ၸုမ်းၵူၼ်းၼုမ်ႇထုင်ႉမိူင်းၶိူဝ်း၊ ၸုမ်းယွတ်ႈၸဵင်တႆး၊ ၸုမ်းသႅၼ်းႁုၼ်ႈမႂ်ႇ (သီႇထွၵ်ႈ) ႁူမ်ႈၵၼ်ဢွၼ် ႁူဝ်ၵူၼ်းၼႂ်းပိုၼ်ႉတီႈသေ ၸတ်းႁဵတ်းပၢင်ပၼ်တၢင်းႁူႉလႄႈ ၽိူမ်ႉထႅမ်ၼမ်ႉၵတ်ႉၵူၼ်းၼုမ်ႇ ပိူဝ်ႈႁႂ်ႈ ၵူၼ်းၼုမ်ႇၵႆယၢၼ်ယႃႈ မဝ်းၵမ် ။

ဝၼ်းတီႈ 12-14/09/2016 ၸုမ်းၵူၼ်းၼုမ်ႇထုင်ႉမိူင်းၶိူဝ်း၊ ၸုမ်းယွတ်ႈၸဵင်တႆး၊ ၸုမ်းသႅၼ်းႁုၼ်ႈမႂ်ႇ (သီႇထွၵ်ႈ) ႁူမ်ႈၵၼ်ဢွၼ်ႁူဝ်ၵူၼ်းၼႂ်းပိုၼ်ႉတီႈ ၸတ်းႁဵတ်းပၢင်ၽိူမ်ႉထႅမ်ၼမ်ႉၵတ်ႉၵူၼ်းၼုမ်ႇ ပွၵ်ႈၵမ်း 2 ၸတ်းႁဵတ်းတီႈ ၵျွင်းသြႃႇၸဝ်ႈၸေႊၶၢၼ် ဢိူင်ႇသီႇထွၵ်ႈ ထုင်ႉမိူင်းၶိူဝ်း ၸႄႈဝဵင်းသီႇ ပေႃႉၸိုင်ႈတႆးပွတ်းႁွင်ႇ ။


ပူင်သွၼ်ပၼ်သုၼ်ႇလႆႈသုၼ်ႇပဵၼ်ၵူၼ်း၊ ပိုၼ်း၊ ပၢႆးဢွၼ်ႁူဝ်၊ သိင်ႇဝႅတ်ႉလွမ်ႉ၊ ၵၢၼ်လုမ်း၊ ပိုၼ်ႉႁူႉၽေး ယႃႈမဝ်းၵမ်၊ ပိုၼ်ႉႁူႉၽူႈႁဵတ်းၵၢၼ်တႆး မိူၼ်ၼင်ႇ ၸုမ်းၵူၼ်းၼုမ်ႇတႆး၊ တပ်ႉ သိုၵ်းၸိုင်ႈတႆး၊ ပႃႊတီႊတႆး၊ ႁူင်းႁဵၼ်းတႆး၊ ၸုမ်းသိုဝ်ႇၶၢဝ်ႇတႆးၸဵမ်ၸိူဝ်းၼႆႉ ပူင်သွၼ်ပၼ် ၼိုင်ႈဝၼ်းလႂ် 3ပွၵ်ႈ ၶၢဝ်းယၢမ်း ၵၢင်ၼႂ် 08:00 -12:00 ဝၢႆးဝၼ်း 01:30 – 04:30 လႄႈၵၢင်ၶမ်ႈ 07:00-09:00 ၶူးပူင်သွၼ်တႄႉ ပဵၼ်ၸုမ်းၵူၼ်းၼုမ်ႇမိူင်း ၶိူဝ်းၸိူဝ်းၵႂႃႇၶိုၼ်ႈ ပၢင်ၾိုၵ်းၽွၼ်ႉတီႈၸုမ်းၶမ်းၵူႇ (Kham Ku Central ) လႃႈသဵဝ်ႈ လႄႈဢၼ်လႆႈၵႂႃႇႁဵၼ်း ဢဝ်တၢင်ႇတီႈသေၶိုၼ်းမႃးပူင် သွၼ်ပၼ် ၵူၼ်းၼုမ်ႇၼႂ်းပိုၼ်ႉတီႈ 118ၵေႃႉမႃးၶိုၼ်ႈႁဵၼ်းဢဝ် မေႃသွၼ်မီး 8 ၵေႃႉ - ဝႃႈၼႆ  ။


