတႄႉ ၵၢၼ်ၸႂ်ႉၶေႃႈၵႂၢမ်းတႆး ဢမ်ႇပေႃးၽဵၼ်ႈ ဢမ်ႇပေႃးပီႇလီ။ ယွၼ်ႉဝႃႈ  ၽူႈႁၢပ်ႇၵၢၼ် ၾၢႆႇငဝ်းႁၢင်ႈသဵင်တႆးသမ်ႉ လုၵ်ႉၵေႃႉမိူင်းမိူင်းသေမႃးလႄႈ ၶေႃႈၵႂၢမ်းၸႂ်ႉတိုဝ်းတီႈၼိုင်ႈလႄႈတီႈၼိုင်ႈ ဢမ်ႇမိူၼ်ၵၼ်။ ၾၢႆႇၼိုင်ႈတူဝ်ထူပ်းၼႂ်းၵၢၼ်ၸႂ်ႉတိုဝ်းၶေႃႈၵႂၢမ်းတႅတ်ႈသမ်ႉဢေႇ ဝႃႈၼႆ။တေလႆႈဝႃႈ မီးလွင်ႈယၢပ်ႇယူႇ ယွၼ်ႉၼၼ်ႉ ၼင်ႇႁိုဝ် တေလီ ၸႂ်ႉထွႆႈၵႂၢမ်းၸႅင်ႈလီၼၼ်ႉ ႁဝ်းၶႃႈၶဝ်ၵေႃႈ ၾိုၵ်းၶတ်းၸႂ်ၵၼ် ၵူႈၵေႃႉယူႇ”ၸၢႆးလၢဝ်ၶမ်း လၢတ်ႈထႅင်ႈၼင်ႇၼႆ ။


ၾၢႆႇသဵင်တႆး Radio သမ်ႉ ဢွၵ်ႇလၢႆးၵၢၼ်ပၼ် ၼိုင်ႈဝၼ်းလႂ် 2 ၸူဝ်ႈမူင်း ၵၢင်ၼႂ်ၸဝ်ႉ ယၢမ်း 05:30-06:30 မူင်း လႄႈယၢမ်း ဝၢႆးဝၼ်း 02:30-03:30 မူင်း၊ ပွႆႇသဵင်ပၼ်တီႈ MW 50.71 MHZ ၵူႈဝၼ်း၊ တေမီးလၢႆးၵၢၼ် ၶၢဝ်ႇၵၢၼ်မိူင်းႁူမ်ႈတုမ်မိူင်းမၢၼ်ႈ၊ ၶၢဝ်ႇၸၢဝ်းၶိူဝ်း၊ လၢႆးၵၢၼ်ပၢႆးယူႇလီ၊ လၢႆးၵၢၼ် လွင်ႈၾိင်ႈႁိတ်ႈႁွႆးလႄႈ ဢပုမ်ႇ ၸဵမ်ၸိူဝ်းၼႆႉ ဝႃႈၼႆ ။


ၽူႈႁၢပ်ႇၵၢၼ် ၾၢႆႇတီႈႁူင်းပွႆႇငဝ်းႁၢင်ႈသဵင် NRC ၾၢႆႇတႆးသမ်ႉ ပဵၼ် ၸၢႆးလၢဝ်ၶမ်း၊  ၸၢႆးလွၼ်ႉသႅင်ၶိူဝ်း၊ ၸၢႆးၵွင်ငိုၼ်း၊ ၸၢႆးၼုမ်ႇၾႃႉလႅင်း၊ ၸၢႆးဢွင်ႇၼၢႆႇ၊ ၸၢႆးသိူဝ်ႁၢၼ်၊ ၼၢင်းၼူႉၼူၼ်း၊ ၼၢင်းၼူၼ်းမူဝ်လႅင်၊ ၼၢင်းၸၢမ်ၶမ်း၊ ၼၢင်းၶမ်းၼွင်ႉ၊ ၼၢင်းဢိၼ်းၵွၼ်းငိုၼ်း ၸဵမ်ၸိူဝ်းၼႆႉ။ ၾၢႆႇႁၢပ်ႇၵၢၼ် ႁူင်းပွႆႇသဵင် Radio သမ်ႉ ၼၢင်းၶမ်းလၢဝ်၊ ၼၢင်းႁွမ်ငိုၼ်း၊ ၸၢႆးႁၢၼ်သႅင်၊ ၸၢႆးထုၼ်းၶၢၼ်၊ ၼၢင်းလႃႉယဵၼ်ႇလႄႈ ၼၢင်းၸၢမ်ၶမ်း ၸဵမ်ၸိူဝ်းၼႆႉ ပဵၼ်ပီႈၼွင်ႉတႆး တၢင်းပွတ်းၸႄႈဝဵင်း မိူင်းၶၢင်၊ ၵျွၵ်ႉမႄး၊ သႅၼ်ဝီ၊ လၢင်းၶိူဝ်း၊ မွၵ်ႇမႆႇ၊ တူၼ်ႈတီး၊ ထုင်ႉၼွင်ႁၢႆးယႃႈ ဢိၵ်ႇထႅင်ႈလၢႆလၢႆၸႄႈဝဵင်း ၼႆယဝ်ႉ ။


ၸၢဝ်းၶိူဝ်း ဢၼ်မႃးဢွၵ်ႇတီႈႁူင်းပွႆႇငဝ်းႁၢင်ႈသဵင် NRC ၸၢဝ်းၶိူဝ်းတႄႉ မီးၸၢဝ်းၶိူဝ်းၶၢင်၊ ယၢင်းပွတ်းတူၵ်း၊ ယၢင်းပွတ်းဢွၵ်ႇ၊ ယၢင်းသၵေႃး၊ ၶျၢင်း၊ မွၼ်း၊ ရၶႅင်ႇ၊ ဝ လႄႈတႆး ၸဵမ်ၸိူဝ်းၼႆႉ ။