ၽူႈႁၢပ်ႇၵၢၼ်ၸိူဝ်ႉၸၢတ်ႈ/ၵၢၼ်မိူင်း ၸိုင်ႈတႆး ပွတ်းဢွၵ်ႇၶူင်း ႁူပ်ႉထူပ်း ပၼ်ႁႅင်း ယုၵ်ႉယွင်ႈၵၼ် တီႈလုမ်းပႃႇတီႇၵွင်ၸႆး ပွၵ်ႈၵမ်းႁႅၵ်ႈ။ တင်းမူတ်းၽူႈၶဝ်ႈႁူမ်ႈပၼ်ႁႅင်း ႁိမ်း 60 ။

ဝၼ်းတီႈ 18/09/2016 ယၢမ်းႁူဝ်ၶမ်ႈ 05:00 မူင်း ပႃႇတီႇၵွင်ၸႆး ဢွၼ်ႁူဝ်ၸတ်းႁဵတ်း ပၢင်ႁူပ်ႉ ထူပ်း ပၼ်ႁႅင်း ယုၵ်ႉယွင်ႈ ၽူႈႁၢပ်ႇၵၢၼ်ၸိူဝ်ႉၸၢတ်ႈ/ၵၢၼ်မိူင်း၊ ၸိူဝ်းထုၵ်ႇသိုၵ်းမၢၼ်ႈ တီႉၺွပ်းယဵတ်ႈၶွၵ်ႈမႃး ပၢၼ်သိုပ်ႇပၢၼ်။ ပၢင်ႁူပ်ႉထူပ်း ၸတ်းႁဵတ်းပွၵ်ႈၵမ်းႁႅၵ်ႈ တီႈလုမ်းပႃႇ တီႇၵွင်ၸႆး ၸႄႈဝဵင်း ၵဵင်းတုင် ၸိုင်ႈတႆး ပွတ်းဢွၵ်ႇၶူင်း ၼႆယဝ်ႉ ။
'

ၸၢႆးသၢမ်တိပ်ႉသိူဝ် ၵႅမ်ႁူဝ်ပဝ်ႈ ပႃႇတီႇၵွင်ၸႆး လၢတ်ႈဝႃႈ “ ပၢင်ဢၼ်လႆႈၸတ်းႁဵတ်းၼႆႉ ဢဵၼ်းဢၢၼ်း ႁႂ်ႈၵူၼ်းတူၵ်းၶွၵ်ႈ ယွၼ်ႉၵၢၼ်ၸိူဝ်ႉၸၢတ်ႈ ၵၢၼ်မိူင်း ႁႂ်ႈလႆႈႁူပ်ႉထူပ်းၵၼ် ပၼ်ႁႅင်းၵၼ် ယုၵ်ႉယွင်ႈၵၼ် ႁဵတ်းၵၢၼ်တႃႇၸိူဝ်ႉၸၢတ်ႈ ဢၼ်ၸိူဝ်းတၢႆၵႂႃႇၵေႃႈ တၢႆလၢႆလၢႆၵူၺ်း မိူၼ်ၼႂ်းဝဵင်းလႄႈသင် ၼႂ်းထိူၼ်ႇလႄႈသင် ဢမ်ႇမီးၽႂ်ယုၵ်ႉယွင်ႈ။ ၵမ်းၼႆႉႁဝ်းတၵ်းလႆႈ ယုၵ်ႉယွင်ႈၵၼ် မိူဝ်ႈတိုၵ်ႉလိပ်းၶီး။ ပေႃးတၢႆမႃးၸင်ႇတေယုၵ်ႉယွင်ႈၵၼ်ၼၼ်ႉ မၼ်းဢမ်ႇပွင်ႇသင်။ မိူဝ်ႈပႆႇတၢႆၼႆႉ ႁဝ်းထုၵ်ႇလီယုၵ်ႉယွင်ႈၵၼ် တေပဵၼ်ဢဵၼ်ႁႅင်း လူင်တႃႇႁဝ်းတေႁူမ်ႈမိုဝ်းၵၼ်၊ တေသိုပ်ႇႁဵတ်းၵၢၼ်ၵႂႃႇတၢင်းၼႃႈ” ဝႃႈၼႆ ။


ပၢင်ႁူပ်ႉထူပ်းၵၼ်ၼၼ်ႉ လႆႈၸႂ်တူၵ်းလူင်းၵၼ်ဝႃႈ ပၢင်လိူၵ်ႈတင်ႈဢၼ်တေမႃးၼႆႉပႃႇတီႇ ႁူဝ်သိူဝ်၊ သိူဝ်ၽိူၵ်ႇ၊ ၵွင်ၸႆး  တေယူႇႁူမ်ႈၵၼ်လိူၵ်ႈ ၵူၼ်းၵတ်ႉၶႅၼ်ႇ လိူဝ်ပိူၼ်ႈ။  ၵေႃႉဢၼ် ၵူၼ်းမိူင်းႁပ်ႉသေတေႁႂ်ႈၶဝ်ႈၶေႉလိူၵ်ႈတင်ႈ” ဝႃႈၼႆ ။


ၽူႈႁၢပ်ႇၵၢၼ် ၸိူဝ်ႉၸၢတ်ႈ/ၵၢၼ်မိူင်း ပွတ်းဢွၵ်ႇၶူင်းသမ်ႉ ဢၼ်ထုၵ်ႇသိုၵ်းမၢၼ်ႈ ၽူႈၶႂၢၵ်ႈ မိူင်း တီႉၺွပ်းယဵတ်ႈသႂ်ႇၶွၵ်ႈမႃး တႄႇဢဝ် 1972၊ 1988၊ 1991 လႄႈ 2002 ၸဵမ်ၸိူဝ်းၼႆႉ ဢၼ်ၵိုတ်း ဝႆႉၵေႃႈမီး ဢၼ်လူႉသဵင်ႈတၢႆၵႂႃႇၵေႃႈမီး။ ၼႂ်းပၢင်ႁူပ်ႉထူပ်းၼႆႉ လႆႈမွၵ်ႇဝႆႉ ၵူၼ်း 19 ၵေႃႉ၊ ဢၼ်မႃးၶဝ်ႈႁူမ်ႈ မီး 15 ၵေႃႉ ။


ၽူႈတူၵ်းၶွၵ်ႈၵၢၼ်မိူင်း ၸိူဝ်းမႃးၶဝ်ႈႁူမ်ႈ ပၢင်ၵုမ်တႄႉမီး- 1 လုင်းႁွင်ၶမ်း၊ 2 လုင်းၸၢႆးလူင်းၵႅဝ်ႈ၊ လုင်းသြႃႇသႅင်ၶမ်း၊ ၸၢႆးၼုတ်း၊ ၸၢႆးလူင်၊ ၸဝ်ႈဢေႃႉ၊ လုင်းတမိ၊ ၸၢႆးသၢမ်တိပ်ႉသိူဝ်၊ သြႃႇမိၵီႉ၊ ၸၢႆးသၢမ်တိပ်ႉပုၼ်ႉ၊ ဢူးၶိၼ်ႇမွင်ႇထုၼ်း၊ ႁၢၼ်ႇလီႇ၊ ၸၢႆးတူး၊ ၸၢႆးဝုၼ်းၶမ်း လႄႈ ႁူမ်ႈလူၺ်ႈထႅင်ႈၵေႃႉၼိုင်ႈ၊ ၽူႈဢမ်ႇလႆႈမႃးၶဝ်ႈႁူမ်ႈသမ်ႉ  ၸၢႆးသီ၊  ၸၢႆးၵဵင်၊  လုင်းယီႈၼူၼ်း ဢႃယု 69 ပီ လႄႈ ႁူမ်ႈလူၺ်ႈထႅင်ႈၵေႃႉၼိုင်ႈ ဝႃႈၼႆ ။


ပၢင်ႁူပ်ႉထူပ်းပၼ်ႁႅင်း ယုၵ်ႉယွင်ႈ ၽူႈတူၵ်းၶွၵ်ႈၵၢၼ်မိူင်းၼႆႉ မီးၸုမ်းတူင်ႉၼိုင်တူင်ႇဝူင်း ၵၢၼ်မိူင်း မိူၼ် ပႃႇတီႇႁူဝ်သိူဝ်၊ ပႃႇတီႇၵွင်ၸႆး၊ ပႃႇတီႇၼူၵ်ႉယုင်း၊ ႁူင်းႁဵၼ်းၸိူဝ်ႉၸၢတ်ႈ ၵဵင်းတုင်၊ ၵေႃလိၵ်ႈလၢႆးလႄႈၾိင်ႈငႄႈတႆး 5 ၸၢဝ်းၶိူဝ်း လႄႈ လုမ်းၵပ်းသၢၼ်ၶွင်ႇသီႇ ဢဝ်ၶိုၼ်းၸိုင်ႈ တႆး/တပ်ႉသိုၵ်းၸိုင်ႈတႆး RCSS/SSA ၸဵမ် ၸိူဝ်းၼႆႉ ။