လုင်းၸၢင်းၵႃႇလိင်ႇ လုင်းႁဵင်ဝၢၼ်ႈလၢတ်ႈဝႃႈ - “ ၵူၼ်းၼုမ်ႇၶဝ် ယႃႇပေပႅတ်ႈမုၼ်ၸဝ်ႈ၊ ၵူၼ်းထဝ်ႈ၊ ၵူၼ်းလူင် တေႁဵတ်းသင်ၵေႃႈႁႂ်ႈတိူင်ႇပၢင်ႇၵိူဝ်းၵုမ်ၵူၼ်းလူင်သေႁဵတ်းသၢင်ႈၵႂႃႇ ” ဝႃႈၼႆ ။


ၸၢႆးႁၢၼ်ၶိူဝ်း လၢတ်ႈဝႃႈ - “ ၶႂ်ႈႁႂ်ႈယွမ်းမႃႇၼတေႃႇၵၼ် ယွၼ်ႉၵူၼ်းၼုမ်ႇမေႃမီးမႃႇၼၽႅၼ်သုင်တေႃႇ ၵၼ်လႄႈ ၵၢၼ်ႁဝ်းယိူင်းဢၢၼ်းႁဝ်းမိူၼ်ၵၼ်သေတႃႉၵေႃႈ ႁဝ်းတေဢမ်ႇၸၢင်ႈႁူမ်ႈၵၼ်လႆႈ ၵွပ်ႈၼၼ် ယွၼ်းႁႂ်ႈၵူၼ်းၼုမ်ႇယွမ်းမႃႇၼတေႃႇၵၼ်သေမေႃႁၵ်ႉၵၼ် မေႃၶဝ်ႈဢွၵ်ႇၵၼ် ၸုင်မိုဝ်းၵၼ် ႁဵတ်းသၢင်ႈ ၼႃႈၵၢၼ်ၵႂႃႇသေၵမ်း - ဝႃႈၼႆ ။


ၵဵဝ်ႇလူၺ်ႈပၢင်ၾိုၵ်းၽွၼ်ႉၼမ်ႉၵတ်ႉၵူၼ်းၼုမ်ႇၼႆႉသေ ယူႇတီႈတပ်ႉသိုၵ်းၵူၼ်းမိူင်းတပ်ႉၸုမ်းမၢႆ3 ထုင်ႉမိူင်းၶိူဝ်းတေ ဢၢၼ်းၸတ်းႁဵတ်းပၢင်ၾိုၵ်းၽွၼ်ႉၼမ်ႉၵတ်ႉၵူၼ်းၼုမ်ႇၵႂႃႇၵူႈဢိူင်ႇ - ဝႃႈၼႆ ။


ဝၼ်းတီႈ 27– 29 /08/2016 ၶၢဝ်းတၢင်း 3 ဝၼ်း ၸုမ်းၵူၼ်းၼုမ်ႇထုင်ႉမိူင်းၶိူဝ်း၊ ၸုမ်းယွတ်ႈၸဵင်တႆးႁူမ်ႈ ၵၼ်ဢွၼ်ႁူဝ်ၵူၼ်းၼႂ်းပိုၼ်ႉတီႈသေၸတ်းႁဵတ်း ပၢင်ပၼ်တၢင်းႁူႉလႄႈၽိူမ်ႉထႅမ်ၼမ်ႉ ၵတ်ႉၵူၼ်းၼုမ်ႇ ၸတ်းႁဵတ်းတီႈ လုမ်းတပ်ႉသိုၵ်းၵူၼ်းမိူင်းတပ်ႉၸုမ်း မၢႆ 3 ထုင်ႉမိူင်းၶိူဝ်း ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ ။